Ante de kurhajkuarhini Jeobaeri testiguecheri Biblia enga braile jimbo jaka, exe je sintsï jatsiski lugari kʼéri ma para patsani. Biblia Traducción del Nuevo Mundo —enga jakaia braile jimbo inglesi, utusï ka italianu jimbo— úkata jarhasti 18 a 28 bolumenicha jimbo ka tsimani metru (6 pies, 5 pulgadas) lugari uétarhinchasïndi para patsani.

Peru jarhastiksï máteru formatuecha engaksï no xáni kʼéka. Ejemplu ma, aparatuecha engaksï jindeka anotadores braile marhuasïndi para notechani uáni ka arhintani informasionini formatu elektroniku jimbo, dispositibu ma jimbo enga puntechani jukaka engaksï karharajka ka kétsini para símboluechani uáni braile jimbo. Ima engaksï no exejka, ístuksï uáti exentani ka kurhaani publikasionichani úrapariani komputadorarhu anapu programechani enga újka arhintani textu enga pantaiarhu xarharajka ka úni eska kurhaakuarhiaka.

Ístu, Jeobaeri testiguechaksï programa ma ústi para komputadora enga újka karantani informasionini, para braile jimbo péntani mámaru jásï idiomecha jimbo. Para ísï úni, i programa úrasïndi tabla ma enga jukaka letrechani imani idioma jimbo enga karakata jaka ka ístu símboluechani braile jimbo. Ístu úsïndi publikasionini ma, imani formatu jimbo péntani enga uáka úni eskaksï fásili arhintaka ima kʼuiripuecha engaksï siegueka. I programa jingoni, uáti úni eska únhaka publikasionicha (komueska Biblia) náki uéjki idioma ma jimbo engaksï jatsika símboluechani braile jimbo, ístu imechani engaksï no úrajka letrechani latinu jimbo.

Jukari sieni uéxurhinistia engaksï Jeobaeri testiguecha, petaani jaka Bibliaeri publikasionichani braile jimbo, ka iásï, jarhastiksïa 19 idiomecha jimbo. Nájkiruka no ma tumina kobrarpinhajka iichani jimbo, uánikuaksï uékasïndi tsípikua jingoni íntspini sáni tumina.

Máru uéxurhinichani antesi, enga uandanhaenga eska jimbanhi publikasioni ma uéraspka kʼéri tánguarhikuarhu Jeobaeri testiguecheri, uandanhasïrendi eskaksï i publikasionicha braile jimbo, úpiringa kurhajkuarhinhani ísï tátsekua. Peru jiniani uéxurhini, sukursali Estados Unidos anapu, enkuesta ma úspti para mítini náki kʼéri tánguarhikuarhuksï nipirini ima kʼuiripuecha engaksï siegueka ka engaksï pʼindeka tánguarhini Jeobaeri testiguecha jingoni ka ambe formatu jimboksï uékasïreni imeri publikasionichani (sïranda jimbo o formatu elektroniku para anotadores braile o imani enga újka arhintani enga pantaiarhu xarharajka).

Jimbanhi publikasionicha braile jimbo, axanhasptiksï kʼéri tánguarhikuecharhu jima engaksï nípka kʼuiripuecha engaksï siegueka, ísï úparini, úsptiksï intsïnhantani imecheri publikasionichani imani mísmu jurhiatikua jimbo eska máteruecha. Peru formatu elektroniku jimbo, axakuasptiksï korreu elektroniku jimbo mándani kʼuiripuni, ma semana tátsekua enga na nitamapkia kʼéri tánguarhikua.

Pirenchi ma enga no újka exeni, uandaspti: “Kóntperata máesti intsïnhantani publikasionichani májku kʼéri, máteruechani jingoni engaksï ixú jaka. Bibliarhu Salmo 37:4, Jeoba aiatspesïndi eskajtsïni íntskuaka ambe enga juchari mintsita kurhajkuarhiaka. ¡Ka i jurhiatikua kumpliristi!”. Máteru Jeobaeri testigu ma, pʼiaraspti uerani ka uandaspti: “Jíntsïni eratsixapti. Diosmeiamukua íntskuntasïnga Jeobani engajtsïni xáni kuidarijka”.