Konstruktora ma Gran Bretaña anapu Considerate Constructors Scheme a (Plan de Constructores Considerados) felisitariuaspti Jeobaeri testiguechani jimbokaksï kapasitariuasïnga nanakechani paraksï ánchikuarhini kʼérati mákinecha jingoni, paraksï jimbanhi sukursali ma úni Chelmsford no iauani, jini Essex. I organisasioni, sánderu ambakiti kalifikasioni íntsaaspti Testiguechani (10 de 10) jimbokaksï kapasitariuasïnga nanakechani paraksï jorhenani konstruirini ka uandaspti eskaksï Testiguecha “ambakiti ambe uénasïnga úni”. ¿Andiksïsï ini kalifikasioni intsaapi?

Jini Gran Bretaña, menosi de 13% engaksï konstruksionirhu ánchikuarhijka nanakechestiksï. Seguni enkuesta ma enga empresa ma úpka jini Gran Bretaña, namunitujkuestiksï nanakecha engaksï uéjka ánchikuarhini konstruksionirhu. Peru, jini Chelmsford, sáno 40% nanakechestiksï engaksï konstruksionirhu ánchikuarhijka. Ekipurhu ma engaksï kʼérati mákinechani úraajka, jukari 60% nanakechestiksï.

¿Andisï xáni sési nikuani jaki ini pirenchichani? Jimboka inde kapasitasioni ka jarhuajperata engaksï intsïnhajka, kánikua jarhuataasïnga. I tsimani ambe, reglamenturhuksï jarhasti organisasioniri Considerate Constructors Scheme (Plan de Constructores Considerados). I reglamentu, animariuasïndi empresechani engaksï konstruirijka, paraksï jukaparharaani imechani engaksï jima ánchikuarhijka, jima pérapariani nani engaksï “janhanharhiauaka, májkuenksï kanhani eska iáminduecha, ka nani engaksï jarhuatauaka” ka ístu nani engaksï “kapasitarinhaaka”.

Jade jindesti nanaka ma enga kapasitasioni intsïnhapka proiekturhu Chelmsford para jorhenguarhini úraani exkabadorechani ka kamioni bolteouerichani, ima uandasïndi: “¡Kánikua sésisti! No méni eratsispka eskani úpiringa i ambe úni. I ánchikuarhita ménisï kánikua úkua jukasïndi, peru méntkuni intsïnhani jarhasïnga kapasitasioni ka jimbanhi ambe jorhenguarhini”. Iásïjtu Lucy ánchikuarhesïndia kʼérati mákinecha jingoni. Ima uandasïndi: “Engani uénapka ini ánchikuarhita jingoni, ísï pʼikuarherasïrenga enajkini no ma ambe jorhenapi úni. Pero desde engani niárapka, intsïnhaspka kapasitasioni. Sinku ekipuecha jingoni ánchikuarhiskia, ísï jimbo uánikua ambe jorhenguarhiskia”.

Ima nanakecha engaksï jima ánchikuarhijka, sánderu ambeksï úsïndi eska solu mákina ambe xanhatani. Eric, enga enkargadueka ekipurhu ma, uandasïndi: “Nanakechaksï sánderu sési kuidariuasïndi mákinechani eskaksï tatakecha. Sánderuksï kuenta íntskukuarhisïndi enga mákina ma xerekuarhini jarhajkia ka méntkisïksï uandantasïndi”.

Carl, enga enkargadueka uánikua ekipuecharhu engaksï kʼérati mákinechani úraajka, uandasïndi: “Ískurini pakatasïndi na engaksï nanakecha jorhenguarhika úraani kʼérati mákinechani. Sáno méntkisï nanakechani erakuapiringa enbesi de tatakechani engaksï sési mítikukia”.

Ánchikuarhirichaksï sánderu seguru pʼikuarherasïndi engaksï enkargaduecha xarhatakuajka eskaksï jatsiska imecheri jarhuajperata. Ju je exeni Thereseri ejemplu, ima sési jorhenasti úraani kʼérati mákinechani ka mítisti eska kánikua jukaparhakueska sési úraani ka úni ambe enga uétarhiaka paraksï seguru ánchikuarhini. Therese uandasïndi: “Mítini eskani jatsiska enkargadueri apoiu, jarhuatasïndirini parani sánderu jánguarhintani, jimbokani mítiska eskajtsïni mintsinharhisïnga. Mítini eskaksï máteruecha jukaparharasïnga ka respetarini ambe engani újka, úsïndi eska marhuauaka na engani xáni jánguarhintajka”.

Abigail, jindesti máteru nanaka enga úraajka exkabadorechani ka kamioni bolteuerichani. Ima kánikua jukaparharasïndi jarhuajperatani ka apoiu enga intsïnhajka. Abigail uandasïndi: “Tatakecha engaksï ini proiekturhu ánchikuarhijka nójtsïni menusi úsïndi. Méntkisïjtsïni jarhuatasïndi, peruksï no iámu ambe ima uékasïndi úni. Jurajkusïndijtsïni úni juchiti ánchikuarhitani”.

Aparti deksï kʼérati mákinecha jingoni ánchikuarhini, nanakecha engaksï proiekturhu Chelmsford ánchikuarhijka, ístuksï intsïnhasti kapasitasioni paraksï máteru ambe úni, komu echeriri ambe exeni (topografía), sési úraani rekursosi naturalesichani, mákinechani arreglariuantani ka andamiuechani armariuani. Robert, enga uánikua proiektuecharhu ánchikuarhikia nanakecha jingoni, uandasïndi eskaksï “sési úsïnga imecheri ánchikuarhitani ka astaksï exesïndi sánderu sapichu ambe”. Tom enga topografieri ánchikuarhitechani uájka, uandasïndi: “Nanakecha engaksï juchiti ekipurhu jaka, sésiksï ánchikuarhisïndi asta sánderu sapichu ambe jingoni. Uékasïndiksï eska iámu ambe sési pakaraaka”.

Ísï jimbo, Fergus enga enkargarikuarhijka ekipurhu ma, tsípikua jingoni uandasïndi: “Ísïsti, nanakechaksï úsïndi ánchikuarhini konstruksionirhu”.