TUMBIICHAKSÏ KURHANGUARHISÏNDI
¿Jatsipirini parani nóteru nirania eskuela?
“No sáni tsitisïnga nirani eskuela”. ¿Ménisïri ísï pʼikuarheraski? ¿Ménisïri eratseski jurajkuni? ¿Ambe máteru amberi uá úni? Seguiri arhintani ka exeakari ambe engari uáka úni.
Andiksïsï máru nóteru nirajkia eskuela
Ima kʼuiripuecha engaksï mítekuka íri ambe, uandasïndiksï eskaksï i jindeeska máru ambe engaksï jimbo nóteru nirajkia:
No úni sóntku jorhenguarhini. “No úsïnga sési petaani kalifikasionichani”.
No jánguarhintani. “Ambe engani jorhenguarhini jaka nóri marhuachiaati”.
No jatsini tumina. “Jatsiska parani ánchikuarhini parani jarhuatani juchiti familiani”.
Eratsenta ambe enga uáka úkuarhini
Biblia arhisïndi: “Ima enga jánhastiika jingontku exesïndi ambe uá” (Proverbios 14:15). ¿Amberi jorhenguarhisïni? Engari nóteru uékaakia nirani eskuela, orhetari jatsiska para sési eratsentani ambe enga uáka úkuarhini chíti tsípikua jingoni.
Kurhamarhikuarhi:
Engani no kʼamaraaka eskuela, ¿uá exeni ánchikuarhita ma?
“Eratsenta eskari ma jurhiani jatsiaka para jirinhani ánchikuarhita ma ka eskari jamberi jatsiaka para familiani ma kéndani. ¿Nénari jámaa jimboka sáno iámindu ánchikuarhitecharhuksï kurhajkuarhisïnga eskari sikiera sekundaria o bachiieratu kʼamaraaka?” (Julia).
Engani iásï no jánguarhintaska, ¿néna jámaa engani sánderu orhepani niáraaka jatsiani máteru járhati uandanhiatechani?
“Eskuelakini jarhuataati chíti tsípikuarhu. Ambe engari iásï nitamanchajka —kʼuiripuechani míteani, tsʼéjkukuechani jatsiani, ánchikuarhita ambe— indeni mismu ambe jingondisï jatsika para orhepani uérani sánderu orhepani” (Daniel).
Engani nóteru niraskia eskuela, ¿jorhenaa úni imani ambe engani jiáni uétarhinchaaka engani na kʼéakia?
“Jamberiri iásï eratsejka eskakini no ambe marhuachiaka ambe engari jorhenguarhini jaka eskuelarhu, joperu jiáni engari 23 jatiriuakia ka uékandi sési úrani chíti sentabuni, uandaakari: ‘Xáni sési engani jorhenguarhika sumarini ka restarini’” (Ana).
Uákari arini ambe úni
Jirinha jarhuajperata. Biblia arhisïndi: “Engaksï uánikua arhistatspitiicha jarhajka sési uérasïndi ambe ma” (Proverbios 11:14). Engari no sési petaani jaka kalifikasionichani, uandontskuarhi chíti táticha jingoni, maestru ma jingoni o máteru nema jingoni engari t’u mintsinharhijka parakeni jarhuatani.
“¿Andiresï no uandontskuarhejki chíti maestru jingoni? Jamberiri eratsejka eska imeri kulpeeska, joperu engari uandontskuarhekuska ka arhindi eskakeni jarhuataaka, jamberikeni jarhuataati” (Edward).
Sési eratsenta iámu ambe. Biblia arhisïndi: “Sánderu sésisti enga ambe ma kʼamarajka eska enga uénajka” (Eclesiastés 7:8). Engari kʼamarakia eskuela, sánderuri ambakiti kualidadichani jatsiauakia ka ísturi jorhenaakia jukaparhakua ambe engakini jarhuataaka chíti tsípikuarhu.
“Jamberiri sánderu orhepani no jatsiaka para estudiarini eksameni ma jimbo ni parari tarea ambe íntspintani, joperu na engari orhepani uérakuauaka problemechani eskuelarhu, jarhuataatikini para jiáni engari na kʼéakia” (Vera).
Nóteru nirania eskuela, ísïsti komueska barkurhu ma kétseni antede niárani jima engaksï barkuecha niántajka. ¡Pʼamondakuarhiakari engari kétseaka barkurhu!
Jati máteru ambe engari uáka úni. Biblia arhisïndi: “Ima enga jirejiresï uáka ambe ma, niáraati pobri pakarani” (Proverbios 21:5). Asï jirejiresï eratsi eska nóteru nirani eskuela sánderu sésiuaka. Jamberiri uáka Interneti jimbo kʼamarhukuni o programa jimbo desde kʼumanchikuarhu uératini.
“Engari eskuela jámani jarhajka, jorhenguarhisïngari jánguarhintani, sési peentaani uandanhiatechani ka máteruecha jingoni ánchikuarhini. Ka i ambekini méntkisï marhuachiaati. Ísï jimbo, sési jarhasti kʼamarhukuni eskuela” (Benjamín).
Para kʼamarani: Engari kʼamarhukuska eskuela, sánderuri uánikua ambe jorhenguarhiaka engakini jarhuataaka chíti tsípikuarhu.