Iámu parhakpinirhu anapu kʼuiripuechani, kánikua marhuakuaxati pájina jw.org. Ixuksï jarhasti máru ambe engaksï uandaka máru kʼuiripuecha ka engaksï axaapka máru karakatechani sede mundiali Jeobaeri testiguecheri asta maiu de 2014.

“Juchiti sapi juásïrendi kinderi uératini lapisichani, chʼanarakuechani ka lentichani engaksï no imeeripka. Méminduchi jánguarhintaska kurhangutarani eska sïpaxapka ka eska no sési jarhaska sïpani, peruchi no méni úspka kurhungutarani. Ma jurhianchi keskuska jw.org uératini bideu enga arhinhajka No sési jarhasti sïpani. ¡Ambakiti jarhuajperata ma! Inde ambemindusï uétarhinchani japti juchari sapi. Enga na exepkia, uandaspti eska uékasïrenga íntspentani iámu ambe enga pakuarhipka, jimbokanha iásï mítispkia eska Tata Diosï no jeiapanhintasïnga enga nema sïpajka. ¡Na engajtsïni xáni jarhuataka i pájina Internetiri!”​(D. N., África.)

“Juchiti sapiichaksï kánikua tsitisïndi ini pájinani. Késkukuarhiasïndiksï bideuechani karikatureri enga jarhuataajka paraksï úni ambe enga Bibliarhu anapu prinsipiuechaksï uandajka jurhimbikueri ambe. Ístuksï uánikua máteru ambakiti ambe jorhenguarhisïndi enga marhuakuauaka para sánderu orhepatini ka paraksï ambakiti kʼuiripueni.”​(O. W., las Antillas.)

“Kánikuarini úkua jukachesïrendi nirani eskuelarhu, nóteruni uékasïrengia nirani. Peru ma xanharuni arhintaspka artikulu ma jw.org jimbo enga arhinhaenga ‘¿Debería dejar de estudiar?’. Jiáni uératini úndaska ménderueni exeni eskuelani. Inde artikulurini jorhendasti eskarini eskuela preparariuaka para sánderu orhepatini ka eskarini jarhuataaka parani sánderu sési úni ambe ma.”​(N. F., África.)

“Konsejuecha engaksï ini pájinarhu jaka para tumbicha, jarhuatastijtsïni parani ji sési jámani eskuelarhu. Ka jorhenguarhiska sési estudiarini ka no máteru ambe úni jarhani.”​(G., África.)

“Kompaniera ma ánchikuarhitarhu anapu arhisptirini eska nanaka ma no sési kámaxapka imeri nanakani. Kánikuanha chésïrendi ka nóterunha uékasptia nirani máru jurhiatikuecha eskuelarhu. Eianguspka máru ambe juchiti kompanierani bideueri Cómo defenderte sin dar un solo golpe, enga jw.org jimbo jaka jima enga arhinhajka ‘La pizarra animada’. Kánikua tsitispti jima enga arhijka eska ménisï uétarhisïnga tsípini para no xáni no sési jásï ambe úkuarhini. Ísï tátsekua, ima úspti arhini imeri uájpani ambe úpirini úni nanaka para no ísï kánhani ka ísï úspti ménderu nirani nanaka eskuela nóteru xáni chéparinia. Sánderu orhepatini, sési niántaspti ambe ma ka niárasptiksï ima nanakecha amigaeni.”​(V. K., Europa oriental.)

“Kánikua diosmeiamu je engajtsï peeraka pájinarhu jw.org artikuluni ‘¿Por qué siento el impulso de cortarme?’. Uánikua uéxurhinistia engani ini problemani jatsika. Ji eratsisïrenga eska no nema májkueni nitamakuarhisïrenga eskani ji ka eskarini no nema úpiringa kurhanguchini engani aiangupiringa nemani. Kánikuajtsïni jarhuatasti inde artikuluecha engaksï ini pájinarhu uéraka. ¡Iásï kʼóruni pʼikuarheraska eskarini nema kurhanguchesïnga!”​(Uátsï ma Australia anapu.)

“Pájina jw.org kánikuarini jarhuatasïndi parani exentani informasioni enga jarhuatajka tumbichani engaksï uétarhinchajka. Ma artikulurini kánikua jarhuataspti parani ji sési mítini ambe arhikuekasïni acoso sexual, mítispka eskani ji indeni ambe nitamakuarhinchaspka ka mítispka néna kuájchakukuarhini indeni ambe jimbo.”​(T. W., las Antillas.)

“Juchiti sapi enga tumbiikia no úsïndi ísku jarhani. Ménisïni no jánhaskasïnga ambe úni, imeri jángua jimbo enga no újka ísku jarhani. Ísï jimbo, kánikua úkua jukasïndi uandontskuarhini imani jingoni. Ma xanhari, inchaspka pájinarhu jw.org jima enga arhijka para temungurhiricha ka táticha, ka uánikua artikuluechani exeantaspka engaksï inderi ambe uandaenga engani ji uétarhinchani japka. Jorhendasptijtsïni sánderu sési uandontskuarhini juchiti sapini jingoni. Imantu jarhuatasti i pájina Internetiri. Iásïreni iámindu ambe aiangusïndia ka aiangusïndirini imeri uandanhiatechani ka sési jásï ambe enga nitamakuarhinchajka.”​(C. B., África.)

