Sáno 145 kilometru (90 millas) nortirhu ísï Nueva York uératini, Wallkill no iauani, jarhastiksï terrenuecha engaksï ísï mítikateka komueska Asienda Watchtower. Íksï terrenuecha kánikua jarhuajpisti imani ánchikuarhitarhu engaksï Jeobaeri testiguecha újka para jorhentpini Bibliaeri ambe interu parhakpini. Jukari sinkuenta uéxurhinistia enga piánhapka primeru terrenu 2 de eneruni de 1963.

David Walker, enga jima jakaia desde jiájkani, uandantasïndi andisï piánhapi: “Jimbokaksï sánhani arhixapka uánini Jeobaeri testiguecha engaksï sede mundialirhu ánchikuarhienga jini Brooklyn, jatsispkachi para jirinhakuntani néna tʼireraani iáminduecha no xáni tumina úraparini. Organisasioni jatsisptia granja ma estado de Nueva York, peru seisi u ochu ora ísï iauani pakarasïrendi Brooklyn uératini. Ka Wallkill tsimani orajkusï no iauani japti. Úpiringachi ini lugarini úrani”. Jeobaeri testiguechaksï úraspti ini granjani paraksï jatsikuarhini tʼirekua komueska fruta ka berdura, kʼuiripita uákasïri, kuchiiri ka abecheri ka ístu imani ambe enga lechi jimbo úkatejka. Tátsekua, piásptiksï máteru terrenuechani engaksï jima no iauani japka.

Engaksï nitamapkia máru uéxurhinicha, Jeobaeri testiguechaksï úndaspti sánderu uápuru ísï aianhpini, ka i ambe úspti eska ánchikuarhita mójtakurhipiringa jini Wallkill. A parti de úranksï para tʼirekua jatsini, ístuksï úrasïrendia para Bibliaeri publikasionichani uaani: publikasionicha engaksï marhuapiringa para úni jirinhaani disipuluechani enga Jesusi uandapka (Mateu 9:37; Lukasʌ 10:2; Juanu 4:35, 36). Ju je exeani máteru ánchikuarhitechani engaksï úkuarhijka ini terrenurhu.

Imprimirinhasïndi. Siglu XX terujkanisï, sáno iámindu publikasionicha engaksï Testiguecha uáuenga, Brooklyn imprimirinhasïrendiksï. Peru eskaksï na sánderu publikasionicha uétarhienga, i imprenta nóteru andajkuarhisïrendia xáni uáni imprimiriani. Jimbosï 1973 jimbo, Testiguechaksï úpti jimbanhi imprenta ma jini Wallkill. Desde jiáni uératini, uánikua uelta sánderu kʼéri únhantastia imprenta. Ka 2004 únhasti ménderu i ambe.

Programarinhasïndi. Uéxurhini 1979 jimbo, grupu ma Jeobaeri testiguecheri uénasti úni jini Wallkill programa ma para komputadora, enga iásï mítinhaka komueska Sistema Electrónico de Edición Plurilingüe (MEPS, inglés jimbo). Iásï, MEPS úsïndi eskaksï Bibliarhu anapu publikasionicha uáka únhani jukari seisientu idiomecha jimbo.

Kʼumanchikua nani enga Watchtower jorhentpijka. Uéxurhini 1988 jimbo, Bibliaeri Jorhenguarhikua Galaadiri enga Watchtoweririka enga Brooklyn japka, Wallkill móskunhaspti ka 17 de oktubrini ima mísmu uéxurhini, uénasptiksï jarhani klasecha. Ka i eskuela ménderu móskunhasti abrilini de 1995, peru iásï Kʼumanchikuarhia nani enga Watchtower jorhentpijka, enga Patterson (Nueva York) jaka.

Májkueni eska na úkuarhika máteru asiendecharhu, ima ambe enga únhajka ka néna enga ánchikuarhinhajka Asiendarhu Watchtower jimbo, mójtakurhistia últimu sinkuenta uéxurhinichani jimbo. Peruksï seguirixati uinhamu ánchikuarhini para jarhani ambakiti tʼirekua para imecha engaksï ima edifisiuecharhu ánchikuarhijka engaksï Jeobaeri testiguecha jatsiaka jini Nueva York.

Iásï, Testiguechaksï uáxati edifisiuechani para irenhani, para ofisinecha ka ístu máteru járhati edifisiuechani jini Wallkill. Ístu, sésiksï jájkuantaxati imani edifisiuechani engaksï japkia. Iámindu i ambe marhuauati paraka Asienda Watchtower seguiriuaka jorhendaani Tata Diosïri ambe iámindu imani kʼuiripuechani engaksï imecha jingoni úkuarhika.

David Walker, engachi orhetku uandakia, uandasïndi: “Kánikuani tsípisïnga exeni na enga últimu sinkuenta uéxurhinichani jimbo sánhani arhika kʼéni iámindu ambe ixú Wallkill ka iámindu ambe enga úkuarhika para jarhuatani kʼuiripuni jorhenguarhini Bibliaeri ambe”.