•  ¿Na jásïri kʼuiripu máeski?

•  ¿Andisï jukaparhakue?

•  Ambe engari uáka úni

•  ¿Uékasïniri sánderu ambe míteni?

•  Ambe engaksï uandajka máteru tumbiicha

•   Ima enga méntkisï ambakiti ambe eratsejka

   “Jánguarhintasïnga pauani pauani sési ka tsípikua jingoni irekani” (Valerie).

•   Ima enga méntkisï eratsejka eska no sési ambe úkuarhiaka

   “Enga ambe ma sési uérani jaka, jirejiresï eratsesïnga eska no sési jarhaska ambe ma o eska no uáka ísï úkuarhini” (Rebeca).

•   Ima enga ísï eratsejka eska na jindeka

   “Engari méntkisï ambakiti ambe eratseska, niárasïngari kánikua no sési pʼikuarherani enga ambe ma no sési uérajka. Ka engari méntkisï eratseska eska no sési ambe úkuarhiaka, niárasïngari kánikua no sési pʼikuarherani. Peru ísï eratseni eska na jindeka, jarhuatasïndirini parani ísï exeni ambe ma eska na jindeka” (Ana).

 Biblia uandasïndi eska “ima enga ambakiti mintsita ma jataka, méntkisï kʼuínchikua ma” jatsisïnga (Proverbios 15:15). Xarharasïndi eska ima kʼuiripuecha engaksï jánguarhintajka no eratseni imani ambe enga no marhuajka, niárasïngaksï ambakiti ambe eratseni ka tsípikua jingoni irekani. Ístu, sánderuksï uáni amiguechani jatsiasïndi. Jimboka, ¿né tsitisïni imecha jingoni kúnguarhini engaksï iámindu ambe no sési exejka?

 Nájkiruka ísïka, asta ima kʼuiripuecha engaksï méntkisï ambakiti ambe eratsejka, jatsisïndiksï para orhepani uérakuni máru ambe. Por ejemplu:

•   Notisiechaksï solu aianhpesïndi guerrecheri ambe, atajperakueri ambe ka no sési jásï ambe.

•   Iámindu familiechaksï jatsiasïndi uandanhiatechani.

•   Iáminduechachi jatsisïnga para jánguarhintani jimbokachi kʼamanharhintstiska.

•   Ménisïjtsïni juchari amiguecha niárasïndi no sési pʼikuastani.

 Enbesi deri ísï eratseni eska i ambe no úkuarhisïnga o ísturi méntku ini ambejku eratsentani jarhani engakini jamberi uáka no sési pʼikuastani, sánderu sési jánguarhinta ísï exeni iámindu ambe eska na jindeka. Engari ísï úska, nori eratseaka imani ambe engakini no marhuachiaka ka nori niáraaka xáni no sési pʼikuarherani imani ambe jimbo engari nitamakuarhiaka.

•   Ísï exe eska na jindeka imani ambe engari no újka úni.

   Biblia uandasïndi: “Jimboka no ma kʼuiripu jarhaska echerirhu enga jurhimbitiika ka enga méntkisï ambakiti ambe úni jauaka ka no pekarini” (Eclesiastés 7:20). Engari ménisï niáraska jerarikuni ka no iámindu ambekini sési uérachini, arhikuekasïndi eskari kʼuiripu máeska ka no nema enga méntkisï iámindu ambe enga no sési ambe újka.

   Ambekini jarhuataa para ísï exeni ambe ma eska na jindeka: Jánguarhinta sési úni ambe ma, peru asï eratsi eskakini iámindu ambe sési uérachiaka. Tumbi ma enga Caleb arhinhajka, uandasïndi: “Jánguarhintasïnga no xáni eratseni imani ambe engarini no sési uérachika”. Ístu uandasïndi: “Sánderu sési, jánguarhintasïnga jorhenguarhini imeri ambe parani máteru jimbo sánderu sési úni ambe ma”.

•   Asï terukukuarhintsï máteruecha jingoni.

   Biblia arhisïndi eskachi no jatsiska para juchajku pendienti pákuarhini ka níjtu “jámani ikiatsperani ka níjtu tsititspini [ambe ma]” (Galasia 5:26). Engari redesi sosialicharhu méntku exeani jauaka fotuechani engaksï xarhatajka ambe engaksï úka máteruecha ka engaksïni no pʼímarhipka tʼunguini, niáraakari kómu pʼikuarherani. Jamberiri niáraaka eratseni eskaksï chíti amiguecha no xáni ambakiti amigueska.

