Biblia ma xanharkusï uandajti tatuajicheri ambe ixú Levítico 19:28 jimbo, enga arhijka: “Asï úrhikuarhia je tatuajichani”. Tata Diosï íni juramukua íntsaapti israelitechani jimboka no uékasïreenga eskaksï ísïipiringa eska máteru ireteecha engaksï úrhikuarhienga nombrichani o ambe ma enga imeecheri diosïchani arhikuekeenga (Deuteronomio 14:2). Nájkiruka Tata Diosï israelitechani íntsaapka ini Leini, kánikua marhuakuasïndi kristianuechani ambe enga jorhentpijka i juramukua.

¿Sési jarhaski eska kristianu ma úrhikuarhini auaka tatuajichani

 Ju je exeani máru Bibliarhu anapu tekstuechani engajtsïni jarhuataaka míteni ambe úni.

•   Eskaksï “uarhiiticha sési xukuparhaaka [...] para eskaksï xarhataaka eskaksï eratsekua jukaska ka kaxumbitinksï” (1 Timoteo 2:9). I tekstu ístu marhuasïndi para tatakecha. Kristianu ma no jatsisti para úni ambe ma paraksï imantku exeni jarhani ka ni para no sési pʼikuastaani máteruechani

•   Máruksï úrhikuarhiasïndi tatuajichani paraksï xarhatani na engaksï jásïika o paraksï libri pʼikuarherani, ka xarhatani eskaksï úsïnga úni ambe engaksï uékaka imeecheri kuerpu jingoni. Joperu, Biblia arhiasïndi kristianuechani: “Íntskunta je Tata Diosïni chaari kuerpuechani ka chaari tsípikuani komueska pímbinhasï kéjtsïtakua ma, ísï eska Tata Diosï na jaiapanhentajka ka ísï úparini chaari eratsekua jingontsï marhuakuni jauaka Tata Diosïni” (Roma 12:1). “Eratsekua jingoni” o jorhenani sési eratseni, uaati jarhuatani nemani para míteni andisï uékani jaki tatuaji ma úrhikuarhini. Por ejemplu, jimbokaksï uánikuecha ísï úsïnga o para xarhatani eska grupurhu ma jarhaska. Enga ísïika sési japirindi kurhamarhikuarhini: “¿Ambe uaa enga nitamaakia inde moda o engani nóteru uékaakia indeni tatuajini?”. Engachi sési eratsentaska ini ambe, uákachi sési erakuni ambe úni (Proverbios 4:7).

•   “Sési nikuati imani enga ánchikuarhirika enga sési eratsentaaka ambe enga uaaka; joperu ima enga jirejiresï uaaka ambe ma, niáraati pobri pakarani” (Proverbios 21:5). Sáno iámindu imeecha engaksï tatuaji ma úrhikuarhijka jirejiresïksï úsïndi ini ambe ka nóksï orheta sési eratsekuntani. Peru ima enga erakuaka ini ambe úni, jamberi ióni no sési úkuaati. Jimboka no uaaka iáminduecha jingoni sési pájperani o sóntku exentani ánchikuarhita ma. Ístu, para tatuaji ma borrarini, pʼamesïndi ka kánikua jukaparhakua uérasïndi. Uánikua kʼuiripuechaksï tátsekua pʼamondakuarhisïndi engaksï tatuaji ma úrhikuarhijka. Ka ambe ma enga xarhatajka eska ísïiska, jindeesti engaksï imeecha engaksï borrariuajka tatuajichani sánderuksï ánchikuarhita jatsiskia.