“Pájina jw.org arhistakuasïndi tátichani néna jorhendaani sapiichani paraksï no kuatantani. Ejemplu ma, bideu enga xarhatajka néna exeantani ambakiti amiguechani enga jima uérajka ‘La pizarra animada’ jarhuataspti juchari sapiichani paraksï ima úni mítini ambeski amigu ma ka paraksï imani amiguechani erakuani engaksï jarhuatauaka paraksï sési ambe úni. Mémindu úkuarhistia eska inde ambe uérasïnga pájinarhu engaksï juchari sapiicha nitamakuarhini jarhajka. Uánikua ambakiti konsejuechaksï jarhasti ini pájinarhu.”​(E. L., Europa.)

“Juchiti uarhiiti ka ji seisi uéxurhinchi páxakaia tembuchatini. Ka ísï eska iámindu temungurhiricha, sánhani arhiskachi tsimarhani jorhenguarhini májkueni eratsini, májkueni jámani ka uandontskuarhini. Ísï jimbo, kánikuani tsitispka artikuluni enga jw.org jimbo uérapka ‘Aprenda a escuchar’. Íntspeasïndi konsejuechani enga ma uaaka sánderu sési kurhajchpeni. Iámu arhintaspka ka tátsekua íntskuspka juchiti uarhiitini. Jánguarhintaxakachi ísï úni inde ambe, eskaksï na uandaenga artikuluecha.”​(B. B., las Antillas.)

“Ma uéxurhinistia engani Jeobaeri testiguechani jingoni uandontskuarhijka, ka uékasïnga diosmeiamukua arhiani pájina jimbo jw.org jimbo. Uánikua ambe jorhenguarhiskia, komu no xáni sóntku ikiani ka jindeni ambakiti táti ma ka ambakiti achati ma. Sési jimbo, úsïnga uandani eska i pájina Internetiri pʼímutantaska juchari temungurhirikuani.”​(L. G. , las Antillas.)

“Diosmeiamu ini pájina jimbo jw.org, ísï pʼikuarherasïnga enajkini ménderu uéna irekani. Bideuecha engaksï lenguaje de seniasi amerikanu jimbo jaka jarhuatastijtsïni parani ji sánderu sési komunikadu jarhani. Orhetkuni, ísï pʼikuarherasïrenga enajkini no úpirini metechani jatsikukuarhiani juchiti irekuarhu, peru bideu Ahora veo la Biblia en mi idioma mintsitarhurini niárachisti ka jarhuatastirini parani ima ambejkuni eratsini engarini jarhuatajka.”​(J. N., África.)

“I pájina ambakiti ambesti. Programa ma jimbo jarhaska enga no ma tumina andanhajka para jarhuatani kándichani, ka sánderu tumbiicha jimbo engaksï kándika. Iámu informasioni enga jaka lenguaje de seniasi jimbo jarhuatastirini parani ji sánderuni sési jorhenguarhini indeni idiomani. Ka ístu, jarhuatastirini para jarhuataani máteruechani paraksï sánderu sési pájperani imeri amiguechani jingoni ka ístu familia jingoni.”​(K. J., las Antillas.)

“Ji no úsïnga exeni ka kánikuarini marhuachisïndi i pájina jw.org. Informasioni engani jima exentajka, korreu jimborini ióndapirindi niárachini. Ambe engani jorhenguarhika ini pájinarhu, úsïndi eskani sánderuni sési irekaaka juchiti familia jingoni ka sánderuni jukaparhakueskia para ireta. Ka ístu, kánikuani tsitisïnga pʼirani informasioni ístu jiáni engaksï juchiti amiguecha intsïnhajka engaksï újka exeni.”​(C. A., Sudamérica.)

“Para imecha engaksï no újka arhintani braile o nóksï úni piáni libruechani braile jimbo, pájina jw.org kánikua marhuakuasïndi. Ambakiti grabasionicha engaksï jima jaka, jarhuataasïndi sieguechani paraksï úni uánikua ambe mítini, enga úkuarhini jarhajka. I pájina úkata jarhasti para iámindu jásï kʼuiripuechani marhuakuani, no era erapkuasïndi. Jukaparharaasïndi sieguechani ka jarhuatasïndijtsïni parachi pʼikuarherani eskachi juchajtu májkueniska eska máteruecha.”​(R. D., África.)

“Ambe ma enga no májkuenika chári pájina Internetiri máteru pájinecha jingoni engaksï relijioniri ambe uandajka, jindesti eska no káni úraasïnga uandakuechani engaksï puru imecha kurhangujka engaksï relijioniri ambe mítika. Ka nóksïni kuatajkusïndi kánikua informasioni jingoni. Pájina máesti enga no úkua jukaka ka jurhimbitkuksïni eiangusïndi ambe ma. Nóksï uanda uandamisïndi, niksï kánikua úraani uandakuechani filosofieri ambe. Nóksï ísï xarhatasïndi jakajkukuani enajki kánikua úkua juka, o enajki no uá ma jakajkukua jatsini, sino enajki fásili i ambe.”​(A. G., Asia.)

“¡No sáni tsípini pʼikuarherasïrenga! Ísï pʼikuarherasïrenga engani no jatsipka pájinani jw.org. Méntkisï engani inchajka ini pájina jimbo, ísïni pʼikuarherasïnga enajkini lusi ma tixatajki ini parhakpini jimbo enga xáni pápkandika Tata Diosïri ambe jingoni. Jirejiresï úsïnga arhiantani ka kurhaani artikuluechani engaksï uandantajka na enga exejka Tata Diosï ambe ma ka úsïnga exeantani mókuntskuechani.”​(J. C., las Antillas.)

“Kánikua jeiapanhintasïnga jarhuajperatani engajtsïni íntskujka Tata Diosïri ambe jimbo ixú Sudamérica, selbarhu. No mítiska ambe úpirini, engani no jatsipiringa ini pájinani.”​(M. F., Sudamérica.)