Foietu ma enga uáni ilustrasioni jukanharhika jarhuatasïndi interu parhakpini anapuechani
Odval uarhiiti máesti enga Mongolia irekaka. No mítisti sési na xáni jatiriski, jimboka no segura jarhaska na jatini andajpenuski. Ima eratsisïndi eska 1921 andajpenuska. Ístu, no jorhenasti arhintani, jimboka ma uéxurhinijkusï nípka eskuela. Ka desde enga sapichuepka jatsispti para jarhuataani tátembechani animalichani kuidariani. Peru iásï sáni, intsïnhaspti foietu ma enga ilustrasionichani jukanharhiaka, ini jingoni jorhenguarhisti sánderu Tata Diosïri ambe ka na engaksï xáni ambakiti ambe erokuarhijka ima engaksï kurhajchajka ka kurhandirani. Kánikua tsípini pʼikuarheraspti enga jorhenguarhipka iámindu ini ambe.
I foietu engaksï Jeobaeri testiguecha úka, 2011 jimbo uérasti ka tsimanistiksï engaksï sáno májkueni járhaka. Íksï tsimani kánikua sési járhati ilustrasionichani jukanharhiasti, peru ambe enga jimboksï ménderuenika, jindesti eska máechakua menusi letra jukaska eska máteru.
Foietu enga sánderu letra jukaka, arhinhasïndi Kurhajcha je Tata Diosïni ka irekakajtsï para méntkisï ka máteru arhinhasïndi Kurhajcha je Tata Diosïni. Ka uánikua idiomecha jimboksï tradusirinhastia. No ióndani, primeru foietu 583 idiomecha jimbo jauatia, ka segundu 483 idiomecha jimbo. Íksï, sánderu idiomecha jimbo jarhasti eska Declaración Universal de Derechos Humanos, dokumentu ofisiali ma engaksï úka Naciones Unidas enga oktubrini de 2013 jamberi, 413 idiomechani jimbo tradusirikata japkia. Ístuksï i tsimani foietuecha, sáno 80 miioni kopiecha etsakunhastia.
Brasil, Testiguechaksï máru íntskuspti uarhiitini ma enga jatirikia, foietuni Kurhajcha je Tata Diosïni. Ima kánikua tsípikua jingoni jiókuarhispti ka uandaspti: “¡Xáni sési engaksï jaka kʼuiripuecha komueska cha, engaksï uandanhiajka kʼuiripuechani jimbo komueska ji! Jimbokani no jorhenaska arhintani, no méni jiókuarhiaspka chári libruechani. Peru ini kʼóruni pakatakuarhiaka”.
Brigitte, uarhiiti ma enga Francia irekaka ka enga ístu no jorhenaka arhintani, uandaspti: “Pauani pauani exeasïnga ini foietueri ilustrasionichani”.
Jeobaeri testigu ma enga Sudáfrica jaka, uandantasïndi: “Ji eratsisïnga eska i jindeska sánderu ambakiti foietu para jorhendaani Bibliaeri ambe kʼuiripuechani engaksï chino uandajka. Úraska kʼuiripuecha jingoni engaksï unibersidadirhu ma estudiarika ka ístu imecha jingoni engaksï kasi no újka arhintani. Foietu Kurhajcha je Tata Diosïni ka irekakajtsï para méntkisï, jarhuatasïndirini sóntku jorhentpini Bibliaeri ambe enga ma jatsika para orheta jorhenguarhini. Media ora jimbojkuri úsïnga jorhentpini nani enga Biblia ísï arhijka”.
Alemania, tsimanksï prekursorecha Jeobaeri testiguecheri, jorhendasïndi temungurhirini ma engaksï jatsika karrera ma. Achati kánikua ísku pakaraspti ka kurhanguarhipti: “¿Andijtsïnisï no antesi juáchipi ini publikasionini? Iásï sánderuni sési kurhangusïngia máru uandantskuechani ka uandakuechani enga Biblia úrajka”.
Australia anapu uarhiiti ma enga no újka kurhani, uandantaspti: “Uánikua uéxurhini irekaspka monjaecheri konbenturhu ma. Kánikua amigaespka imecheri engaksï orhejtsïkuenga tiosïu. Perurini no ma ima jorhendaspti ambeski Tata Diosïri Reinu. Diosmeiamu i foietueri ilustrasionichani jimbo, úska kurhanguni ambe enga arhikuekajka Mateu 6:10”.
Canadá anapu sukursali Jeobaeri testiguecheri karasti: “Ixú uánikua kʼuiripu jarhasti Sierra Leona anapu. Engaksï exepka foietuni imecheri idioma jimbo, enga jindeka krío, uánikuaksï uandaspti eskaksï Testiguecha meru jánguarhintaxaka para eianguani iáminduechani Bibliaeri ambe. Máruksï uandasti: ‘Chájtsï uandanhiasïnga juchantsïni jimbo, nájkirukaksï uánikuecha no ísï újka’”.