   Ambekini jarhuataa para ísï exeni ambe ma eska na jindeka: Kurhangu eskaksïni no méntkisï pʼímarhiaka. Ístu, miá eska ambe enga máteru kʼuiripu karhatajka redesi sosialicharhu, no xarhatasïndi na engamindu irekajka ima kʼuiripu. Uátsï ma enga Alexis arhinhajka, uandasïndi: “Redesi sosialicharhu, kʼuiripu solu xarhatasïndi ambakiti ambe enga nitamakuarhika”. Ka tátsekua uandasïndi: “Kʼuiripu no karatasïndi pauani pauani anapu ambe”.

•   Jánguarhinta paraka pínandikua jauaka, sánderia chíti familiarhu.

   Biblia uandasïndi: “Chári parti jimbo jánguarhi je eskajtsï xáni uáka sési pájperani iámindu kʼuiripuechani jingoni enga újka ísï úkuarhini” (Roma 12:18). Nori úsïnga pʼínguni ambe engaksï máteruecha újka, peruri kʼóru uáka erakuni ambe engari uáka tʼu. Chíti jimbo pakarasïndi engari uéjka eska jauaka pínandikua.

   Ambekini jarhuataa para ísï exeni ambe ma eska na jindeka: Jánguarhinta úni eska pínandikua jauaka ka no úni eska chíti familiarhu sánderu uandanhiata ambe jauaka májkueni eskari na úpiringa máteru kʼuiripu jingoni. Uátsï ma enga Melinda arhinhajka, uandasïndi: “Iáminduechachi kʼamanharhintstiska. Iáminduechachi niárasïnga ménisï no sési pʼikuastpini”. Ka ístu uandasïndi: “Ambe engachi kʼóru jatsika para erakuni jindesti ambechi uá, eska pínandikua jauaka o nómbe”.

•   Jorhenguarhi jukaparharani ambakiti ambe engari jatsika.

   Biblia uandasïndi: “Méntku jauena je diosmeiamukua” arhijpini (Kolosasi 3:15). Pʼindeni diosmeiamukua arhijpini, jarhuataatikini parari sánderu eratseni imani ambakiti ambe engari nitamakuarhijka ka no imani ambe engari ísï exejka eskakini no sési uérachexaka.

   Ambekini jarhuataa para ísï exeni ambe ma eska na jindeka: Ísïsti eskari jatsiaska uandanhiatechani peru asï indeni ambejku exe, ístu exe imani ambakiti ambe engari nitamakuarhijka. Uátsï ma enga Rebeca arhinhajka, uandasïndi: “Mándani pauani karasïnga ambakiti ambe ma engani nitamakuarhika”. Ka ístu uandasïndi: “Tsitisïnga miáni eska sáno méntkisï, jatsisïnga ambakiti ambe engani uáka eratsentani”.

•   Exe na engaksï jásï kʼuiripueka chíti amiguecha.

   Biblia uandasïndi eska enga ‘nema kúrhiaska no sési úrichani, ikichakua úkuarhiakaksï imeri ambakiti úkuecha’ (1 Korintu 15:33). Engari kúrhiaska imechani engaksï arhinchpijka, engaksï úraajka uandakuechani para no sési pʼikuatspini ka engaksï méntkisï kómu pʼikuarherani jarhajka, tʼujturi niáraaka ísï jámani eska imecha.

   Ambekini jarhuataa para ísï exeni ambe ma eska na jindeka: Engaksï chíti amiguecha no sési ambe nitamakuarhini jauaka, jamberiksï niáraati uandauandameni ka kánikua kómu pʼikuarherani. Jarhuataa peru asï jurajku eskaksïni imecheri uandanhiatecha tʼunguini no sési pʼikuastaaka. Uátsï ma enga Michelle arhinhajka, uandasïndi: “No sési jarhasti jatsiani amiguechani engaksï méntkisï imani ambe eratsejka enga no sési pʼikuastaajka”.

 Biblia uandasïndi eskachi irekaxaka jurhiatikuecha jimbo engaksï kánikua úkua jukaka (2 Timoteo 3:1). ¿Úkua jukanchasïniri ambakiti ambe eratseni ini parhakpini jimbo enga xáni no sési jánhaskuarhini jaka? Engari uéjka sánderu ambe míteni, arhinta jorhenguarhikuani “¿Andisï xáni kómu nitamakua ambe jaki?”.