Jiáni enga uandanhiata ambe jarhajka, Jeobaeri testiguechaksï jarhuataasïndi imecheri erachichani ka ístu máteru kʼuiripuni. ¿Andiksïsï ísï újki? Uékperakua jimbo, engaksï jimbo mítikateka jurhimbiti kristianuecha (Juanu 13:35).

Exeakachi resumeni ma de na engaksï intsïnhapka jarhuajperata imecha engaksï no sési úkuarhinchapka entre marsuni de 2011 asta 2012 jimbo ísï. Ka ístu, iámindu i kʼuiripuechaksï intsïnhaspti jarhuajperata paraksï úni sési pʼikuarherantani ka paraksï jorhenguarhini Bibliaeri ambe, ísï eska méntkisï. Jeobaeri testiguecheri sukursalichaksï, erakuaspti komitechani para jarhuajpini paraksï orhejtsïkuni ini ánchikuarhitani ka engaksï jarhuajpipka jima anapu kúnguarhikuecha.

Japón. Jurhiatikua 11 de marsuni de 2011 jimbo, uinhamu jenchespti jimbosï tsunami ma úkuarhipti enga úpka eska kánikua no sési jánhaskuarhepiringa nortirhu ísï de Japón. Uánikuechaksï no sési úkuarhinchaspti. Interu parhakpini anapu Jeobaeri testiguechaksï, tsípikua jingoni íntspespti tumina para sési péntani ambe ma ka ístu ánchikuarhiparini. Pʼímarhisïngaksïni parajtsï exeni bideuni enga uandajka jarhuajperatecheri enga únhapka jiáni enga jenchepka.

Brasil. Iorhentpekuecha, tamorhukua ambe ka enga atsïmu iámu kápchakuapka, úspti eska uánikua kʼuiripu uarhipiringa. Jeobaeri testiguechaksï axaspti jima enga no sési úkuarhipka 42 tonelada tʼirekua enga újka ióni jamberi marhuani, 20,000 boteiechani itsïri, 10 tonelada takusï ka 5 tonelada de ima amberi enga marhuajka para limpiarini, ístu sïpiati ka máteru ambe.

República del Congo. Ma 32 Jeobaeri testiguecheri kʼumanchikuechaksï no sési pakaraspti jiáni enga charapka depositu ma engaksï armechani jatsiapka. Tʼámu kʼumanchikuechaksï meru iámu xerekuarhintaspti. Familiecha engaksï no sési úkuarhinchapka, intsïnhasptiksï tʼirekua ka xukuparhakua, ístu lugari ma paraksï pakarani máteru Jeobaeri testiguecheri kʼumanchikuecharhu.

República Democrática del Congo. Íntskuasptiksï sïpiati imechani engaksï kólera pʼamenchani japka, ka xukuparhakua ambe imechani engaksï no sési úkuarhinchapka iorhentpekua jimbo, engaksï kʼérati janikuecha jimbo úkuarhijka. Ístu doktorichaksï atenderiuaspti ka íntsaasptiksï semiia ambe para jatsintani ka uáni tonelada xukuparhakua imechani engaksï kampuecharhu de refujiurhu japka.

Venezuela. Kʼéri janikua úspti eska japiringa iorhentpekua ka eska tamorhukua ambe japiringa, komitecha para jarhuajpeni, jarhuatasptiksï 288 Testiguechani engaksï no sési ambe úkuarhinchapka ka uásptiksï jukari sinkuenta kʼumanchikuechani. Ístu, jarhuauaxatiksï imechani engaksï imecheri kʼumanchikua, en peligru jaka, jimboka lagu enga Valencia jaka sánderu kʼéxaka.

Filipinas. Enga iorhentpekua ma úkuarhipka kʼéri janikua jimbo, ma partirhu i paisiri, sukursali axakuaspti tʼirekua ka xukuparhakua imechani engaksï no sési ambe úkuarhinchapka. Ka enga itsï kétsipkia sáni, jima anapu Testiguechaksï jarhuajpispti limpiarini.

Canadá. Iretarhu Alberta, kurhundekua ma úkuarhispti enga no sési úkuapka kúnguarhikuarhu Slave Lake anapuechani. Kúnguarhikuecha engaksï jima no iauani jaka, axasptiksï kánikua tumina paraka úpiringa limpiarinhani. Peru jimboka no uétarhisïrenga xáni tumina, kúnguarhikua Slave Lake jukari terujkani donarispti para jarhuataani imechani engaksï no sési ambe úkuarhinchajka máteru lugaricharhu parhakpinirhu.

Costa de Marfil. Ante de guerra ma úkuarhini paisirhu, jiáni enga úkuarhini japka ka ísï tátsekua, intsïnhasptiksï tʼirekua, lugari ma para pakarani ka doktorichaksï atenderiuaspti imechani engaksï uétarhinchani japka.

Fiyi. Kʼérati janikuecha jimbo, kʼéri iorhentpekua ma úkuarhispti, ka 192 familiechaksï, engaksï Jeobaeri testigueka, no sési ambe úkuarhinchaspti. Intsïnhasptiksï tʼirekua, jimboka sáno iáminduechaksï tsïtaspka imecheri granjechani —ambe ma engaksï jimbo nitamakuarhenga—.

