Uánikua tumbiichaksï uandasïndi eskaksï kómarhisïnga joperu no pauani pauani. Ka jamberiksï máru kurhamarhikuarhijti: “¿Jindeeski kómarhikua ambe ma enga marhuajka solu parani sési pʼikuarherani?”.

•  ¿Ambe arhikuekasïni kómarhini?

•  ¿Merurini kurhajki Tata Diosï?

•  ¿Ambe ka amberi uaa kómarhini?

•  Ambe engaksï uandajka máteru tumbiicha

 Kómarhini jindeesti uandontskuarheni Tata Diosï Jeoba jingoni, ima enga kueraaka iámindu ambe enga jaka. Eratsi ini ambe: nájkiruka ima iauani sánderu k’éri ambeeka eska jucha, ima no iauani jarhasti juchantsïni jingoni (Ukuecha [Hechos] 17:27). Ka Bibliajtsïni arhisïndi i ambe: “Andarhiera je [Tata] Diosïni ka imajtuksïni andarhieraati chánksïni” (Santiagu 4:8).

 ¿Nénari uaa andarhierani Tata Diosïni?

•   Kómarhi. Jimboka ísïri uandontskuarhesïnga imani jingoni.

•   Bibliani arhinta. Jimboka Tata Diosï úrasïnga Bibliani parakeni uandajpani.

 Engari úska i tsimani ambe, jarhuataatikeni parari Tata Diosïri amigueni.

 “Uandontskuarheni Tata Diosï Jeoba jingoni, ima enga Sánderu k’éri ambeeka, sánderu k’éri kóntperata máesti enga kʼuiripu ma uaaka jatsini” (Jeremy).

 “Aiangukuarhini Tata Diosï Jeobani na engani pʼikuarherajka, úsïndi eskani sánderu andarhieraaka imani” (Miranda).

 Nájkirukari jakajkuaka Tata Diosïni o kómarhini, jamberiri úkua jukanchajka eratseni eskakeni ima meru kurhaaxaka. Peru Biblia uandasïndi eska Tata Diosï Jeoba jindeeska ima enga kurhauajka kómarhikuechani (Salmo 65:2). Asta uandasïndi eskari aiangukuarhiaka iámindu ambe engakeni uandanhiatani jaka. ¿Andi? Jimboka Tata Diosï pendienti pásïndi tʼungini jimbo (1 Pedru 5:7).

 Eratsi i ambe: ¿Someniri uandontskuarhesïni chiiti amiguecha jingoni? Uaakari májkueni úni Tata Diosï jingoni. Someni uandontskuarhiku ka úra imeeri nombri enga jindeeka Jeoba (Salmo 86:​5-7; 88:9). Ka Bibliakini arhisïndi eskari méntku jauenaaka kómarhini (1 Tesalonika 5:​17).

 “Kómarhini jindeesti uandontskuarheni juchiiti Taati auandarhu anapu jingoni ka aiangukuarhisïnga ambe engani eratsejka ka pʼikuarherani” (Moises).

 “Aiangukuarhisïnga Tata Diosï Jeobani ambe enga jukaparhakueka para ji ísï eska na uandontskuarhikujka juchiiti nándini ka juchiiti ambakiti amiguechani” (Karen).

 Biblia uandasïndi: Tata “Diosïni kómarhi je, ka kurhakuntsï ambe engajtsï uétarhinchajka, diosmaiamukua arhiparini Diosïni iámindu ambe jimbo” (Filipusʌ 4:6).

 Jimajkani, ¿arhikuekasïni i ambe eskari uaaka aiangukuarhini chiiti problemechani? ¡Jo! Bibliajtsïni ísï arhisïndi: “Tata Diosï Jeobani jurajkuku chiiti uandanhiata ka imakeni jarhuataati” (Salmo 55:22).

 Joperuri no jatsipiringa parari solu chiiti problemecheri ambe uandontskuarhikuni. Uátsï ma enga Chantelle arhinhajka, uandasïndi: “No xáni ambakiti Jeobaeri amiga máepiringa engani solu kómarhipiringa para jarhuajperata kurhakuni jarhani”. Ístu uandasïndi: “Ji exesïnga eska ambe engachi orheta jatsika para úni, jindeesti diosmaiamukua arhini ka jarhasti uánikua ambe engachi jimbo jatsika para diosmaiamukua arhini”.

 Eratsi i ambe: ¿Ambe ka ambe jimbori uékasïni diosmaiamukua arhini Tata Diosï Jeobani? Eratsi tanimu ambe engari jimbo iásï uaaka diosmaiamukua arhini.

 “Asta sapichitu ambe uaati úni eskachi uékaaka kómarhini Tata Diosï Jeobani para diosmaiamukua arhini komu engachi exejka sési jásï tsïtsïki ma” (Anita).

 “Eratsenta Bibliarhu anapu karakata ma engari kánikua tsitijka o máru ambe enga Tata Diosï Jeoba kueraaka ka engakeni ísku pakatajka ka diosmaiamukua arhi indeni ambe jimbo” (Brian).