Sábadu 1 de marsu 2014 jimbo, 823 Jeobaeri testiguechaksï kánikua tsípikua jingoni tánguarhisti Kʼumanchikua para Kʼéri tánguarhikuecha ma jimbo jini siudadi Benín (Nigeria) paraksï ambakiti ambe jatsini. Desde 1999 enga uaxastanhaka programa para uáni Kʼumanchikua Reinuerichani paisichani jimbo engaksï no kánikua tumina jatsikuarhika, ini paisi jimbo únhastia 3,000 Kʼumanchikua Reinueri.

Ini tánguarhikua jimbo, miánhantasti iámu ánchikuarhita enga úkuarhikia Nigeria uéxurhinicha 1920 ísï jimbo, parakaksï kúnguarhikuecha jatsipiringa nani tánguarhini paraksï kómarhini Jeobani. Ménisïksï kʼumanchikuecharhu tánguarhisïrendi, ka ménisï rentarisïrendiksï nani tánguarhini. Seguni registru, primeru lokali enga úrakuarhipka nomasi para tánguarhikuecha, jindespti kʼumanchikua ma enga úkuarhipka siudadi Ilesha 1935 jimbo. Entre 1938 ka 1990, kúnguarhikuechaksï uánikua sánderu úkuarhisti, jarhasptiksï 14 peru tátsekua 2,681. Uánikuechaksï no úsïrendi exeni nani tánguarhini. Máru Kʼumanchikua Reinueri jimbo, asta seisi kúnguarhikuechaksï tánguarhisïrendi. Máteru kúnguarhikuechani jimbo, jukari sapichuespti Kʼumanchikua Reinueri, ka máruksï jatsisïrendi para ekuarhu anhandetini jarhani, ka bentanecharu ísï exeni ka kurhaani. Máteruechaksï kʼumanchikuecharhu tánguarhisïrendi ka eskulecharhu.

Desde 1990, sukursali Jeobaeri testiguecheri úndasti tumina kuánetaani kúnguarhikuechani, tumina enga jindepka para sánderu Kʼumanchikua Reinuerichani uáni. Para 1997, Komite Regionali para konstruirini, jarhuatasptiksï 105 kúnguarhikuechani paraksï uáni o sési jántskantani imeri Kʼumanchikua Reinuerichani. Desde 1997 asta 1999, 13 Kʼumanchikuecha Reinueriksï úkuarhisti. Úsïrendiksï 7 o 15 jurhiatikua jimbo ma Kʼumanchikua Reinueri.

Sánderuksï sóntku úkuarhisïrendi Kʼumanchikuecha Reinueri, peru útasï ísï sánderuksï uétarhisïrendi, jimbokaksï pauani pauani sánderu uánesïrenga Jeobaeri testiguecha Nigeria. Para abrilini 1998 jimbo, sukursali uandaspti eskaksï útasï 1,114 Kʼumanchikua Reiuneriksï uétarhisïrenga iámu paisi jimbo.

Ini tánguarhikua jimbo enga úkuarhipka siudadi de Benín, Don Trost, Komiteri enga orhejtsïkujka sukursalini jini Nigeria, uandaspti: “¡Kʼéri ánchikuarhita máespti! Ka eratsisïrengachi: ‘¿Nénachi uá úni inde ambe?’”. I kurhamarhikua mókukuarhispti uéxurhini 1999 jimbo, engaksï Grupuecha engaksï Uájka Kʼumanchikuechani Reinueri, grupuecha engaksï jindepka seisi u ochu erachicha, ka engaksï úndapka jarhuataani kúnguarhikuechani iámu paisirhu. Peru jimbokaksï Kʼumanchikua Reinueri no xáni kʼérispka, uásptiksï 17 ísï mándani kutsï, ka i ambe, 14 uéxurhinksï ústia.

Enga na sési arhiapkia imechani engaksï jima japka imecheri ánchikuarhita jimbo, erachi Trost arhiaspti eska útasï kánikua ánchikuarhita jarhaspka. Uéxurhini 2013 jimbo, jukari 8,000 kʼuiripuechaksï Jeobaeri testigu úkuarhispti jini Nigeria. “Parakaksï erachicha uáka jatsini nani tánguarhini sánderu orhepani, uétarhiati eska únhaka 100 Kʼumanchikuecha Reinueri mándani uéxurhini”, ísï uandaspti erachi Don Trost. Uéxurhini 2013 jimbo jarhasptiksï 351,000 Testiguecha jini Nigeria, ka jukari 5,700 kúnguarhikuecha.