Libru de Génesis idioma seniasi amerikanu jimbo
PARA pasajkuni, imecha engaksï no kurhaajka manatasptiksï jájkichani engaksï eiangunhapka: “Kánikuajtsï tsípiaka mítini eskaksï tradusirikuarhixaka máru libruecha Karakata Ebreaecheri [Antiguo Testamentu], ka eska kʼamaranhaskia grabarinhani bideu de Génesis”.
I xáni ambakiti eianhperakua íntspinhaspti últimu diskursurhu kʼéri tánguarhikua tanimu jurhiatikueri engaksï Jeobaeri testiguecha jatsipka idioma seniasi amerikanu jimbo.
Uéxurhini 2005 jimbo, Jeobaeri testiguechaksï uénaspti tradusirini idioma seniasi amerikanu jimbo Bibliani, Traducción del Nuevo Mundo de las Santas Escrituras Ebanjeliu de Mateu uénaparini. Ka 2010 jimbo, kʼamarakuarhispti traduksioni 27 libruecheri engaksï ísï mítikateka komueska Nuebu Testamentu.
Jeobaeri testiguechaksï ístu tradusiristia máru partichani Bibliaeri máteru sinku idioma seniasiri jimbo.
¿Para ambe? Jeobaeri testiguechaksï mítisti eska informasioni enga karakata uerajka, úkata jarhaska para idiomecha engaksï uandanhajka, ka uánikua imecha engaksï no kurhajka nóksï mítiasti ini idiomechani. Traduksioni ma Bibliaeri para idioma seniasiri, enga jurhimbitika ka enga sési kurhangukuarhijka, úsïndi eskaksï uánikua imecha engaksï no kurhajka, uáka kurhanguni ambe enga Biblia arhijka ka eskaksï jatsiaka ambakiti pájperakua ma Tata Diosï jingoni. Ju je exeni máruksï néna erokuarhispi Bibliani imecheri idioma jimbo.
“Enga ióntki sáni uerapka Ebanjeliu de Mateu —uandasïndi tumbi ma enga no kurhajka—, ísï exespka eskarini ini ambe jimbo Tata Diosï xarhatachexapka na engarini xáni uéjka ka traduksioni de Génesis ménderurini miátantasti eska ísïska. Mítiska eska ima úxaka ambe enga jamberi uétarhijka parakani ji mítiaka.”
Uarhiiti ma enga no kurhajka arisï uandasti ambe enga pʼikuarherajka: “¡Seniasi sési kurhangukuarhisïndi ka uánikua ambe pʼikuastpisïndi! Kánikua tsitiska Bibliani. Iásï kuenta íntskukuarhiska eska Jeoba uékasïnga eskani arhintaka imeri Karakatani parani kurhanguni, mándani bersikuluechani jimbo, parani úni sánderu sési mítini. I jorhenguarhikua niárasïndi juchiti mintsitarhu ka jarhuatasïndirini parani sánderu sési eianguni Jeobani ambe engani pʼikuarherajka engani kómarhini jauaka”.