Jini España, Jeobaeri testiguechaksï pʼorhembiasïndi 68 karselichani ka jorhendasïndiksï Bibliaeri ambe 600 kʼuiripuechani ísï engaksï ónhakata jaka.

Jeobaeri testigu ma enga pʼorhembiajka, jindesti Migueli enga dose uéxurhini ónhakata japka ante de aiakukuarheni Jeobani. Iásï, mándani semana kʼuanhatsintasïndi jima enga ónhakata japka. Peru ¿para ambe? Parakaksï máteruechajtu uáka mójtakuni imecheri irekuani, májkueni eska Migueli.

Ochu uéxurhini jimbo, Migueli uánikuechani jorhendaastia engaksï ónhakata jaka. Ima uandasïndi: “Para ji, kʼéri ma tsípikuarhitesti jarhuataani imechani engaksï ónhakata jaka jima engani ji ónhakuarhitini japka. Kánikuani tsípisïnga exeni na engaksï uéjka jurajkuani no sési járhati úkuechani”.

Enga Migueli tʼámu uéxurhini jatiripka, choferi ma enga kauirini manejarini japka jatajchakuspti tátembani ka uándikuspti. Amamba jatsispti para uánikua ora ánchikuarhini para úni kéndani familiani.

Migueli ka imeri ermanu enga orhetipka uénasptiksï nóteru nirani eskuela ka uénasptiksï inchani kʼumanchikuecharhu ka karruechani sïpaani. Enga Migueli 12 uéxurhini jatiripkia, tʼuini no sési úri máesptia. Ka enga 15 jatiripkia, kánikua tumina andasïrendi droga atantaparini. Peru iámu ima tumina no andangusïrendi para mantenerini imeri bisiuni de úrani eroina ka kokaina, jimbosï puru sïpani jámendi. Méntku úndaspti ónhanhani enga 16 jatiripkia, ka imeri mintsita choperi úkuarhispti: Migueli uandantasïndi: “Seguru jarhaspka eskani kárselirhu uarhipiringa o xáni droga úrani. Ísï pʼikuarherasïrenga eska tíndi ma, telaraniarhu ma”.

Peru 1994 jimbo, enga Migueli ónhakata japka, imeri amigu ma kurhakuspti Jeobaeri testiguni ma eska karakupiringa karta ma. Imani kartarhu Jeobaeri testigu explikarikuspti eska Tata Diosïri eratsikua jindeska paraisu ma úntani Echerini ka eska jatsispka para mójtakurhini para úni jima irekani. “Imeri uandakuechajtsïni mintsitarhu niárachespti —miásïndi Migueli—. Ima jurhiatikua iámu ambe mójtakurhispti para ji. Eratsispka jorhenguarhini Bibliaeri ambe, nájkirukani mítipka eska no sáni fásilipiringa.”

Ísï eratsisïrendi jimboka jiánisï tabakueri ka drogaeri bisiu kámasïrenga, ma ambe enga kánikua fásilika para konseguirini karselirhu. Imeri kompanieru enga jingoni japka seldarhu, pauani pauani aiakusïrendi droga. Peru Migueli méntku úndasïrendi kurhakuni Tata Diosïni eska íntskupiringa uinhapikua para jurajkuni imani bisiuni, ka úspti ísï úni.

Tanimu kutsï tátsekua, Migueli uénaspti eianguani máteruechani engaksï ónhakata japka, ambe enga jorhenguarhini japka. Máteru uéxurhini jimbo, seguirispti pétanhantani karselirhu ka itsï atakuarhispti komueska Jeobaeri testigu. Tátsekua, niáraspti jatsini nobiani ka uáspti arregluechani para tembuchani. Peru niáraspti jarhani máteru problema: ma kutsï antesi de tembuchani jatsispti para nirani jusgadurhu para tribunali atenderini máru ambe enga pendienti japka, ka arhisptiksï eska diesi uéxurhini ónhanhapiringa. Peru tanimu uéxurhini ka terujkani tátsekua, jurajkunhaspti imeri ambakiti jángua jimbo ka úspti tembuchani. Migueli nóteru méni niárasti no sési ambe niátani.