México ka sinku paisicharhu Centroaméricaeri, 290 traduktorichaksï jarhasti enga jarhuajpijka paraksï tradusirikuarhini Bibliarhu anapu publikasionicha Jeobaeri testiguecheri jukari 60 idiomecha jimbo. ¿Andisï uétarhijki i ánchikuarhita? Jimboka engaksï kʼuiripuecha arhintajka ini publikasionichani imecheri idioma jimbo, sánderuksï sési kurhanguasïndi ka mintsitarhu niárakuasïndi ambe engaksï publikasionicha uandajka​(1 Korintu 14:9).

Paraksï sánderu sési uérani traduksionicha, máru traduktorichaksï engaksï Jeobaeri testiguecheri ofisinecharhu ánchikuarhienga jini siudadi de México, mótsistiksïa ima iretecha jimbo enga imecheri idioma uandanhajka. Iásï traduktorichaksï jima irekasïndi enga uandanhajka ima idioma engaksï ima tradusirijka, i ambe úsïndi eskaksï publikasionicha engaksï ima tradusirijka sánderuksï sési kurhangukuarhiaka.

¿Náksï pʼikuarherasïni traduktoricha engaksï mótsikia? Federico, enga tradusirijka para Nahuatl de Guerrero uandasïndi: “Diesi uéxurhini jarhaspka siudadi de México, ka májku familiantkusïni exentaka enga juchiti idioma uandaenga. Peru indeni iretecha jimbo engaksï no iauani jaka jima enga ofisina de traduksioni jaka, sáno iámu kʼuiripuechaksï uandasïndi ini idiomani”.

Karin, enga tradusirijka para bajo alemán ka enga Chihuahua mótsika, estadu ma enga México anapueka, uandasïndi: “Menonitecha jingoni irekani jarhuatasïndireni parani no mirikurhini juchiti idiomani. Ireta sapichuchi ma jimbo irekaska ka jimachi ánchikuarhisïnga, ka engachi bentanarhisï eraajka exesïngachi kʼuiripuechani enga marhuakuauaka juchari ánchikuarhita”.

Neyfi, enga maya jimbo tradusirijka ka enga iásï Merida (México) irekani jakaia, uandasïndi: “Engachi jorhentpejka Bibliaeri ambe maya jimbo, úsïngachi sési exeni náki uandakuechanksï no kurhanguasïni. Jiájkani, exesïngachi nénachi uá sánderu sési tradusirini indeni uandakuechani”.

¿Néna marhuakuasïni imechani engaksï arhiantajka publikasionichani ini idiomecha jimbo? Exe je ini ambe. Elena, enga tlapaneco uandajka, kuarenta uéxurhini nirasti tánguarhikuecharhu mándani semana Jeobaeri testiguecha jingoni, peru engaksï utusï uandaenga. Peru no úsïrendi sési kurhanguni ambe engaksï jima jorhentpienga. Ima uandasïndi: “Nirasïrenga tánguarhini, jimbokani mítispka eskani jatsispka parani jima jarhani”. Peru enga ima uénapka estudiarini Bibliani máru foietuecha jingoni engaksï tlapaneco jimbo jaka, úndaspti sánderu uékani Tata Diosïni ka niárasti jamberi aiakukuarheni ka itsï atakuarhini uéxurhini 2013 jimbo. Elena uandasïndi: “Diosmeiamukua arhisïnga Jeobani, engarini sésikua íntskuka parani úni kurhanguni Bibliani”.