Jukari kuarenta uéxurhinistia enga imprenta enga Asiendarhu Watchtower (Wallkill, Nueva York) jaka uénapka ánchikuarhini: 2 de febreruni de 1973. Ima jurhiatikua uánikua rebistecha La Atalaya ka ¡Despertad! imprimirinhaspti para tsʼéjkunhani.

Diesi uéxurhini antesi, Jeobaeri testiguechaksï piáspti terrenuechani jimesï ísï paraksï úni jatsini tʼirekua para iámindu imecha engaksï sede mundialirhu ánchikuarhienga, jini Brooklyn (Nueva York). Peru desde 1973, asiendarhu no solu únhasïrendi tʼirekua para anhani, sino ístu úranhasïrendi para Bibliarhu anapu publikasionichani uaani (Mateu 24:45-47).

Philip Wilcox, enga rebisariuenga imprentani, miásïndi ambe enga úkuarhipka primeru jurhiatikua: “Ma kutsïchi jámaspka mákineri piesechani instalariuani. Ka enga listu japkia, úndaspkachi tsʼéjkuni. Ma ratu jimbojku, imprimirispkachi uánikua rebistechani ka axaaspkachi imprentarhu enga Brooklyn jaka, ka jima uératinksï axaaspti kúnguarhikuecharhu. No ma rebista tsïnchini uéraspti”.

Uéxurhini setenta uénani ísï, sánderu uáni Bibliarhu anapu publikasionichaksï kurhajkuarhinhaxaptia ka Brooklyn anapu imprentarhu nóteru andajkuarhinhasïrendia xáni uáni imprimiriani. Jatsisïrendiksï para chúrikua ka jurhiatikua ánchikuarhini, solu paraksï úni axani imani enga kurhajkuarhinhapkia. Paraksï no xáni kʼuetsapinchani, Testiguechaksï úspti jimbanhi imprenta ma jini Wallkill.

Primeru edifisiurhu imprenteri jini Wallkill, niárasptiksï jarhani tʼámu mákinecha para imprimirini, lugari ma nani engaksï uératini axanhenga publikasionicha ka Kʼumanchikua Reinueri ma. Peruksï seguirixapti kurhajkuarhinhani sánderu Bibliaeri publikasionicha. Ísï jimbo, antesi de primeru imprentarhu jukari ánchikuarhita jarhani, uénaspti únhani máteru edifisiu, enga sánderu kʼépiringa eska primeru. Ka ante de kʼamaranhani edifisiu, uénaspti imprimirinhani seisi mákinecha jingoni engaksï jima péranhapka.

Sánhani arhixaptiksï sánderu publikasionicha kurhajkuarhinhani ka jimbanhi mákinechaksï uéraxapti ka engaksï ménderueni úrakuarhienga, i ambe úspti eska uétarhipiringa sánderu kʼéri úntani ka uánikua uelta mójtakuni ambe ma Wallkill anapu imprentarhu. Uéxurhini 1980 jimbo ísï, mákinecha engaksï tipográficaepka mójtakunhasptiksï jimbanhi mákinecha offset jimbo.

Uéxurhini 2004 jimbo, Brooklyn anapu imprenta míkuarhispti, ka Wallkill anapu imprenta uénaspti imprimiriani libruechani. Ka uéxurhini 2010 jimbo, rebistechaksï Canadá únhapirindia Jeobaeri testiguecheri sukursalirhu. Imprenta enga jima jaka úsïndi imprimiriani 200,000 rebistechani ma ora jimbo.

Iásï, Wallkill anapu imprentarhu sáno iámindu ambe automatikamenti úkuarhisïndia, úraparini sánderu jimbanhi teknologiani. Ka ima engaksï jima ánchikuarhijka 280 jarhuajpiricha ísïstiksï engaksï no ma tumina andajka. Jiniani uéxurhini, jukari 17 miioni libruecha ka Bibliaechaksï imprimirinhaspti. Aparti de imprentecha engaksï Wallkill, Canadá ka México jaka, ístuksï jarhasti máteru 12 imprentecha interu parhakpinisï —África, Asia, Australia, Europa ka América del Sur— engaksï újka eskaksï miioni kʼuiripuecha mítiaka Jeobaeri ambe (Mateu 5:3, Traducción del Nuevo Mundo).