Ghana. Enga janikua úpka eska iorhentpekua ma japiringa paisiri orientirhisï, imecha engaksï no sési ambe úkuarhinchapka, intsïnhasptiksï tʼirekua, semiia ambe ka jimbanhi kʼumanchikuechani.

Estados Unidos. Ísï tátsekua engaksï na kʼérati sïuinicha úkuarhipka, tanimu estaduecharhu, 66 kʼumanchikuecha engaksï Jeobaeri testiguecheripka no sési ambeksï úkuarhinchaspti ka 12 iámuksï xerekuarhintaspti. Nájkirukaksï sáno iáminduecha jatsipkia seguru ma, intsïnhasptiksï jarhuajperata paraksï úni ménderu uántani kʼumanchikuechani.

Argentina. Surirhisï i paisirhu, bolkaniri senisechaksï, no sési úkuaspti kʼumanchikuechani. Jeobaeri testiguecheri kúnguarhikuechaksï, jarhuataaspti imechani engaksï i ambe nitamanchapka.

Mozambique. Jukari mili kʼuiripu enga no sési nitamakuarhini japka, kʼarhingua ma jimbo, intsïnhaspti tʼirekua.

Nigeria. Beinte Testiguecha engaksï atakuarhipka aksidenti ma jimbo autobusirhu, jarhuatanhasptiksï tumina jingoni. Ístu, uánikua engaksï paisirhu nortirhisï irekaka, jarhuatanhastiksï engaksï jatsispka para jurajkuani imecheri kʼumanchikuechani jimboka jima engaksï irekapka, problemechaksï jarhaspka kʼuiripu ka relijioni jingoni.

Benín. Enga kʼéri iorhentpekua ma japka, imecha engaksï no sési úkuarhinchapka intsïnhasptiksï sïpiati, xukuparhakua, moskiteruecha, itsï ka ístu lugari ma paraksï pakarani.

República Dominicana. Ísï tátsekua enga na urakani Irene kéndikupkia, máru kúnguarhikuechaksï íntspespti máru ambe para imecha engaksï no sési úkuarhinchapka ka jarhuajpesptiksï arreglariuani kʼumanchikuechani.

Etiopía. Tsimani lugaricharhu, no sési jánhaskuarhespti kʼarhingua jimbo, ka máteru lugarirhu iorhekua jimbo. Ísï jimbo, tanipurhu axakuarhespti tumina paraksï jarhuataani.

Kenia. Imecha engaksï no sési nitamakuarhini japka kʼarhingua jimbo jarhuatanhasptiksï tumina jingoni.

Malaui. Jarhuatanhasptiksï imecha engaksï kampu de refujiurhu Dzaleka japka.

Nepal. Enga tamorhupka ma japka, Jeobaeri testigueri kʼumanchikua ma, kánikua no sési pakaraspti. Ísï jimbo, pirenchi intsïnhaspti kʼumanchikua ma para pakarani, ka jima anapu kúnguarhikua kánikua jarhuataspti.

Papúa Nueva Guinea. No sési úrichaksï máru, kurhiraaspti ochu Jeobaeri testiguecheri kʼumanchikuechani. Organisarikuarhistia ánchikuarhita para arreglariuani.

Rumania. Máru Testiguecha engaksï nóteru jatsikia kʼumanchikua iorhentpekua jimbo, jarhuatanhastiksï paraksï arreglariuani.

Malí. Kʼarhingua jimbo, paisirhu nóksï úspti sési kosecharini. Senegal, enga jima no iáuni jaka, íntspespti tumina para imecha engaksï no jatsipka tʼirekua.

Sierra Leona. Francia uératinksï niraspti doktoricha máru engaksï Jeobaeri testigueka para atenderiuani imecheri erachichani engaksï jima anapuepka nani enga guerra úkuarhipka.

Tailandia. Kʼérati iorhentpekuechaksï, kánikua no sési úkuaspti máru iretechani. Imecha engaksï brigadarhu jaka para jarhuajpini, limpiariuasptiksï ka arreglariuani 100 kʼumanchikuechani ka 6 Kʼumanchikuechani Reinueri.

República Checa. Ísï tátsekua enga iorhentpekua xereantaapka máru kʼumanchikuechani Jeobaeri testiguecheri, Eslovaquia anapu erachichaksï, jarhuajpespti.

Sri Lanka. Sáno iámindu arregluecha engaksï únhapka para jarhuajpeni jiáni enga tsumani ma japka, úkuarhistiksïa.

Sudán. Jeobaeri testiguecha engaksï uéakupka jima uératini engaksï irekapka, guerra jimbo, intsïnhasptiksï tʼirekua, xukuparhakua, sapatu ambe ka lonecha plastikueri.

Tanzania. Iorhentpekuecha jimbo, 14 familiechaksï tsïtaspti iámu ambe engaksï jatsikuarhipka. Jima anapu kúnguarhikuechaksï, íntspespti takusï ka imani ambe para kʼumanchikuarhu úrani. Ístu, únhantaspti ménderu kʼumanchikua ma.

Zimbabue. Ma partirhu paisiri, kʼarhingua úspti eska no káni japiringa tʼirekua ambe. Imecha engaksï no sési nitamakuarhini japka intsïnhasptiksï tʼirekua ka tumina.

Burundi. Doktorichaksï atenderiaxati refujiaduechani, ka ístuksï intsïnhaxati máteru jarhuajperatechani.