Uánikua uéxurhini nitamastia desdekaksï Jeobaeri testiguecha uénaka diseniariauani ka uáni lugarichani para tánguarhini. ¿Únhaxaki i jásï lugari ma, enga arhinhajka Kʼumanchikua Reinueri, jima engajtsï cha irekaka? ¿Néna úpirini marhuani Kʼumanchikua Reinueri ma chári iretarhu?

Kʼumanchikuechaksï Reinueri, diseniaduksï jarhasti paraksï sési xarharani iretarhu. Jason, enga arhistatspijka néna uáni Kʼumanchikuechani Reinueri Estados Unidos, uandasïndi: “Ambe engachi uéjka úni, jindesti eska iámindu Kʼumanchikuechaksï Reinueri, jindeuakaksï edifisiu ma enga kánikua sési xarharaaka ka enga ambakiti ambeuaka para chári ireta”. Testigu ma enga arkitektueka ka enga ánchikuarhijka indeni ekipu jingoni, uandasïndi: “Uékasïngachi eska enga kʼamarakuarhiakia Kʼumanchikua Reinueri ma, ísïuaka komu intsïmperata ma para ireta ka eska marhuakuauaka besinuechani”.

Imecha engaksï ánchikuarhijka para Kʼumanchikuechani Reinueri uaani, Jeobaeri testiguestiksï engaksï ambakiti edifisiuechani uaajka. Máteruechaksï méntku úndasïndi sési arhiani imecheri ánchikuarhita jimbo. Por ejemplu, jimbanhi ánchikuarhitarhu ma jini Richmond, Texas (Estados Unidos) inspektori ma enga exeni japka nénaksï úkata jarhaspi edifisiuecha iretarhu, uandaspti eska Kʼumanchikua Reinueriri techu jindespka sánderu ambakiti ánchikuarhita enga ima no nani exeni japka. Islarhu de Jamaica, inspektori ma páspti grupuni ma intspektoricheri paraksï exeni Kʼumanchikua Reinueri ma ka arhiaspti: “Nójtsï jatsiska para uandanhiani ini kʼuiripu jimbo. Jeobaeri testiguechaksï ísï ánchikuarhisïndi eskaksï planuecha na jaka, ka astaksï sánderu sési konstruirisïndi ka eska ambe engaksï ireteri reglecha uandajka”. Intspektori ma edifisiuecheri ireteri ma enga Florida (Estados Unidos) jaka, uandaspti: “Intspeksionariuaskia ospitalichani ka gobiernueri kʼérati proiektuechani, peru no ma xáni sési organisadu jarhasti komu í. Chájtsï kánikua ambakiti ánchikuarhita ma úsïnga”.

Tánguarhikuecha engaksï Kʼumanchikuecharhu Reinueri únhajka, kánikuaksï marhuakuasïndi imechani engaksï nirajka. Imecha engaksï tánguarhijka, jarhuatanhastiksï paraksï ambakiti tátini, nándini ka uájpeni. Rod, enga ánchikuarhijka ekipu ma jingoni enga diseniariuajka Kʼumanchikuechani Reinueri, uandasïndi: “Mándani Kʼumanchikua Reinueri, jindesti eskuela ma nani enga jorhentpinhajka ambakiti juramukuecha engaksï jarhuataajka iámindu iretarhu anapuechani”. Ka seguirisïndi uandani: “Ixú jindesti nani engari uáka exentani jarhuajperakua engari no sési nitamakuarhini jauaka. Incharini iáminduechaksï sési pájperasïndi ka uékperakua jingoni, ka marhuakuasïndi iáminduechani engaksï uétarhinchajka jarhuajperakua espiritualmenti”.

Imecha engaksï Kʼumanchikuecharhu Reinueri tánguarhijka, uandanhiasïndiksï besinu jembecha jimbo ka listuksï jarhasïndi para jarhuajpeni enga desastre ma úkuarhijka. Por ejemplu, 2016 jimbo, ísï tátsekua enga urakani Matthew niárapka Bahamas, Jeobaeri testiguecha arreglariuataspti 254 kʼumanchikuechani. Besindariurhu ma, Violet, uarhiiti ma enga 80 jatiriika ka enga imeri kʼumanchikuarhu uinipka itsï, andarheraspti grupuni ma Testiguecheri enga jarhuajpini japka. Violet arhiaspti eska meiamuapiringa engaksï jarhuatapiringa. Testiguechaksï no jiókuarhispti tumina, peruksï móparhatakuspti techuni para nóteru tsʼurhenania. Ka jimbanhi plafonksï jatsinchespti salarhu. Tátsekua, Violet kamapakuaspti mándani arhini, someni úndaspti diosmeiamu arhiani ka uinhachaparini uandaspti: “¡Chájtsï meru jindeska Tata Diosïri ireta!”.

Paraksï Kʼumanchikuecha Reinueri méntkisï sési járhati jarhani, Jeobaeri testiguechaksï programa ma jatsisti enga jorhendaajka imechani engaksï jima tánguarhijka néna kuidariuani Kʼumanchikuechani Reinueri. I ambe kánikua marhuastia. Por ejemplu, ireta sapichurhu ma jini Arizona, uarhiiti ma jiókuarhispti nirani tánguarhikuarhu ma Kʼumanchikua Reinuerirhu. Ima uandaspti eska saloni sési kuidadu jarhaspka ka ísku pakaraspti enga kurhaapka eskaksï programa ma jatsispka para kuidarini, ka sánderia enga kurhaapka eskaksï uánikua ambe úxapka para sánderu sési jájkuntani salonini ka jini kʼóru sési xarharani jarhani. Uarhiiti enga periodista máepka enga ánchikuarhenga para periodiku sapichu ma, artikulu ma karaspti enga uandenga na engaksï xáni sési kuidariuenga Kʼumanchikua Reinuerini. Artikulu, kʼamarhukuni jámani, arhisïrendi: “Kánikuachi tsípisïnga jatsini Kʼumanchikua Reinueri ma [...] juchari iretarhu”.

Chájtsï uáka exeantani Kʼumanchikuechani Reinueri sáno iámindu iretecharhu. Pʼímarhikatajtsï jarhaska para nirani. Uákajtsï seguru jarhani eskaksïni kánikua sési erokaaka.