Juliuni 2009 jimbo, Jeobaeri testiguechaksï terrenu ma piásti enga 102 ektarea kʼéka (253 acres) estado de Nueva York, eratsiparini jima móskuani ofisinechani sede mundialiri. I terrenu a 80 kilometru (50 millas) jarhasti noroesterhu Brooklyn uératini, jima enga sede jaka desde 1909 uératini asta iásï jamberi.

Exesïngachi eskaksï ini edifisiuecharhu uáka ochosientu Testiguecha ísï irekani ka ánchikuarhini, ixú jauati edifisiu ma ofisinecheri, ma serbisiueri ka tʼámu para irekanhani. Ístu, jauati museu ma enga xarhataaka istoria iásïa anapu Jeobaeri testiguecheri.

Edifisiuechaksï 18 ektarea úraati (45 acres) i terrenueri, jurajkupariani anhatapuechani ka laguechani engaksï jimesïsï jaka. Nóksï uáuati jardinichani ménderu, soluksï arreglariuauati para úraani imani anhatapuechani engaksï jima jukaka.

Grupu ma enga jorhenaka uáni planuechani, exestia néna uáni edifisiuechani paraksï no xáni úrani lusi ka tumina, i ambe jarhuajpiati para no xáni no sési úkuni echerini ka menusi tumina úrakuarhini. Ejemplu ma, plantechanksï jatsiparhatauati engaksï no delikadueka ka nóksï kánikua kuidadu uétarhinchani, engaksï antsitaaka janikueri itsïni ka únksï eska no xáni aparhekuarhiaka ka níjtu xáni tsʼirakuarhini edifisiuecharhu. Ofisinecharhuksï úrakuarhiati jurhiateri lusi. Ístu, exenhaxati néna aorrarini itsï.

Peru ¿andisï eratsinha móskuni sedeni? Antesi Brooklyn jarhaspti imprenta ma enga uáuenga Bibliaechani ka publikasionichani para Testiguecha interu parhakpiniri. Iásï, máru sukursalichaksï jarhuajpesïndia ini ánchikuarhita jingoni. Para 2004 jimbo, ánchikuarhita para imprimirini ka axaani publikasionichani Estados Unidos uénaspti úkuarhini Wallkill (Nueva York), a 145 kilometru (90 millas) noroesterhu Brooklyn uératini.

Máteru ambe enga exenhaka jindesti eska kánikua jukaparhakua uérasïnga úni eska iámu ambe sési ánchikuarhiaka ka eskaksï sési jauaka edifisiuecha Brooklyn. Exesïngachi eska enga mótsinhaakia ini edifisiuecharhu engaksï sánderu márku jauaka, sánderu sési úrakuarhiaka tumina para apoiarini ánchikuarhitani para jorhentpini Jeobaeri ambe.

Ante de jatsiani permisuechani para uáni ini edifisiuechani, uétarhisïndi exeni na xáni no sési úkua echerini. Enga iámu ambe sési uéraska, i ánchikuarhita uénaati 2013 jimbo ka tʼámu uéxurhini jimbo kʼamakurhiati.

Aparti de imprenta enga Wallkill jaka, Jeobaeri testiguechaksï jatsisti kʼumanchikua ma nani enga jorhentpinhajka néna etsakuni Bibliaeri jurhimbikuani Patterson (Nueva York) ka sukursalichani uánikua paisicharhu. Interu parhakpinirhu jarhastiksï jukari siete miioni ka terujkani Testiguecha.