Kʼuiripuecha engaksï uinhamu pʼamenchani jaka, uátiksï niárani uandanhiani ka engaksï uétarhinchaaka para ospitalirhu pánhani, imecheri uandanhiatechaksï sánderu kánesïndi. Ísï jimbo, eska na uandapka rebista ma para doktoricha, “estudiuechaksï xarhatasïndi eska kánikua sési úkuasïnga pʼamenchatichani jorhenguarhini Tata Diosïri ambe ka engaksï sési jásï ambe arhinhaaka”. a

Mítiparini inde ambe, Jeobaeri testiguechaksï sési pʼikuastantaasïndi Biblia jingoni ka jarhuataani máteru Testiguechani engaksï ospitalirhu jaka. Orhejtsïkuticha engaksï jimesïsï anapueka, listuksï jarhasïndi paraksï nirani pʼorhembiani kúnguarhikuarhu anapuechani engaksï pʼamenchani jaka. ¿Joperu ambe úkuarhisïni enga Testigu ma enga pʼamenchani jaka, intsïnhajka tratamientu ospitalirhu ma enga iauani ísï jaka imeri kʼumanchikuarhu? Máru siudadicharhu interu parhakpinirhu, Jeobaeri testiguechaksï jatsiasti Grupo de Visita a Pacientes (GVP). Kúnguarhikuarhu anapu orhejtsïkuticha engaksï ini grupuecha jimbo jaka, méntkuksï nirani jarhasïndi ospitalicharhu para jarhuataani Testiguechani engaksï pʼamenchani jaka ka imecheri familiechani engaksï máruteru nani anapueka o engaksï asta máteru paisicharhu uératini juka paraksï intsïnhani tratamientu ma. Sánderu de 28,000 boluntariuechaksï jarhasti ini grupuecharhu engaksï jindeka sáno 1900 (GVP), seisi kontinenticharhu. b

Testigu ma enga ini grupurhu jaka (GVP), enga arhinhajka William, uandasïndi: “Úskia uinhaperantaani Testiguechani ka imecheri familiechani engaksï no Testigueka solu engani imecha jingoni jarhajka para uandontskuarhini ka kurhajchaani. Asegurarikuasïnga eska Tata Jeoba mítitixaka na engaksï nitamakuarhini jaka ka eska ima uandanhiasïnga imechani jimbo. Pʼamenchaticha ka imecheri familiecha, jukaparharasïndiksï engachi kómarhijpikuajka”.

Uánikuaksï uandastia na engaksï xáni jukaparharajka uinhaperantskua engaksï intsaajka grupuecha (GVP) jiáni engaksï pʼorhembiajka. Kétsekuaksï jarhasti máru ejempluecha jini Estados Unidos anapuecheri, nani engaksï sáno 7,000 i grupurhu (GVP) anapuecha pʼorhembiajka pʼamenchatichani.

• Priscilla uandaspti: “Diosmeiamu je engajtsï pʼorhembika juchiti tátini ospitalirhu enga na embolia íntskupkia. ¡Sési pʼikuarheraspti engajtsï pʼorhembipka! Ísku pakaraspti enga mítipka eska jarhaska i jásï jarhuajperata. Ji exesïnga eska engajtsï ísï pʼorhembipka, jarhuataspka para sánderu sóntku sési pʼikuarherantani”.

• Ophilia, arhispti (GVP) representantini enga imeri amamba uarhipka: “¡Juchiti nándi kánikua jukaparharaspti engajtsï pʼorhembipka! Mítispti eskaksïni Jeobasï axapka. Diosmeiamu je engajtsï uékperakua jingoni kuidaripka”.

• Pʼamenchati ma kánikua kómu pʼikuarheraxapti ka uandanhiani enga mítipka eska solu máru jurhiatikuechaterku irekapiriguia. James, grupueri (GVP) anapu, ióni imani jingoni jarhaspti ka uinhaperantaspti imani ambe jingoni enga Biblia arhijka ixú Filipusʌ 4:6, 7. James uandasïndi: “Engani pʼorhembipka ísï pauandikua, ima méntku ménderueni pʼikuarheraxaptia. Nájkiruka mítipkia eska jamberi uarhipiringa no ióni jimbo imeri pʼamenchakua jimbo, iásï nóteru xáni no sési pʼikuarherasïrendia Jeobaeri jarhuajperata jimbo ka ¡asta jíndeni jamberi uinhaperantaspti!”

Pauline, enga uámbani uarhiranchapka ospitalirhu ma enga iauani japka imeri kʼumanchikuarhu, karaspti: “Kánikua diosmeiamu je jarhuajperata jimbo engajtsïni íntskupka imani tiempu jimbo enga xáni no sési nitamakuarhini japka juchiti familia. Solu mítiparini eskajtsï ospitalirhu japiringa parajtsï juchantsïni jingoni jarhani terojkani chúrikua, nájkirukajtsï jatsipiringa para pauandikua ánchikuarhini, kánikuajtsïni uinhaperantasïnga. Diosmeiamu je engajtsïni jirinhachepka nani engachi pakarapiringa iámindu ima 11 engachi jámenga ka ístu engajtsïni someni uandajpani jarhenga. Agradeserikusïnga Tata Jeobani ka imeri organisasionini, engajtsïni íntskuka ini jarhuajperata parajtsïni uinhaperantani”.

Nicki, Gayle ka Robin, karru ma jimboksï aksidentarikuarhispti sáno 300 kilometru iauanisï imecheri kʼumanchikuarhu uératini. Carlos, grupurhu (GVP) anapu ma, eiangunhaspti ka ospitalirhu jarhasptia engaksï Nicki, Gayle ka Robin niárapka. Carlos uandasïndi: “Arhiaspka eskani jarhuatapiringa ambe engaksï xáni uétarhinchapiringa, ka ambe engani úpka jindespti Nickiri uíchu sapichuni kamanharhini paraka ima úpiringa inchani doktori jingoni”. Tátsekua, Curtis, enga ístu grupueri (GVP) anapueka, jurhaspti imeri uarhiiti jingoni. Ospitalirhuksï pakaraspti astakaksï Nickiri, Gayleri ka Robiniri familiaricha janopka ísï ióni jimbo. Kʼuiripu ma enga jima japka uandaspti: “Taniperanksï sési pʼikuastanhantaspti jarhuajperata jimbo engaksï intsïnhapka”. Joperu Robin, Nickiri jingonikua jemba enga no Jeobaeri testigueka, ísku pakaraspti iámindu inde jarhuajperata jimbo engaksï grupueri (GVP) anapuecha íntsaapka.