Ióntki, Tata Diosï arhiaspti israelitechani eskaksï íntspipiringa diesmu a o diesi pori sientu na engaksï xáni andeenga ma uéxurhini jimbo ka jindeespti paraka úrakuarhepiringa para Tata Diosï jurhimbitini kómarhini. Arhiaspti: “Jatsiskari para íntspini desima parti na enga xáni jukaaka chiiti semiieri engari jatsikuaka echerirhu mándani uéxurhini” (Deuteronomio 14:22).

 Diesmu íntspini, juramukua máespti Moisésiri lei jimbo, engaksï jindeepka uánikua leicha enga Tata Diosï ireta Israelini íntsaapka. Kristianuechaksï nóteru Moisésiri lei jimbo jarhaskia, jimboksïsï no jatsiti para íntspini diesmu (Kolosasi 2:13, 14). Joperu mándani kristianu uaati íntspini sentabu “na enga xáni uandarini jakaia imeeri mintsitarhu ka eska no jámaaka pʼamondakuarhini nijtu afuersa íntspini, jimboka Tata Diosï xénchasïnga imani kʼuiripuni enga tsípikua jingoni íntspijka” (2 Korintu 9:7).

•  Diesmu Bibliarhu: Antiguo Testamentu

•  Diesmu Bibliarhu: Nuebo Testamentu

 Antiguo Testamenturhu, uánikua xanhari uandasïndi diesmueri ambe. Ka sánderia ísï tátsekua enga Israeli na intsïnhaapkia uánikua leichani (Moisésiri Lei), peru ístu Biblia uandasïndi tsimani ueltisï ante de Moisési intsïnhaani leichani.

Ante de Moisésiri Lei

 Kʼuiripu enga ueenapka íntspini diesmu ma, jindeespti Abraáni (Génesis 14:18-20; Ebreu 7:4). Arhisïndi eska jamberi ima diesmu jindeeska regalu ma enga Abraáni íntskupka Salemi anapu reini enga ístu saserdotiipka. Biblia nóteru uandasïndia eska Abraáni o imeeri uájpeechaksï ménderu íntspispka diesmu.

 Máteru kʼuiripu enga íntspipka diesmu, jindeespti Jakobu, Abraániri nimakua jémba. Jakobu aiakuspti Tata Diosïni eska enga újchakurapiringa, ima íntskupiringa ‘desima parti iámu ambeeri enga intsïnhapiringa’ (Génesis 28:20-22). Eskaksï na uandajka máru engaksï Biblieri ambe exejka, jamberi diesmu enga Jakobu íntspienga jindeepti animalichani kéjtsïtaani. Joperu enga ima aiatspipka íntspini imani diesmuni no arhikuekasïreendi eska imeeri familiajtu jatsispka para májkueni úni.

Engaksï Moisésiri Lei jimbo japka

 Israelitechaksï jatsispti para íntspini diesmu ka úrakuarhesïreendi para ima ambe enga uétarhienga para Tata Diosïni marhuakuni.

•   Diesmu, jindeespti para Tata Diosïri marhuaricha engaksï solu imeeri ánchikuarhitani uenga ka engaksï no jatsiapka echerichani paraksï ánchitaani. Íksï jindeespti lebitecha ka máru enga saserdotiipka (Números 18:20, 21). Ireta, íntsaasïreendi diesmu lebitechani engaksï no saserdotipka ka íichaksï desima parti íntsaasïreendi saserdotichani (Números 18:26-29).

•   Jamberiksï ístu jatsipti para íntspini máteru diesmu mándani uéxurhini, ka i marhuakuasïreendi lebitechani ka no lebitechani (Deuteronomio 14:22, 23). Israeliri familiechaksï úraasïreendi ini kéjtsïtakuechani imeecheri kʼuínchikuecha jimbo. Ka jarhasïreendiksï uéxurhinicha engaksï ini kéjtsïtakuechani úrauenga para imeechani jarhuataani engaksï kánikua pobripka (Deuteronomio 14:28, 29; 26:12).

 ¿Nénaksï mítesïreeni na xániispi diesmu? Mándani uéxurhini, israelitechaksï arhutasïreendi desima parti na engaksï xáni pʼikunteenga imeecheri echericha jimbo (Levítico 27:30). Engaksï sentabu jingoni uékapiringa íntspini diesmu, jatsisïrendiksï para 20 % sánderu íntspini na enga xáni jukaparhapiringa ambe engaksï íntspipiringa (Levítico 27:31). Ístuksï jatsisïreendi para íntspini desima parti animalicheri (Levítico 27:32).

