Iámu parhakpini jimboksï jarhasti kʼuiripuecha engaksï arhiantajka Bibliarhu anapu publikasionichani engachi Jeobaeri testiguecha uájka. Miioni kʼuiripuechaksï arhintasïndi publikasionichani elektroniku jimbo, ísï eskajtsï cha na úni jaka iáiasï. Peru, jamberiksïni ísku pakataati mítini na engachi xáni uánikua publikasionichani imprimiriuajka. Uéxurhini 2013 jimbo, uáskachi publikasionichani, 700 idiomecha jimbo, ka etsakuarhistiksï 239 paisicha ka territoriechani jimbo.

Ante de 1920, máteru empresechanchi arhiasïrenga paraksï imprimiriani juchari publikasionichani. Peruchi indeni uéxurhini jimbo úndaska imprimiriani máru rebistechani ka foietuechani edifisiu sapichu ma jimbo engachi rentaripka Brooklyn (Nueva York, Estados Unidos). Nájtukachi arisku sáni uénaaka, iásïchi 15 imprentechani jatsiaska uápurisï África, América, Asia, Europa ka Oceanía.

Biblia jindesti sánderu jukaparhakua libru engachi imprimirijka. Primeru Biblia enga imprimirikuarhika juchari imprentarhu jindespti King James Version (Versión del Rey Jacobo), 1942 jimbo. Desde 1961 uénaskachi imprimiriini ma libru jimbo Traducción del Nuevo Mundo de las Santas Escrituras inglesi jimbo. Para 2013 jimbo uáspkachia jukari 184 miioni i Bibliaeri 121 idioma jimbo.

Peru i ambe engachi exekia, nójtsïni iámindu ambe arhisïndi. Bibliaechaksï ambakiti materiali jingoni úkuarhisïndi. Sïranda ma úrakuarhisïndi enga no asidu jukaka, jimbosï no méni tsïpambijti. Ka ístu, pájinechaksï sési mátakuarhisïndi. Iámindu i ambe jimbo, Biblia ma uérasïndi enga ióni jamberi marhuajka nájtuka pauani pauani úrakuarhiaka.

Ístuchi imprimiriasïnga publikasionichani engaksï jarhuatajka kʼuiripuni paraksï kurhanguni Bibliani. Ju je exeni máru ambe enga 2013 jimbo úkuarhika:

• La Atalaya jindesti juchari publikasioni enga sánderu imprimirikuarhijka ka enga mándani kutsï uérajka. Imprimirikuarhisïndi jukari 120 idioma jimbo, ka rebista máesti enga sánderu etsakurhijka interu parhakpinirhu. I rebista 16 pájineristi ka 45 miioni imprimirikuarhisïndi mándani kutsïiri.

• ¡Despertad!, márkuksï uérasïndi La Atalaya jingoni, ka inde seguirisïndi enga ístu sánderu etsakunhajka interu parhakpinirhu. I 99 idioma jimbo imprimirikuarhisïndi. Ka mándani kutsï 44 miioni imprimirikuarhisïndi.

• ¿Qué enseña realmente la Biblia? libru máesti enga 224 pájina jukaka ka enga pasta kuatapiti ma jukaka, ka úkata jarhasti para jarhuatani kʼuiripuni paraksï úni kurhanguni ambe enga Biblia jorhentpejka. Desde 2005 jimbo, imprimirikuarhistiksïa jukari 214 miioni libruecha jukari 240 idioma jimbo.

• Kurhajcha je Tata Diosïni foietu máesti enga 32 pájinerika enga úkata jaka para imecha engaksï no újka sési arhintani. Jorhentpesïndi ambe enga Biblia arhijka, úrapariani sési járhati dibujuechani ka namunitu uandakuechantku. Jukari 42 miioni imprimirikuarhisti i foietu jukari 400 idioma jimbo.

Ístu Jeobaeri testiguechachi uásïnga máteru publikasionichani komueska libruecha, foietuecha, ka trataduechani engaksï jarhuatajka kʼuiripuni paraksï exeantani Bibliarhu anapu mókuntskuechani engaksï kánikua jukaparhakueka, ístu néna uérakuani problemechani, ka nénaksï úni sési irekani familia jingoni. Juchari imprentecharhu, uéxurhini 2012 jimbo imprimirikuarhistiksï jukari 1,300 miioni rebistecha ka 80 miioni libruecha ka Bibliaecha.

Edifisiuecha engaksï jimbo imprentecha jaka, juchachi Beteli arhiasïnga, enga arhikuekajka “Tata Diosïri Kʼumanchikua”. Imecha engaksï jurhajka miiuni ini edifisiuechani ískuksï pakarasïndi engaksï exejka ánchikuarhita enga ixú úkuarhijka: pirenchicha ka erachicha engaksï íntspijka imecheri uinhapikua ka imecheri tiempuni no ambe kobrariparini. Engaksï niárajka Beteli, kasi no nema mítisïndi néna ánchikuarhini imprentarhu. Peru programa ma jimbo enga jaka paraksï jorhendaani ka ambakiti pájperakua jimbo enga jima jaka, sésiksï jorhenguarhisïndi ánchikuarhini. Ma úsïndi exeani tumbichani engaksï sánitu sánderu de beinte jatiriika ánchikuarhinksï jarhani kʼérati mákinechani jingoni, engaksï újka imprimirini ma ora jimbo 200,000 rebistechani 16 pájineri.

Tumina enga úrakuarhijka para ini ánchikuarhitani úni interu parhakpinirhu jindesti engaksï kʼuiripuecha jandiajku íntspijka. Rebista La Atalaya, enga jiánisï mítikatepka eska Zionʼs Watch Tower (La Torre del Vigía de Sión), ka enga agostuni jimbo uérapka 1879 jimbo uandaspti eskachi jucha seguru jarhaska eskajtsïni Tata Diosï jarhuataxaka. Ka tátsekua uandaspti: “[Juchari kúnguarhikua] no méni jámaati tumina kurhajkuarhini ka ni kʼuiripuni arhini eskajtsïni jarhuataaka”. Ka májkuenchi eratsisïnga iásï.

¿Andichisï xáni tiempu, tumina ka uinhapikua inchajpajki para ini ánchikuarhitani úni? Jimbokachi uékasïnga eska ma ima miioni publikasionicheri o Bibliaecheri engachi imprimiriajka o engachi ini pájinarhu peerajka, jarhuatakaksïni chánksïni engajtsï ixú arhintani jaka, parajtsï andarherani Tata Diosïni.