•  ¿Andisïni jatsipirini para ejersisiu úni?

•  ¿Andisïni no újki ejersisiu?

•  ¿Amberini jarhuataa ejersisiu úni parani no pʼamenchani?

•  Séskisï ú ejersisiu

•  Ambe engaksï uandajka máteru tumbiicha

 Máru paisicha jimbo, uánikua tumbicha ka ístuksï uátsïcha, nóteruksï xáni ejersisiu úsïndia ka i ambe úsïndi eskaksï niáraaka pʼamenchani. Jimbosï Biblia uandajti eska marhuasïnga ejersisiu úni (1 Timoteo 4:8). Eratsi ini ambe:

•   Ejersisiu úni, úsïndi eskari sánderu sési pʼikuarheraaka. Ejersisiu ambe úni, úsïndi eskaksï juchari serebru jimbo úkuarhiaka máru ormonecha (endorfinas), engaksï újka eskari sési ka tsípini pʼikuarheraaka. Máruksï uandasïndi eska ejersisiu úni, jarhuatasïngakini parari no kómu pʼikuarherani jarhani.

   “Engani orheta uiriini nirajka tsípechani, sánderuni uánikua ambe úsïnga ka sánderuni sési pʼikuarherasïnga. Uiriini, úsïndi eskani tsípikua jingoni jámaaka” (Regina).

•   Ejersisiu úni, úsïndi eskari sánderu sési xarharaaka. Ejersisiu ambe úni úsïndi eskari sánderu uinhapiti pʼikuarheraaka, sánderu sési ka eskari seguru pʼikuarheraaka.

   “Kánikua sésisti úni 10 xanhari tʼiriamitakuarhini. Jiniani uéxurhikua, no úsïrenga ni ma xanhari ísï úni. Ka ambe enga sánderu sésika, jindesti eskani kuidarixaka juchiti kuerpuni” (Olivia).

•   Ejersisiu uáti úni eskari sánderu ióni irekaaka. Ejersisiu ambe úni, úsïndi eska chíti mintsita sési marhuani jauaka ka eskari uáka sési jirejtani. Xanharani, manakuarhini, tsanguarani, uiriini ka máteru ambe úni, úsïndi eska ma no pʼamenchaaka mintsitarhu o eska kolesteroli ambe jauaka mintsitarhu anapu benecharhu, ambe ma enga újka eska uánikua kʼuiripu niáraaka uarhini.

   “Engachi pʼindejka ejersisiu úni, xarhatakusïngachi juchari Kuerajpirini eskachi jukaparharasïnga kuerpuni engajtsïni íntskuka” (Jessica).

 Ambe engachi jorhenguarhijka: Kánikua marhuasïndi ejersisiu úni, ka no solukini marhuachiati para sánderu orhepani sino ístu iásï. Uátsï ma enga Tonya arhinhajka, uandasïndi: “Nori méni uandaaka: ‘andisïni niki xanharani o uiriini’”. Ka ístu uandasïndi eska no méni pʼamondakuarhisïnga enga na újkia ejersisiu.

 Jamberi uánikua ambe jimboeti:

•   Exesïnga eska no jukaparhakueska. “Tumbichaksï ísï exesïndi eskaksï méntkisï iámindu ambe uáka úni jimbokaksï sapichku jarhaska. Nóksï méni eranhaskasïndi eskaksï ma jurhiani niáraaka pʼamenchani. Eratsesïndiksï eskaksï jatirichajkuksï pʼamenchajka” (Sofía).

•   No jatsisïnga tiempu. “Jimbokani méntkisï uánikua ambe úni jarhasïnga, jatsisïnga parani exeni na jandora uá sési tʼireni ka kʼuíni, peru kánikua úkua jukasti tiempu jatsini para ejersisiu úni” (Clarissa).

•   No jatsiska tumina para jimnasiurhu nirani. “Kánikua tumina uétarhisïndi para ma sési xarharani. Jatsiskari para maiampini parari úni jimnasiurhu nirani” (Gina).

 Eratsi ini ambe:

 ¿Ambekini sánderu ójkutasïni tʼunguini para ejersisiu úni? Úkua jukaati orhepani uérakuni indeni ambe engakini ójkutani jaka, peru kánikuakini marhuachiati engari ísï úska.

 Ariksï jindesti máru konsejuecha:

•   Tʼurisï jatsika para pendienti jarhani parari no pʼamenchani (Galasia 6:5).

•   Asï jirinhakunta ambe ma parari no úni ejersisiu (Eclesiastés 11:4). Por ejemplu, no uétarhisïndi eskari meru jimnasiurhu ma niuaka parari uénani ejersisiu úni. Uákari imani ejersisiu úni o chʼanakua ma engari sánderu tsitijka ka pʼindendi ísï úni jarhani.

•   Kurhamarhia máteruechani náki ejersisiuksï úsïni (Proverbios 20:18).

•   Sési eraku na jandorari uá ejersisiu. Eratsi ambe engari uékajka úni ka parari no jurajkuni ísï úni, kara na engakini xáni marhuacheni jaka ejersisiu úni (Proverbios 21:5).

•   Amigu ma jingoni ú ejersisiu. Imakini uáti jarhuatani parari no jurajkuni ejersisiu úni (Eclesiastés 4:9, 10).

•   Niáraakari ménisï ísï pʼikuarherani enajkiri nóteru uáia, peru asï kuatanta (Proverbios 24:10).

 Biblia arhisïndi eskachi jatsiska para ambakiti pʼindekuechani jatsiani (1 Timoteo 3:2, 11). Ísï jimbo, séskisï ú ejersisiu. Imecha engaksï puru ejersisiu ambe úni jarhajka, ísïksï exenhasïndi eskaksï no xáni ambakiti kʼuiripu máeska. Uátsï ma enga Julia arhinhajka, uandasïndi: “Enga tumbi ma sánderu xarhataajka imeri muskuluechani ka eska ambakiti eratsekua ma, para ji, no káni sési jásïsti”.

 Jingontku jáma arini anunsiuecha jingoni engaksï arhijka: “Engari pʼikuarheraska eskari uarhixakaia, 10 xanhari sánderu ú”. Indeni ambe úni, uáti no sési úkuni chíti kuerpuni ka ístu eskari mirikurhiaka imani ambe úni “enga sánderu ambakitika [o jukaparhakua ambe]” (Filipusʌ 1:10).

 Anunsiuechaksïni ístu uáti máteru ambe jimbo no sési úcheni. Uátsï ma enga Vera arhinhajka, uandasïndi: “Uánikua uátsïchaksï kʼuiripuecheri fotuechani patsaasïndi engaksï uéjka májkueni xarharani eska imecha, ka paraksï tsitini ejersisiu úni, imani fotuechanksï exeasïndi. Peru engaksï exeajka imani fotuechani ka imechaksï exekuarhini, no sésiksï pʼikuarherasïndi. Jimbosï sánderu sésiiti eskari jánguarhintaaka para chíti kuerpu sési jarhani ka no eskari solu uékaaka sési xarharani”.