No sáni fásilisti pirekua ma tradusirini. ¡Iásï eranhaska je na enga xáni ánchikuarhiteka tradusirini iámu libruni ma 135 pirekuecha jingoni!

Jeobaeri testiguechaksï ústi ini ánchikuarhitani, ka tanimu uéxurhini jimbo, úsptiksï tradusirini 116 idiomecha jimbo imecheri jimbanhi libruni pirekuecheri, enga arhinhajka Cantemos a Jehová. Ístu, edisioni ma enga 55 pirekuecherika tradusirinhasti máteru 55 idiomecha jimbo. Ka útasï uánikua idiomecha jimbo tradusirinhaati.

Jeobaeri testiguechaksï tradusiristia imecheri publikasionichani 600 idiomecha jimbo ísï, ka 400 i 600 idiomecheri Internetirhuksï jarhastia. Peru ma ambe jimbo úkua jukaxapti tradusiriuani ini pirekuechani, jimboka kústakua para i pirekuecha no ma idioma jimbo mójtakunhaspka.

Pirekua ma úntani no májkuenisti eska rebista ma tradusirini. Ejemplu ma, rebista La Atalaya jingoni, traduktorichaksï jánguarhintasïndi paraksï ísï tradusirini eska na jaka textu orijinalirhu. Peru i ambe no úsïndi ísï úkuarhini pirekuecha jingoni.

Para pirekuechani tradusiriuani sánititu ménderuenisti eska náki uéjki ma máteru informasioni tradusirini, jimboka aparti de májkueni kurhangukuarhini eska orijinali, ístu jatsiska para sési kurhaakuarhini ka ima uandakuechaksï úrakuarhini engaksï fásilika para miáni.

Frasechaksï pirekueri ma no jatsisti para úkua jukani, paraka ima enga pireaka kurhangupaaka ambesï arhikuekajki ka andisï ísï arhijki. Náki uéjki ma idioma jimbo, bersuechaksï jatsisti para sési jatantani ka terokuntani kústakua jingoni ka eskaksï iáminduecha uáka pʼikuarhinhikua jingoni pireni.

¿Nénaksï úski úni ini ambe traduktoricha? Ekipuechaksï no solu tradusiriuaspti frase orijinalichani inglesiri mándani uandakua jimbo. Sánderu sési, arhinhasptiksï eskaksï imani uandakuechani úraapiringa engaksï sési kurhangukuarhipiringa ka engaksï no úkua jukapiringa para miáni, peru eska májkueni kurhangukuarhipiringa ka pʼikuastpini eska orijinali.

Ambe engaksï orheta úpka, jindespti úni traduksioni ma mándani uandakua jimbo iámu pirekuecheri. Tátsekua, Testigu ma enga jorhenapka sánisï ambe úantaani pirekuechani, sési péraaspti letrechani paraka sési kurhaakuarhipiringa ka kurhangukuarhini. Tátsekua, ekipu enga tradusiripka rebisarispti pirekuani para exeni eska májkueni kurhangukuarhisïrenga eska orijinali.

Miioni Jeobaeri testiguecha interu parhakpini anapuecha, kánikua tsípikua jingonksï erokuarhispti jimbanhi libruni pirekuecheri. Ka uánikuaksï máteru erokuarhixati eska tradusirinhaaka imecheri idioma jimbo.