Eianhpinhasïndi Bibliaeri ambe Irlanda ka Gran Bretaña anapu idiomecha jimbo
Jeobaeri testiguechachi jánguarhintasïnga para eianguani kʼuiripuechani engaksï Irlanda ka Gran Bretaña anapu idiomechani uandajka. a Ini lugaricharhu, aparti de inglesi, ístu uandanhasïndi gaélico escocés, galés ka irlandés.
Septiembrini de 2012, petaskachi jimbanhi bersioni ma juchari sitiueri jw.org uánikua idiomecha jimbo, ka ístu irlandés ka galés jimbo. Gaélico escocés jimbo, agostuni de 2014 uéraspti. Ístuchi imprimiriaska uánikua Bibliaeri publikasionichani ini idiomechani jimbo. ¿Ambe xáni úkuarhiskia ini ánchikuarhita jimbo?
Kʼuiripu ma enga iglesiarhu ma marhuajka, jiókuarhispti tratadu ma enga bibliaeri ambe uandaenga gaélico escocés jimbo, ka enga arhintapka úndaspti uérani. ¿Andisï uéraeni? Kánikua sési exespti enga xáni sési tradusirikata japka enga jamberi uandapka: “¿Né tradusiriski ini ambe? ¡Kánikua sési jarhasti!”.
Primeru kutsï jimbo, 750 kʼuiripu ísï inchaspti sitiurhu jw.org enga gaélico escocés jimbo jaka.
Achati ma enga maestrueka Universidad Nacional de Irlanda, jini Galway, arhiaspti máru Testiguechani eska no uékasïrenga mítini relijioniri ambe. Peru, enga mítipka eska úpiringa irlandés jimbo jatsini foietuni Biblia ka ambe engajtsïni aiangujka, kurhajkuarhipti ma. Uandaspti eska uétarhisïrenga eskaksï iámindu kʼuiripuecha úpiringa jatsiani Bibliaeri publikasionicha imecheri idioma jimbo, ka arhiaspti Jeobaeri testiguechani eskaksï kánikua sési úxapka engaksï petani japka informasioni para imecha engaksï irlandés uandajka.
Uarhiiti ma enga jatirikia, kánikua tsípispti engaksï Testiguecha íntskupka foietu ma galés jimbo. Ima uandaspti: “Engajtsïni inglesi jimbo aiachepiringa, jamberini no jiókuarhipiringa. Peruni kánikua tsitisïnga enga juchiti idioma jimbo jaka”.
Agostuni de 2014 jimbo, peeranhastiksï sánderu publikasionicha galés jimbo, sitiurhu jw.org. Imani kutsï jimbo, tsimani uelta sánderu inchanhaspti sitiurhu para arhintani informasioni ini idioma jimbo.
“Májku jásïchi idioma uandasïnga”
Ma xanhari, enga Jesusi na ióni uandontskuarhikuapkia tsimani imeri disipuluechani Karakateri ambe, imaksï tsípiparini uandaspti: “¿Andi no juchari mintsita pʼikuastaxapijtsïni engajtsïni xanharu jimbo jánhastapuni japka ambe engaksï arhikuekajka Karakatecha?” (Lukasʌ 24:32). Uánikua uelta, engaksï kʼuiripuecha jorhendanhajka Bibliaeri jurhimbikueri ambe, imecheri idioma jimbo, niárasïndiksï uánikua ambe kurhanguni ka mójtakunksï imecheri irekuani.
Emyr, achati ma enga Gales anapueka, ka enga pirenchi ma jingoni tembuchatini jaka, no méni uékaspti mítini témberi relijioniri ambe enga Jeobaeri testigueka. Peru enga amigu úkuarhipka Testigueri ma enga Russell arhinhajka, mójtakuspti imeri eratsikuani. ¿Andi? Ima uandasïndi: “Eratsispka estudiarini Bibliani Russell jingoni, engarini íntskupka libruni ¿Ambemindusï jorhentpejki Biblia? ka arhindini: ‘I libru galés jimbo karakata jarhasti, ka iásï uératini márkuchi estudiariuaka’”. b ¿Andisï Emyr uékapi estudiarini enga Russell ísï arhipka? Ima uandasïndi: “Tsimarhanchi májku jásï idioma uandasïnga, májkuenchi pʼindeska ka kurhangutsperasïngachi”. Méntkisï enga Emyr Bibliaeri ambe jorhenguarhienga galés jimbo, mintsitarhu pʼikuarhinhisïrendi, jimboka iámindu ambe sési kurhangusïrenga.
Jeobaeri testiguechaksï seguirixati jorhendaani kʼuiripuechani, jurhimbikua ambe Bibliaeri imecheri idioma jimbo, idioma enga mintsitarhu niáratspejka.