TUMBIICHAKSÏ KURHANGUARHISÏNDI
¿Ambe uá engani no úska iáminduecha jingoni terupakuni?
“Engari no májkuenijka eskaksï máteruecha, nori jatsiasïnga amiguechani, nori tsípikua jingoni irekasïnga níjtukini sési nichejki. Jandiajkuri pakarasïnga ka nókini nema uandanhiasïndi” (Carl).
¿Jukari jamberi uandani jaki? Jamberi jo. Joperu uánikuaksï niárapirindi ambe uéjki úni paraksï no indeni ambe nitamanchani enga Carl uandajka. Ka tʼuia, ¿úpirindi ambe uéjki parari májkuenini eska máteruecha? I artikulukini jarhuataati parari mejori máteru ambe úni.
¿Andichisï uéjki terupakuni máteruecha jingoni?
Jimbokachi no uékasïnga eskaksï máteruecha no uékaaka juchantsïni jingoni kúnguarhini. “Interneti jimbo, exeaspka máru fotuechani máru amiguecheri engaksï tánguarhintapka para uérani sáni, joperujtsïni no pʼímarhispti. Uénaspka eratsini eskani no sési ambe úxapka... ambe engantkuni eratsienga, jindespti eskaksï no tsitisïrenga jíndeni jingoni kúnguarhini” (Natalie).
ERATSI I AMBE: ¿Ménisïri niáraski ísï pʼikuarherani enajkiksï máteruecha no uéjki tʼunguini jingoni kúnguarhini? ¿Úspiri ambe ma paraksï ima uékani tʼunguini jingoni kúnguarhini?
Jimbokachi uékasïnga májkuenini eska máteruecha. “Juchiti tátichajtsïni no jiárhetasïndi parani telefuni ma kámani. Jiáni engajtsïni juchiti kompanieruecha kurhachejka juchiti númeru ka ji arhiani eskani no kámasïnga, arhisïndijtsïni: ‘¿Ambe? ¿Andiri na xáni jatiriski?’. Ji arhiasïnga eska 13 ka imajtsïni lástima jingoni eratesïndi” (Mary).
ERATSI I AMBE: ¿Ambe engaksïni chíti táticha no jiárhetajka úni úsïni eskari ísï pʼikuarheraaka enajkiri no májkuenii eskaksï máteruecha? ¿Amberi úsïni parakini i ambe no no sési pʼikuastani?
Jimbokachi no uékasïnga eskajtsïni teresmarhuaka. “Juchiti kompanieruechaksï ikiakuasïndi imechani engaksï ménderueni jámajka, engaksï ménderueni uandajka o engaksï máteru ambe jakajkujka. Engari no májkueniuaka eskaksï máteruecha, iáminduksïni teresmarhusïndi” (Olivia).
ERATSI I AMBE: ¿Ménisïri niáraski ísï pʼikuarherani enajkiksïni no sési kámajki jimbokari ménderueniska ka jimbokari no terupakuasïnga? ¿Amberi úsïni jiáni engari indeni ambe nitamanchajka?
Jimbokachi no uékasïnga tsïtaani juchari amiguechani. “Jánguarhintasïrenga terupakuani imechani engani jingoni kúnguarhienga. Ji no xásïspka níjtuni ísï uandeeni. Úsïrenga terekuarhini imani ambe jimbo engani ji no terekuarhipiringa. Ka engaksï teresmarhuenga nemani, jíjtuni májkueni úsïrenga, nájkirukani mítetini japka eskani no sési pʼikuaspesïrenga” (Rachel).
ERATSI I AMBE: ¿Kánikua jukaparhakueski para tʼu eskaksïni chíti kompanieruecha uékaaka? ¿Ménisïri niáraski no ísïini eskari tʼu na jásïika nomasi parari terupakuani máru kʼuiripuechani?
Ambe engari jatsika para míteni
Uékani májkueni jámani eska máteruecha no sési uérasïndi. ¿Andi? Jimboka xarharasïnga enga nema no xásïijka. Brian, tumbi ma enga 20 jatirika, uandasïndi: “Sánderuni no úsïrenga sési pájperani juchiti kompanieruecha jingoni engani máteru nemeeni jámenga ka no ísï eskani ji na jásïika”. Ka ístu uandasïndi: “Kuenta íntskukuarhispka eska sánderu sésisïnga ísïini eska ma na jásïika, jimboka kʼuiripu mítesïnga engari máteru nemeeni jámani jarhajka”.
