Nómbe. Máru engaksï terukutantaka ambe engaksï ióntki anapu Bibliaeri karakatecha uandeenga, exesptiksï eska Biblia no mójtakurhiska. Nájkiruka xáni iónikia enga kopiarinhani jaka imani materialicha jimbo engaksï ambendurhikuarhijka.

 Asta iásï jamberi, uánikua ióntki anapu Bibliaeri karakatecha exenhantasti. Ka máru i karakatecha sánisï ménderuenksï uandasïndi ka i ambe xarhatasïndi eskaksï ima engaksï kopiaripka, niáraspkaksï ekibokarikuarini. Nájkirukaksï sánisï ménderueni uandajka, no mójtakurisïndi ambe enga arhikuekajka karakata. Joperu jarhasti máru ambe enga k’oru sánisï mójtakurijka ambe enga arhikuekajka. Peru i ambe ísïisti jimboka ióniskia engaksï máru k’uiripuecha uékaparini máteru ambeksï jatsikuspti para mójtakuni ambe enga meru Biblia arhienga. Ju je exeani tsimani ejempluechani.

1.   Máru ióntki anapu Bibliecharhu, ísïksï uandasïndi 1 Juanu 5:7 jimbo: “Tanimuestiksï engaksï uandantajka auandarhu: Diosï Taati, ka Uandakua ka Espiritu Santu. Ka íksï tanimu májku ambeestiksï”. Joperu i uandakuechaksï no meru karakata jarhaspti ióntki anapu karakatecharhu engaksï mintsinharhikueka, sino, tátsekuaksï jatsikusti. a Jimboksïsï no ísï uandajti máru Bibliaecha iásï anapu engaksï mintsinharhikueka.

2.   Ióntki anapu Bibliaeri karakatecharhu uánikua uelta jukanharisti Tata Diosïri nombrini. Peru uánikua Bibliaechaksï máteru ambe jatsikusti komu “Tata”, o “Diosï”.

 Ini jurhiatikuecha jimbo, sánderu fásilisti exeni nani enga támisï jaka karakata ma jimbokaksï exenhantaskia sánderu uánikua ióntki anapu Bibliaeri karakatecha. b Ka, ¿náksï uandasïni imeecha engaksï terukutantakia ini karakatechani? ¿Uaachi mintsikani eska ísïiska ambe enga Biblia uandajka iásï?

•   William Henry Green enga kánikua míteka Bibliaeri ambe, i ambe uandaspti Karakata Ebreaecheri (engaksï ístu mítekateka komu Antiguo Testamento): “Uaakachi seguru uandani eska no jarhaska máteru ióntki anapu karakata enga ísï xáni sési kopiarinhaka”.

•   Karakata Griegaecheri ambe uandaparini o Nuevo Testamentu, Frederick Bruce enga Bibliaeri ambe exejka, karaspti eska jarhaska uánikua ambe enga xarhatajka eska ísïiska ambe enga uandajka Nuevo Testamento sánderu eska máteru ióntki anapu libruecha engaksï kʼuiripuecha karaka ka enga no nema tekaajka uandani eska no ísïiska ambe engaksï inde libruecha uandajka.

•   Sir Frederic Kenyon, enga kánikua míteka ióntki anapu karakatecheri ambe, uandaspti eska k’uiripu ma uaaka jupikani Bibliani ka seguru uandani eska meru Tata Diosïri uandakuasï jupikatini jaka jimboka májkueni uandasïnga nájkiruka xáni iónikia enga kopiarinhani jaka.

•   Engaksï judiuecha ka kristianuecha kopiaripka Bibliaeri karakatechani, ístu jatsikusptiksï jimini enga uandajka jiáni enga Tata Diosïri ireta xáni no sési ambe úpka (Números 20:12; 2 Samuel 11:2-4; Galasia 2:11-14). c Ístuksï jatsikuspti jimini enga uandeenga na enga no sési nikuapiriga judiuechani jimbokaksï no uékaspka kurhajchani Tata Diosïni ka karakatecha engaksï uandeenga eska no sési jarhaspka máru ambe enga k’uiripu jorhentpienga (Oseas 4:2; Malaquías 2:8, 9; Mateu 23:8, 9; 1 Juanu 5:21). Imeecha engaksï xáni sési kopiaripka ini karakatechani, xarhatasptiksï eskaksï mintsinharhikuespka ka eskaksï kánikua jukaparharasïrenga Tata Diosïri Karakatani.

•   Jimboka Tata Diosïsï kararkuarhika Bibliani, ima pendienti jarhasti paraka asta iásï jamberi májkueni uandapiringa eska jiáni enga karakuarhipka (Isaías 40:8; 1 Pedru 1:24, 25). d Tata Diosï no uékasïrendi eska Biblia solu marhuakuapiringa ióntki anapu k’uiripuechani, ima uékasïrendi eska juchantsïntu jarhuatapiringa (1 Korintu 10:11). Ka ísïisti, “jimboka iámindu ambe enga ióntki [karakuarhipka], karakata jarhaska parajtsïni jorhendani, para eska Diosïri karakatechani jimbo jucha tekaantskua jatsiaka ka uinhapini korokanchi ka ísï ambakiti ambe erokanchi” (Roma 15:4).

•   Jesúsi ka imeeri chúxapatichaksï úraaspti máru kopiechani Karakata Ebreaecheri ka nóksï méni uandaspti eskaksï mójtakunhaspka (Lukasʌ 4:16-21; Ukuecha 17:1-3).