Uánikua kʼuiripuechaksï jorhenguarhisïndi karani ka arhintani
Uéxurhini 2011 jimbo, Jeobaeri testiguechaksï jarhuatasti jukari 5,700 kʼuiripuechani paraksï jorhenguarhini karani ka arhintani.
Ghana.
Arini beintisinku uéxurhinichani engaksï nitamakia, jarhuataskachi jukari 9,000 Ghana anapuechani paraksï jorhenguarhini arhintani ka karani.
Zambia.
Desde 2002 uératini, kasi 12,000 kʼuiripuechaksï sánderu sési arhintasïndia ka karani. Uarhiiti ma enga Agnes arhinhajka ka enga 82 uéxurhini jatirikia uandasti: “Engaksï uandapka kúnguarhikuarhu eska japiringa klasecha para jorhenguarhini karani ka arhintani seguirispka apuntarikuarhini. ¡Kánikua sési pʼikuarheraspka engani jorhenguarhipka karani juchiti nombri primeru jurhiatikua klaserhu!”.
Perú.
Jorhenguarhiri ma enga 55 uéxurhini jatirikia karaspti: “Juchiti tátichajtsïni no méni axasti eskuela, ísï jimbosïni no méni eratsipka eskani ménisï úpiringa jorhenguarhini arhintani ka karani”.
Mozambique.
Kinse uéxurhini jimbo enga nitamakia jorhendaaskachia arhintani jukari 19,000 kʼuiripuechani. Jorhenguarhiri ma enga Felizarda arhinhajka uandaspti: “Kánikuani tsípixaka jimbokani iásï úsïngia jirinhantaani textuechani Bibliarhu ka arhikuantani kʼuiripuechani. Orhetkuni kánikua úkua jukanchasïrenga ini ambe úni”.
Islas Salomón.
Sukursali uandantasïndi: “Ióntki, uánikua kʼuiripu enga iauani ísï irekapka no úsïrendi nirani eskuela. Ístu, no uánikua nanakechaksï úsïrendi nirani eskuela. Ísï jimbo, uánikua kʼuiripu enga kʼérikia ústia jorhenguarhini arhintani ka karani. Engaksï na kʼamarajkia jorhenguarhini, sánderuksï seguru pʼikuarherasïndi ima mísmu”.