Últimu beintiochu uéxurhinicha jimbo, jukari 11,000 Jeobaeri testiguechaksï jurajkusti imecheri kʼumanchikuechani para ánchikuarhini konstruksionirhu 120 paisicharhu. Iáminduechaksï tsípikua jingoni íntspesïndi imecheri uinhapikua ka úsïndiksï ambe engaksï jorhenaka, ka méntkuksï incharhetakusïndi úni ini ánchikuarhitani no ma ambe kurhajkuarhiparini.

Uánikuaksï meiampikuarhisti biajini para uaani ini ánchikuarhitechani. Máruksï úrasïndi bakasioni ka máteruksï permisu kurhajkuarhisïndi ánchikuarhitarhu, nájkiruka i ambe uáka eskaksï nóteru xáni andaakia.

No ma ánchikuarhirinksï afuersa úraspti ini ambe, iáminduksï tsípikua jingoni aiatspikuarhispti para jarhuajpini Reinueri eianhpikua jingoni interu parhakpini (Mateu 24:14). Jeobaeri testiguechaksï uaasti edifisiuechani paraksï imprimirikuarhini Bibliaecha ka publikasionicha, ka ístu edifisiuechani para ofisinecha ka para irenhani. Ístuksï uaasti Kʼumanchikuechani Kʼéri tánguarhikuecheri engaksï asta 10,000 siiecha jaka ka Kʼumanchikuechani Reinueri engaksï asta 300 siiecherika.

Konstruksioniri ánchikuarhita seguirixati úkuarhini. Sukursali mándani paisiri, íntsasïndi ánchikuarhirichani ambe engaksï uétarhinchajka mándani pauani. Intsïnhasïndiksï nani pakarani, tʼirekua ka ístuksï jupaminhasïndi. Jima anapu Testiguechaksï ístu tsípikua jingoni jarhuajpesïndi ini ánchikuarhitecharhu.

Para úni organisarini ka ambakiti arregluechani uaani ini xáni kʼéri ánchikuarhitarhu, 1985 jimbo uaxastanhaspti programa internasionali ma para konstruksioni. Para úni jarhuajpini, uétarhisïndi entre 19 ka 55 jatirini ka mítikuni sánisï sikiera ma ambe konstruksioniri. Sáno méntkisï, jarhuajpirichaksï entre tsimani semana ka tanimu kutsï pakarasïndi, nájkirukaksï máru ma uéxurhini o sánderu jamberi pakarajka.

¿Ka enga jarhuajpiri tembuchatijkia ka imeri témba no ma ambe mítini konstruksioniri? Imanksï jorhendasïndi máteru ambe úni komueska bariiechani jótakuani alambri jingoni, mámaru jásï pisu jatsintskani, lijarini o atantani.

Engaksï ánchikuarhiricha kʼuanhatsintajka kʼumanchikuecharhu, máruksï karaasïndi kartechani para agradeserini. Temungurhiri ma karaspti: “Uékasïngaksïni kánikua agradesericheni ini xáni kʼéri kóntperata jimbo de ánchikuarhini Budapest anapu sukursalirhu. Hungría anapu Testiguechajtsïni kánikua sési kámasti ka kánikuaksï agradesiduesti. No sésichi pʼikuarheraspka arhiani eskachi níntaxamengia jimbokachi ma kutsï jima jarhaspka. Peru méntkisï ísïsïndi. Engachi úska, uékapiringachi kʼuanhatsintani primabera jimbo. Engachi marhuajka lugarirhu ma ísïchi exesïnga eska ima jindeska sánderu ambakiti kutsï juchari irekuarhu”.