 Paraksï israelitecha arhutani diesmu animalicheri, jatsisïreendiksï para támu peeraani iámindu númeru diesichani engaksï uérapeenga korralirhu. Lei uandasïreendi eskaksï no jatsisïreenga para exeni sini sési jarhasïreeni animali o nómbe nijtu mójtakuni máteru jingoni. Ístuksï no úsïreendi sentabu jingoni maiampini diesmuni (Levítico 27:32, 33). Joperu, máteru diesmu jimbo enga kʼuínchikuecharhu úrakuarhienga engaksï mándani uéxurhini úkuarhienga, úsïreendiksï sentabu íntspini. I ambe sánderu fásiliispti para ima israelitecha engaksï iauani uératini jurheenga kʼuínchikuecharhu (Deuteronomio 14:25, 26).

 ¿Kánksï íntspisïreeni diesmu israelitecha? Jatsisïreendiksï para mándani uéxurhini íntspini (Deuteronomio 14:22). Joperu mándani siete uéxurhini, ménderuenispti. Ima uéxurhini jindeespti sabatiku, uéxurhini ma para mintsikuarhini, ka israelitechaksï no ánchitaasïreendi echerichani (Levítico 25:4, 5). Ini ambe jimbo, pʼikuntskuarhuksï no íntspisïreendi diesmu. Ka ístu, mándani terseru ka sekstu uéxurhini jimbo, israelitechaksï íntspisïreendi segundu diesmu para pobricha ka lebitecha (Deuteronomio 14:28, 29).

 ¿Ambeksï úkuasïreeni imeechani engaksï no íntspienga diesmu? Moisésiri Lei no uandasïreendi ambe engaksï úkuapiringa. Íntspini diesmu, jindeespti ambe ma engaksï mítepkia eskaksï jatsispka para ísï íni. Israelitechaksï jatsispti para aianguni Tata Diosïni eskaksï íntspispkia ka ístu arhini eska újchakuraapiringa jimbokaksï ísï úspkia (Deuteronomio 26:12-15). Para Tata Diosï, no íntspini diesmu, jindeespti komueska sïpakuni jarhani imani (Malaquías 3:8, 9).

 ¿Jukari kʼuetsapeti ambeespi Diesmu íntspini? Nómbe. Tata Diosï aiakuspti imeeri iretani eska engaksï imeecha íntspipiringa diesmu, ima újchakuraapiringa parakaksï no ma ambe kueratanchapiringa (Malaquías 3:10). Peru engaksï no íntspienga diesmu, no sési nikuasïreendi. Tata Jeoba no újchakuraasïreendi, jimbokaksï saserdoticha ka lebitecha no intsïnhasïreenga diesmu ka nóksï jarhuatanhani jarhasïreendi parakaksï imeecha úpiringa imeecheri ánchikuarhitani (Nehemías 13:10; Malaquías 3:7).

 Enga Jesúsi ixú echerirhu jámani japka, útasï íntspinhasïreendi diesmu. Joperu enga ima uarhipkia, nóteru uétarhisïreendia íntspini.

Jesúsiri jurhiatikuecha jimbo

 I parti Biblieri enga ísï mítekateeka komu Nuebo Testamentu xarhatasïndi eska, enga Jesúsi ixú Echerirhu jámani japka, israelitechaksï seguirisïreenga íntspini diesmu. Ima mítespti eskaksï imeecha jatsispka para íntspini. Peru no sési arhiaspti relijioniri orhejtsïkutichani, jimboksï imeecha jánguarhintasïreenga iámu ambeeri íntspini diesmu, joperuksï no úsïreendi “ambe enga sánderu jukaparhakuepka enga Leirhu karakata japka: sési jámani, pʼamojpini ka mintsinharhikueni” (Mateu 23:23).

Ísï tátsekua enga Jesúsi na uarhipkia

 Enga Jesúsi na íntspipkia imeeri tsípikuani, nóteru nema jatsisptia para afuersa íntspini diesmu. Jesúsiri uarhikua kénditasti Moisésiri Leini, enga ístu jindeeka juramukua para euani diesmu iretani (Ebreu 7:5, 18; Efesu 2:13-15; Kolosasi 2:13, 14).