AMBE ENGA SÁNDERU SÉSI JAKA: Exekuarhi ambe sánderu jukaparhakua ambeski para tʼu. Biblia arhisïndi eskachi exeaka ambe sánderu jukaparhakua ambeski (Filipusʌ 1:10). Ísï jimbo, kurhamarhikuarhi: “¿Ambe sánderu jukaparhakueski? ¿Terupakuani imechani engaksï no májku jásï jángua ma jatsika eskani ji o ísïini eskani ji na jásïika?”.
“Para no ma ambe marhuasïndi uékani ísïini eskaksï máteruecha. Kʼuiripukini no sánderu uékaati niri sánderu ambakiti kʼuiripueua engari ísï úska” (James).
Uékani máteruechani terupakuani, uáti úni eskari no ísïiuaka eskari tʼu na jásïika. Niáraakari kʼuiripu máeni enga nomasi uékani jarhajka eskaksï máteruecha jaiapanhintaaka ka enga ísïijka eskaksï máteruecha na uéjka. Tumbi ma enga Jeremy arhinhajka, uandasïndi: “Uékasïrenga ambe uéjki úni parani terupakuani máteruechani, ni uandanhiaueni ambeksï uandapirini juchiti ambe”. Tátsekua uandasïndi: “Jurajkutakuarhisïrenga parajtsïni máteruecha arhini ambe úni ka uandani”.
AMBE ENGA SÁNDERU SÉSI JAKA: Mía chíti ambakiti jánguani ka asï mójtaku ambe engari tʼu eratsijka nomasi parari terupakuani máteruechani. Biblia sési ambe jorhentpesïndi enga arhijka: “Asï no sési jásï ambe niáta sólu jimbokaksï sáno iámindu kʼuiripuecha ísï úxaka” (Éxodo 23:2, La Palabra de Dios para Todos).
“Jánguarhintasïrenga tsitini iámindu ambe engaksï imecha tsitienga: kústakua ambe, chʼanakua ambe, takusï ambe, telebisioniri programechani, makiiaje ambe... Uékasïrenga ísïini eska imecha. Joperuksï péringa kuenta íntskukuarhipka eskani ji no xásïispka. Buenu, iáminduechaksï kuenta íntskukuarhispti. Astani ji jamberi. Niáraspka jandiajku pʼikuarherani, kánikua no sési ka niteruni mítepia néspi ji. Nóteruni mítespkia ambe eratsesïreni o ambe tsitisïreni. Jorhenguarhiska eskani no uáka iáminduechani terupakuani ka ístu eskajtsïni no iáminduecha uékaaka. Ísïsti, inde ambe no arhikuekasïndi eskari no uáka amiguechani jatsiani, joperuri jatsiska para tiempu íntskukuarhini parari sánderu jánhaskatiini” (Melinda).
Uékani máteruecha jingoni terupakuni uáti úni eskari ménderueni jámaaka. Tumbi ma enga Chris arhinhajka exesti eska i ambe ísïska enga exepka ambe enga úkuarhinchapka primu jemba. Chris uandantasïndi: “Uénaspti imani ambe úni enga no méni úpiringa, komu droga ambe kámani”. Ka uandasïndi: “Bisiu ma úspti ka sáno niáraspti no sési kʼamarukuni”.
AMBE ENGA SÁNDERU SÉSI JAKA: Asï kúnguarhi imani kʼuiripuechani jingoni engaksï no sési uandajka ka engaksï no ambakiti jángua ma jatsika. Biblia arhisïndi: “Ima enga mímixetichani jingoni jámani jaka, mímixeti úkuarhiati, peru ima enga no ambarhatichani jingoni jámajka no sési nikuati” (Proverbios 13:20).
“Ménisï sési jarhasïndi eska ma uáka ambe ma para úni terupakuni máteruecha jingoni. Joperu asï imani ambe ú engari míteka eska no sési jarhaska. Ima kʼuiripuecha engaksï ambakiti amigueka para tʼu, jaiapanhintaatiksïni ísï eskari tʼu na jásïika” (Melanie).
AMBE ENGARI UÁKA ÚNI: Engari uékaaka nemani andarherani parari amigu úkuarhini imani jingoni, asï imechantku exea engaksï májku jásï ambe tsitijka eska tʼu. Imechani jirinhaa engaksï májkueni eratsijka eska tʼu, komu tsitini Bibliaeri ambe jorhenguarhini, uékani ambakiti jángua ma jatsini ka jurhimbitku jámani.
Ísï eskakini na no iámindu jásï takusï pakarachejka, no iámindu kʼuiripuechaksïni uáti jarhuatani parari ambakiti kʼuiripu máeni.