“Jánguarhintaskia Bibliani arhintani, peruni kuatantasïnga jimboka jukari ambe uandasïnga” (Briana enga 15 jatiriika).

 ¿Tʼujturi májkueni eratsesïni? I jorhenguarhikuakini jarhuataati.

•  ¿Andisï jukaparhakue Bibliani arhintani?

•  ¿Néna uaa ueenani Bibliani arhintani?

•  Ambe engaksï uandajka máteru tumbiicha

 ¿Exesïniri eska kuatantskuarhesïnga Bibliani arhintani? Kurhanguchesïngaksïni. Jamberiri ísï exejka Bibliani komu libru ma enga uánikua pájinechani jukaaka, sapirhati letrecha jingoni ka no ma dibuju jingoni. Peru kʼóru ménderuenisti teleni o bideuechani exeani jarhani Internetirhu, ¿no ísïiski?

 Peru iásï eratsi ini ambe: engari tesoru jatakua ma exentapiringa, ¿no ísïiski eskari uékapiringa sóntku mítani parari exeni ambe enga xáni jataka?

 Biblia ísïisti komueska inde tesoru jatakua. Jiminiri uánikua jukaparhakua ambe jorhenguarhiaka engakeni jánhastaaka parari ini ambe úni:

•   Parari úni imani ambe engakeni jimbo sési nicheaka.

•   Parari sési pájperani chiiti taaticha jingoni.

•   Parari ambakiti amiguechani jatsiani.

•   Parari no xáni uandanhiani.

 Peru, ¿nénajtsïni uaa jarhuatani libru ma enga xáni ióntki anapuekia? Jimboka ‘iámindu Diosïri Karakata, Diosïni jimboeska’ (2 Timoteo 3:16). I ambe arhikuekasïndi eska ima engajtsïni Bibliani jimbo arhistachijka, jindeeska ima enga sánderu jánhaskatiika iámu parhakpinirhu.

 Ma ambe engari uaaka úni jindeesti desde ueenakuarhu arhintani asta kʼamarani. I ambekini jarhuataati parari míteni ambeeski enga Biblia sánderu uandajka. Ixúksï jarhasti tsimani ejempluecha na engari uaaka Bibliani arhintani:

•    Uaakari 66 Biblieri libruechani arhiantani ísï eskaksï na jaka, Génesis ueenani asta Jaŋaskuecha (Apocalipsis) jamberi.

•    Uaakari arhintani Bibliani ísï eska na úkuarhipapka iámindu ambe.

 Ambe engari uaaka úni: Bibliarhu Traducción del Nuevo Mundo, Apendise A7 jimbo, uaakari exeni lista ma enga uandajka na enga úkuarhipapka máru jukaparhakua ambe enga Jesúsi úpka jiáni enga Echerirhu japka.

 Máteru ambe engari uaaka úni, jindeesti arhintani imani ambe engakeni jarhuataaka parari orhepani uérakuni uandanhiatani ma. Komu ari ambe:

•   ¿Uékapiriniri ambakiti amiguechani jatsiani engari uaaka mintsikaani? Jiájkani, arhinta Dabidi ka Jonataniri ejemplu (1 Samuel kapitulu  18 a 20). Ka exe imani ambakiti ambe enga Dabidi xarhatenga engaksï jimbo xáni ambakiti amiguepka Jonatani jingoni.

•   ¿Uékapiriniri sánderu tekaantani tsʼéjkukuechani? Arhinta Génesis kapitulu 39 ka exe bideuni “Jeoba seguirispti ambakiti uékperakua xarhatani”, jiminiri jorhenguarhiaka na enga José úpka tsʼéjkukuechani tekaantani ka ambe engari uaaka jorhenguarhini imeeri ambe.

•   ¿Uékapiriniri míteni nénakini marhuachesïni kómarhini Tata Diosïni? Arhinta Nehemías kapitulu 2 ka exea bideuechani “Neemiasi: Tsípikuarhita enga Jeobani jimbo jurhajka jindeesti juchaari uinhapikua”, parti 1 ka parti 2. Jiminiri jorhenguarhiaka na enga Neemiasi mintsita jingoni kómarhienga.

 Ambe engari uaaka úni: Engari uékaaka Bibliani arhintani, jirinha nani engakeni no ma ambe ójkutaaka.

 Máteru ambe engari uaaka úni parari Bibliani arhintani, jindeesti jirinhani nemeeri ejempluni o salmo ma, ka engari na arhintakia, eratsenta nénakini uaa jarhuatani. Engari na kʼamaraakia arhintani, kurhamarhikuarhi ari ambe:

•    ¿Andisï úpi Tata Diosï Jeoba eska i ambe Bibliarhu karakata japiringa?

•    ¿Amberini jorhendasïni na enga jásïika Tata Diosï Jeoba ka na enga újka ambe ma?

•    ¿Nénarini uaa jarhuatani juchiiti irekuarhu ambe engani iáiasï arhintaka?

 Ambe engari uaaka úni: Jánguarhinta para úni ambe ma. Pori ejemplu, uaakari fechani ma karani parari ueenani Bibliani arhintani, úraparini “Programa para Bibliani arhintani” enga jaka juchaari pájinarhu Internetiri.