Para Jeobaeri testiguecha, no ma libru jarhasti enga sánderu jukaparhakueka eska Biblia. Pauani pauanchi úrasïnga para estudiarini ka para jorhendaani máteruechani ambakiti eianhperakua Tata Diosïri Reinueri (Mateu 24:14). Peru xáni úrani, sóntkuksï jiánguarhisïndi. Ísï jimbo, kánikuaksï jánguarhintasti para eska jimbanhi Biblia rebisada 2013 Traducción del Nuevo Mundo inglesi jimbo, ióni marhuapiringa ka eska sési xarharapiringa.

Uétarhinchaxapkachi Biblia ma enga ióni marhuapiringa. Ka indeni ambeksï arhispti máru Jeobaeri testiguecha engaksï imprentarhu ánchikuarhijka jini Estados Unidos, jerentini ma enga empresarhu ma ánchikuarhijka para libruechani uáni. “Xásï Biblia ma engajtsï cha uéjka no jarhasti —ísï arhiaspti jerenti—. No sési jarhasti, peru kasi iámindu Bibliaechaksï úkata jarhasti paraksï nomasi kasïperanhani oksï mesarhu peeranhani o jima enga Biblia píjtsïtanhajka ka no para eska ióni jamberi marhuauaka.”

Primeru Bibliaecha engaksï uérapka Traducción del Nuevo Mundo taparhakuni anapuechaksï no úsïrendi sési mátakuarhini. Ka astaksï xerekuarhintasïrendi enga kánikua aparhekuarhenga o enga kánikua tsʼirakuarhenga. Peru para Biblia ma úni enga úpiringa pauani pauani úrakuarhini na uéjki xáni aparhekuarhini o tsʼirakuarhini, ima engaksï imprentarhu ánchikuarhijka exesptiksï mámaru jásï materiali paraksï taparhakuni anapu jatsikuni ka ístuksï exespti na jásï pegamentu úrani ka néna enkuadernarinhapirini. Iámindu ini ambe jimbo engaksï úpka, uásptiksï máru taparhakuni anapuechani paraksï tsʼéjkuani ka jatsiparhakuasptiksï máru Bibliaechani. Tátsekuaksï arhiaspti máru Jeobaeri testiguechani eskaksï úraapiringa ma tiempu, máru jimesïsï anapuechani enga kánikua aparhekuarhenga ka máteruechani enga kánikua tsʼirakuarhenga komueska Alaska.

Seisi kutsï tátsekua, Jeobaeri testiguechaksï íntspiantaspti Bibliaechani. Ka imprentarhu anapu ánchikuarhirichaksï exeaspti nénaksï pakaraspi, ka jánguarhintasptiksï máteru Bibliaechani sánderu sési uáni. Pori iámindu, 1,697 Bibliaechaksï únhaspti para tsʼéjkunhani. Máruksï no uékaparini jimesïsï pakaraspti engaksï úpiringa no sési úkuarhinchani. Ejemplu ma, máechakua erantskutaspti jima jarhani enga janini japka ka máteru itsïrhu jatametixapti enga urakani ma nitamapka. Iámindu engaksï tsʼéjkunhapka marhuasptiksï para informasioni íntspini enga jukaparhakuepka asta ima jamberi engaksï no uékantku tsʼéjkunhapka.

Uéxurhini 2011, engaksï tsʼéjkunhani japka Bibliaecha, piánhasptiksï enkuadernadoraecha engaksï uinhamu ánchikuarhijka, ma para imprenta Ebina (Japón) anapu ka máteru para Wallkill (Nueva York, Estados Unidos) anapu. Ini ambe jimbo no solu uétarhisïrendi Bibliaechani uáni, sino ístu eskaksï tsimani imprentecha májkueni járhatichani uápiringa.

Uénani jámani uéxurhini 2012, tsimani imprentechaksï uénaspti uáni Bibliaechani Traducción del Nuevo Mundo de 1984, taparhakuni anapuecha jingoni engaksï jindepka turhipiti ka charhapiti (Granete) jimbanhi materiali ma jingoni, plástiku ma jingoni enga ísï mítikateka komueska poliuretano. Peru taparhakuni anapuechaksï niárasïrendi kánikua no sési jarhani o chunukurhini engaksï mátakunhenga ojecha jingoni. Jimboka pegamentu ka forru engaksï úrakuarhini japka jimbanhi enkuadernadorarhu nóksï úranhaspti engaksï tsʼéjkunhapka Bibliaecha. Nájkiruka jánguarhinhantapka sési pénhantani inde ambe, nóksï úspti ka nóteruksï imprimiriuasptia.

Ima engaksï uájka ini materialichani uandasptiksï eska inde ambe problema máeska para xásï taparhakutini anapuechani uáni ka eska kánikua úkua jukaspka para sési péntaani. Peru iámindu indeni ambe jimbo, ima engaksï imprentarhu ánchikuarhienga nóksï uandaspti eskaksï mejori nóteru uápiringia o eskaksï mejori imantku uápiringia engaksï taparhakutini taiapepiringa. Eratsetixaptiksïa eskaksï uápiringa taparhakutini anapuecha jingoni engaksï kuatapitipiringa ka engaksï no xerekuarhintapiringa. Tʼámu kutsï ísïksï uáspti pruebaechani úrapariani mámaru járhati pegamentuechani ka forruechani, astakaksï úpka exentani néna úni. Ka ménderuksï uénaspti imprimiriani.

Septiembrini de 2012, arhisptiksï imprentechani eskaksï nóteru uápiringia, eskaksï orheta kʼamajkuapiringa imechani engaksï jatsiapka ka eskaksï erokuarhipiringa jimbanhi bersioni ma Bibliaeri Traducción del Nuevo Mundo. Inde Biblia petanhapirindi 5 de oktubrini de 2013, tánguarhikua uéxurhiniri jimbo de la Watch Tower Bible and Tract Society of Pennsylvania.

Imprentechaksï intsïnhaaspti archibuechani elektroniku jimbo jimbanhi Bibliaeri 9 de agostuni de 2013, ka ísï pauandikua uénakuarhispti imprimirikuarhini. Primeru Biblia enga kʼamaranhapka, enga imprimirinhapka ka enga enkuadernarinhapka, uéraspti 15 de agostuni. Siete semana jimbo, imprentechaksï Estados Unidos ka Japón anapu ánchikuarhisptiksï chúskutani ka erantskutani. Ka ísï úspti eskaksï iámindu ima engaksï nípka tánguarhikuarhu uéxurhiniri jimbo úpiringa intsïnhani Biblia ma.

Nájkiruka i Biblia kánikua sési jáxeka ka sési úkata jarhani, no inde ambe sánderu jukaparhakuesti sino ambe enga jataka: eianhperakua máesti enga pʼímutantajka tsípikuechani. Ka ísï pauandikua engaksï na intsïnhapkia Biblia ma, uarhiiti ma enga Estados Unidos irekaka karaspti: “Diosmeiamu ini rebisioni jimbo, úsïnga sánderu sési kurhanguni Bibliani”.