Para uaani iámindu Bibliaechani lujueri ka pasta duraeri engaksï uétarhini japka, Jeobaeri testiguechaksï instalariuasti jimbanhi mákina enkuadernadorechani Japón anapu imprentarhu, enga ireta Ebina jaka.

Ma ambe enga jimbo úkua jukani japka para úni ini ánchikuarhitani, jindespti enga lusi nirenga jenchekua ka tsunami jimbo engaksï úkuarhipka 11 de marsuni de 2011.

Nájkiruka i ambe úkuarhipka, septiembrini imani mísmu uéxurhini uénaspti instalarinhani mákina, ka no jamberi tanimu kutsï jimbo jimbanhi enkuadernadora ánchikuarhixaptia. Ambe enga orheta úpka jindespti Traducción del Nuevo Mundo chino jimbo.

I enkuadernadora enga 400 metru (1,300 pies) kʼéka, automatikamenti úsïndi iámu ambe. Orheta, mátakunhasïndiksï ojecha, jatsikunhasïndiksï taparhakuni anapu, prensarinhasïndiksï ka kújtsïtaasïndiksï máru Bibliaechani. Últimu, kajecharhuksï jatsiranhasïndi engaksï sési míkanhajka ka tarimecharhuksï péranhasïndi.

Paraka iámu ambe sési uérapiringa, jatsispti para sési organisarinhani ánchikuarhita. Orheta, jatsisptiksï para seiariuani mákinechani, kajarhu jatsiraani ka 34 kontenedoricharhu jatsiraani, íksï móskunhaspti desde Europa uératini asta Japón.

Diesi engaksï ánchikuarhijka Jeobaeri testiguecheri sukursalirhu Estados Unidos, nirasptiksï Japón para jarhuajpeni i ánchikuarhitarhu. Máruksï asta seisi kutsï pakaraspti jima para jorhendaani Japón anapu erachichani sési úrani mákinani ka kuidarini.

Empresecha engaksï karaajka, enkuadernariuani ka imprimiriani libruechani, uékaxaptiksï mítini jimbanhi enkuadernadoreri ambe. Jurhiatikua 19 de marsuni de 2012, jukari sieni i empresecheri representatichaksï niraspti miiuni edifisiuechani ka ískuksï pakaraspti.

Ante de níntanksï, mándani ima engaksï nípka intsïnhasptiksï kopia ma Bibliaeri Traducción del Nuevo Mundo enga jimbanhi enkuadernadorarhu úkatepka.

Iásï, Japón anapu sukursali márku úkuarhintastia Estados Unidos ka Brasil jingoni, paraksï imprimiriani Bibliaechani pasta duraeri para Jeobaeri testiguecha.

Para Testiguecha ka i empreseri ánchikuarhiricha engaksï jarhuajpika i ánchikuarhitarhu, kʼéri tsípikuarhita máespti márku ánchikuarhini. Ánchikuarhiri ma uandasti: “Chánksïni jingoni jarhani ísï pʼikuarherasïnga komueska familia jingoni jarhani”.

Enga na kʼamarapkia instalarinhani, máteru ánchikuarhiri uandaspti: “Juchiti máteru ánchikuarhita sánderu úkua jukaati, jimbokani mítiska eska nóteru xáni sésiuakia komueska Watchtower jingoni ánchikuarhini”.