Bideuecha uánikua idiomecha jimbo
Jeobaeri testiguechachi tradusiriuasïnga publikasionichani uánikua idiomecha jimbo. Para nobiembrini 2014 jimbo, tradusirispkachia Bibliani 125 idiomecha jimbo ka Bibliarhu anapu publikasionichani 742 idioma jimbo. Ístuchi tradusiriuaspka bideuechani. Eneruni uératini 2015 jimbo, bideuni ¿Nénaksï úkuarhisïni juchari tánguarhikuecha? tradusirinhasti 398 idioma jimbo, ka bideuni ¿Andisï uétarhijki jorhenguarhini Bibliaeri ambe? 569 idioma jimbo. ¿Andisï ísï úkuarhi? ¿Ka néna úkuarhiski?
Marsuni 2014 jimbo, Grupu enga Orhejtsïkuajka iámindu kúnguarhikuechani Jeobaeri testiguecheri, kurhakuaspti interu parhakpinirhu anapu sukursalichani eskaksï tradusiripiringa bideuechani na engaksï xáni uánikua idiomecha jimbo úpiringa, paraksï úni jorhentpini Bibliaeri ambe.
Para tradusiriuani bideuechani uánikua ambe uétarhisïndi úni. Orheta, traduktorichaksï tradusirisïndi guionini. Tátsekuaksï erakusïndi nemani enga imani idioma uandaaka para mándani bosi enga jima úrakuarhiaka. Ka tátsekua, engaksï audiu ka bideurhu ánchikuarhijka grabarisïndiksï guionini enga tradusirikuarhikia, manharhitasïndiksï imani engaksï grabarikia ka ístu textuni enga tradusirikuarhika para úni pantaiarhu xarharani. Ka últimu, iámindu ambeksï márku úntasïndi paraka uáka uerani juchari pájinarhu Internetiri.
Máru sukursalicharhuksï jatsikuarhiasti nani engaksï újka grabarini ka ístu imechani engaksï preparadu jaka paraksï úni indeni ánchikuarhitani. Peru, ¿Nénaksï únhaski i bideuecha máteru idiomecha jimbo ka tradusirikuarhini jimesïsï enga iauanipka?
Interu parhakpinirhu, téknikuecha engaksï audiurhu ánchikuarhijka úraasptiksï imecheri ánchitarakuechani engaksï úpiringa paani ka engaksï no xáni kʼuetsapipka. Mikrofunu ma jingoni ka komputadora portatili ma jingoni ka ístu programa ma para grabarini, ka úrasïrendiksï ofisinechani, Kʼumanchikua Reinuerichani, ka kʼumanchikuechani paraksï grabarini. Kʼuiripuecha engaksï imani idioma uandaenga enga grabarikuarhini japka úsïrendiksï ánchikuarhitani komueska arhintani, direktorini ima grabasioniri ka rebisarini. Enga grabasioni kʼamakurhiengia ka uandanhani eska listu jarhaspkia, grabasioniri tékniku tánantasïrendi iámindu ambe ka nirasïrendi ménderu máteru nani grabarini.
Ini ánchikuarhitani jimbo, bideuecha engaksï tradusirikuarhini japka máteru idiomecha jimbo, tanimu uelta sánderu grabarikuarhispti.
Íksï bideuecha kánikua marhuasti. Para uánikua kʼuiripuecha, juchari bideuechaksï jindesti engaksï primeru uelta uénaka exeni imecheri idioma jimbo.
Ma idioma jimbo enga grabarikuarhika i bideuecha jindespti pitiantiatiara jimbo, engaksï jukari 2,500 kʼuiripuecha uandajka jini Australia. I, grabarikuarhispti jini Alice Springs (Territorio del Norte). Callan Thomas enga jarhuajpika grabasionirhu uandasti: “Iáminduechaksï tsitiasti bideuechani. Jima anapu kʼuiripuechaksï no jurajkusïrendiksï exeni bideuni tabletarhu ka kurhanguarhisïrendiksï naniksï úpirini exeantani sánderu bideuechani. Jimboka úkua jukaska konseguirini publikasionichani pitiantiatiara jimbo, kánikuaksï ísku pakarasïndi kʼuiripuecha engaksï kurhaajka, ka sánderu engaksï exejka, indeni idioma jimbo.”
Tsimani Jeobaeri testiguechaksï jini Camerún niraxapti riurhu lancha ma jimbo. Ka anhaxurhisptiksï aldea ma jimbo enga arhinhaenga pigmea ka uandontskuarhisptiksï jima anapu jefe jingoni, enga maestruepka jima anapu eskuelarhu. Engaksï mítipka eska ima bassa uandasïrenga, erachichaksï exeraspti tabletarhu bideuni ¿Andisï uétarhijki jorhenguarhini Bibliaeri ambe? ini idioma jimbo.
Aldea ma jimbo enga Indonesia jaka, relijionirhu anapu orhejtsïkuti enga jima anapueka, ka enga no uékaajka Jeobaeri testiguechani, kurhiraaspti publikasionichani engaksï jima etsakunhapka. Ístuksï máru jima anapuecha uandaspti eskaksï kurhirapiringa Kʼumanchikua Reinuerini. Ka ístu, tʼámu polisiechaksï niraspti Jeobaeri testigueri kʼumanchikuarhu ma paraksï kurhamarhini ambe ma imani ka imeri familiani. Uékasïrendiksï mítini ambe úkuarhisïreni Kʼumanchikua Reinueri ma jimbo, ka ima exeraaspti bideuni ¿Nénaksï úkuarhisïni juchari tánguarhikuecha? indonesio jimbo.
Engaksï na kʼamarapkia exeni bideuni, polisia ma uandaspti: “Iásï kʼóru mítiskia eskaksï kʼuiripuecha no ma ambe mítiska chári ambe”. Ka máteru polisia uandaspti: “I bideu xarhatasïndi na engajtsï jásïka cha meru. ¿Uájtsïni íntskuni bideuni parani exerani máteruechani?”. Iásï polisia ménderueni exeasïndia Jeobaeri testiguechani ka iásï kuájchakuasïndia.
¿Nótkijtsï exeasïni ini bideuechani? ¿Andijtsïsï no exeajki chári idioma jimbo?