Jurhiatikua 6 de maiuni 2017, 130 Jeobaeri testiguecha ísïksï jarhuajpispti ambantskantani juáta Bryukhovychi, Lviv no iauani, Ucrania. Imecha engaksï jarhuajpika, entre 22 a 80 jatiristiksï, Jeobaeri testiguecheri sukursalirhuksï irekasti enga Ucrania jaka ka jimaksï ánchikuarhisïndi, i sukursali, juátarhu no iauani jarhasti. Tanimu ora jimbojku, 50 ektariaksï (120 acres) ambantskantaspti ka 600 kilu ísïksï (1,300 libras) tánaspti basura.

Mykhailo Splavinskyi, ingenieru ma enga organisasioniri ma enkargarikuarhijka para jatsiantani anhatapuechani, uandasïndi: “Jeobaeri testiguechaksï orheta jámaspti jarhuajpeni ini limpiesarhu enga mándani uéxurhini úkuarhijka. Ka ísïksï úxati mándani uéxurhini desde 2014 jimbo”.

Mykhailo Splavinskyi uandantasïndi: “Tsimani rasonichaksï jarhasti enga jimbo basura jarhajka juátarhu”. Ma rasoni jindesti eskaksï máru kʼuiripuecha tsïtasïnga basura ini juáta jimbo. Ka máteru rasoni jindesti eskaksï kamionicha ini juáta jimbo nirasïnga eskombru ka máteru jásï basura tsïtani”.

Basura jindesti ambe ma enga kánikua no sési úkujka juátani. Mykhailo Splavinskyi uandasïndi eska “basura ióndasïnga tereni” ka eska “jánharhitanisïnga itsïni enga inchatsekuarhu jaka ka eska no sési úkusïnga mediu ambienteni”. Tsánda jimbo bidriu sánderu aparhesïndi ka ísï jimbosï tátsekua kurhundejti. Bidriueri kʼepekurhita ka jeringechaksï peligru máesti para jucha ka sánderia para sapiicha. Mykhailo Splavinskyi seguirisïndi uandani: “I ambe no ísï úkuarhiati engachi tarhataska basura”.

Úkua jukasïndi ambantskantani juáta ma enga 3,300 ektaria jukaka (8,100 acres). Mykhailo Splavinskyi uandasïndi: “Sinku kuárichajkuksïsï jati iámu estadurhu, jimbosï no fásiliti xáni kʼéri juáta ma ambantskantani. Ísï jimbo, mándani uéxurhinichi pʼímarhisïnga kʼuiripuni parajtsïni jarhuatani”.

Testiguecha engaksï jarhuajpijka, úraasïndiksï uantesichani, bolsa plástikuerichani ka k’arhojpatarakuechani paraksï tarhataani boteiechani, iantechani, bidriu, tiámu ambe, sïranda, plástiku ka jeringechani. Ihor Fedak enga kuárika, uandasïndi eska “jimesïsï engaksï Jeobaeri testiguecha ambantskantaka, kánikua limpiu pakaraska”.

Nájkiruka no lei máeka, imecha engaksï jarhuajpijka erakuntasïndiksï basura ka támuksï pérasïndi bidriuni, sïranda ka plástiku ambe. Ísï úparini, úsïndi ménderu úranhani. Tátsekua, empresa ma enga basureri ambe enkargarikuarijka pásïndi basura para prosesarini. Desde 2016, Jeobaeri testiguechaksï meiampikuarhisïndi para prosesarinhani ima basura engaksï ima tánajka. Ihor Fedak uandasïndi: “Diosmeiamukua íntsaasïnga Jeobaeri testiguechani engajtsïni xáni jarhuatajka”. Seguirisïndi uandani: “Kánikuajtsïni jarhuatasïndi”.

Testiguechaksï kánikua tsitisïndi mándani uéxurhini jarhuajpini ambantskantani. Tsitisïndiksï jarhuajpeni para ireta sési jarhani ka kuidarini juátani. Testigu ma enga Volker arhinhajka uandasïndi ambe engaksï eratsijka ima Testiguecha engaksï jarhuajpijka: “Ambantskantani no kʼuratsekua ambeesti. Úni ambe ma para máteruecha jimbo, pribilegiu máesti ka sésirini pʼikuastasïndi”.

Anzhelika uandasïndi: “Para ji no arhisïndi né tsïtasïni basura sino ambe engani uáka úni parani kʼarhantani”. Lois, enga 78 jatirika ka enga ístu jarhuajpeka ini kampaniarhu, uandasïndi: “Enbesi de ikiani engani ixuisï jurhajka ka basura jarhani, kʼarhantasïnga ka pásïnga tsïtani”.

Wieslaw uandasïndi: “Sáno méntkisï, engachi nirajka aianhpini ambe engachi jakajkujka, kʼuiripujtsïni sési xukuparhatini exesïndi ka korbata jingoni. Peruchi ístu listu jarhasïnga para ánchikuarhini ka ambantskantani juátarhu o máteru ambe úni enga jarhuataaka iretani”.