Sábadu 9 de marsuni de 2013, Bibliaeri Jorhenguarhikua Galaadiri Watchtoweriri úspti graduasionini klaseri 134 jini engaksï Jeobaeri testiguecha jorhentpejka, Patterson (Nueva York). I eskuela jindesti para preparariuani Testiguechani engaksï ióni eianhpikia paraksï sánderu sési eianhpini. Entre 9,912 engaksï nípka graduasionirhu, jarhasptiksï familiaricha, amiguecha ka máteruecha engaksï pʼímarhinhapka.

Enga orhejtsïkupka programani jindespti Mark Sanderson, enga jindeka Grupueri enga Orhejtsïkuajka iámindu kúnguarhikuechani Jeobaeri testiguecheri. Erachi Sanderson, miátantaaspti imechani engaksï jima japka na enga jatini uénapka jarhani i eskuela, eska uénaspka 1 de febreruni de 1943, ase setenta uéxurhini. Imani tánguarhikuarhu, Nathan Knorr, enga orhejtsïkupka eskuelani, uandaspti kánikua mintsikakua jingoni para ambe jimbosï jarhajki i eskuela ari uandakuechani jingoni: “Uánikua ka mili jimboksï sánderu kurhaapirindi [ambakiti ambe Tata Diosïri Reinueri] engaksï japiringa sánderu ánchikuarhiricha kampurhu. Tateeri jarhuajperata jimbo, jauatiksï sánderu”. ¿Jukari ambe uandani japi?

Eratsinta je ini ambe: ísï tátsekua engaksï uénapkia klasecha, erachi Knorr biajarispti México para exeni náki lugaricharhuksï úpirini axaani misioneruechani engaksï graduarikuarhepiringia. Enga jini japkia, tánguarhikua ma úkuarhispti siudadi de México ka engaksï pʼímarhinhapka kúnguarhikuecha engaksï 240 kilometrisï (150 millas) uirhipandani japka ka 400 kʼuiripuechaksï tánguarhispti. ¿Ambe úkuarhipirini iásï, setenta uéxurhini tátsekua, engaksï primeru misioneruecha axanhapka, engaksï ménderu pʼímarhinhapiringa i mísmu tánguarhikuarhu? Úpirindiksï jukari 200,000 kʼuiripuecha tánguarhini.

“¿Ambejtsï kámaxati jájkirhu?”. Anthony Griffin, Komiteri enga orhejtsïkujka Sukursalini jini Estados Unidos, nitamataraspti ini diskursuni enga pʼitakata japka Éxodo 4:2. Ini bersikulurhu, Tata Diosï kurhamarhisïndi Moisesini: “¿Amberi kámaxaki jájkirhu?”, ka Moisesi mókukuspti: “Chkari ma”. Para Jeoba, ima chkari arhikuekasïrendi juramukua ka ánchikuarhita enga íntskupka Moisesini (Éxodo 4:5). Jeoba jaiapanhintasïrendi Moisesini, méntkisï enga úrenga juramukuani para kʼéri ambe arhini Tata Diosïni; peru enga úrapka para imajku kʼéri ambe exenhani ka no sési pʼikuastaani imeri ermanu jembechani ísï eska na úpka jini Meribá, Jeoba kastigarispti (Números 20:9-13).

Erachi Griffin terokutantaspti Moisesiri chkarini Bibliaeri jorhenguarhikua jingoni engaksï Galaadiri estudianticha pʼirajka. Ísï jimbo, arhiaspti eskaksï no méni jatsispka para juramukuani máteruechani ka arhini konsejuni íntskuaspti: “Aprobechari je ambe engajtsï intsïnhaka parajtsï kʼéri ambe arhini ka jukaparharani Jeobani. Engajtsï ísï úska, seguiriuakajtsï jindeni kʼéri kóntperata ma, para imecha engajtsï marhuakuauaka.

“Miánta je manani”. Stephen Lett, Grupueri enga Orhejtsïkuajka iámindu kúnguarhikuechani, uandaspti tʼámu ambe enga ma uáka jorhenguarhini imani milagrueri enga Tata Diosï úpka desierturhu enga íntsaapka mana, israelitechani.

• Jatsiskachi para seguirini uinhamu ánchikuarhini (Números 11:8). Paraksï israelitecha úni arani mana, jatsisptiksï para sóntku tántani, prepararini ka tátsekua úmantani (Éxodo 16:21).

• Nochi méni jatsiska para kejarikuarhini imani ambe jimbo engajtsïni Jeoba íntskujka (Números 11:5, 6). Israelitechaksï kejarikuarhispti mana jimbo ka Tata Diosïnksï no sési pʼikuastaspti. Ini jurhiatikuechani jimbo, jamberichi no méntkisï tsitiaka Bibliaeri informasionini engachi intsïnhajka, peru májkueni eska mana, méntkisïjtsïni marhuachiati. Jatsiskachi para agradesidu jarhani iámindu imani ambe jimbo engajtsïni Jeoba jorhendajka.

• Ju je kʼamakʼamasï mintsikani eskajtsïni Jeoba íntskuaka ambe engachi uétarhinchaaka. Israelitechaksï no méni kueratanchaspti mana. Asta jamberi, paraksï úni jatsini sábadu anapu, ma jurhiatikua antesi Jeoba sánderu íntsaasïrendi (Éxodo 16:22-26). Májkueni, juchajtuchi uáka seguru jarhani eskajtsïni Tata Diosï íntskuaka iámindu ambe engachi uétarhinchajka (Mateu 6:11).

• Jeoba no méni újchakuraasïndi imechani engaksï no kurhajchajka (Éxodo 16:19, 20, 25-​28). Ambe engajkuksï andapka israelitecha engaksï uékaenga sábadu jimbo tántani mana, jindespti eska Jeoba nóteru jaiapanhiantaapiringia. Ka imecha engaksï patsaenga imani jurhiatikuechani engaksï no jatsipka para ísï úni, mana tsïjpesïrendi ka karhasï jukarani.

Erachi Lett, arhiaspti eska miáni ini jorhenguarhikuechani uáti eskajtsïni Jeoba mítachiaka “auandarhu anapu puertechani” ka sési jimbojtsïni íntskuni “kóntperata ma astaka nóteru jauakia uétarhinchakua” (Malaquías 3:10).

“Prepararikuari je parajtsï jimbanhi parhakpinirhu irekani”. I temani nitamataraspti William Samuelson, enga orhejtsïkujka Departamentu para Organisasioniri Eskuelecha. Uandaspti eskachi kánikua tsitixakaia irekani jimbanhi parhakpinirhu. Peru ¿preparaduchi jarhaskia parachi jima irekani? Parachi preparadu jarhani jatsiskachi para ambakiti eratsikua ma jatsini (1 Pedru 4:7, Traducción del Nuevo Mundo).

Ima enga ambakiti eratsikua ma jatsika, mítisti eska no méntkisï uáka iámindu ambe sési úni. No kulparisïndi Satanasini ni imeri parhakpinini enga xáni no sési jánhaskuarheka, jamberi eratsiparini eska jimbanhi parhakpinirhu —enga Jeoba kʼamajkuakia no sési jásï ambeni— nóteru xásïuakia. Erachi Samuelson uandaspti eska jukaparhakueska desde iásï jánguarhintani jurajkuani no sési járhati pʼindekuechani komu no uandanhiani máteruechani jimbo, sino mójtakuni na engachi jásïka (Efesu 4:24).

“Jurajku je lápisini”. Mark Noumair, jorhentpiri ma, uandaspti eskachi ménichanisï “jupikasïnga lápisini —por ísï arhini— jimbokachi uékasïnga karani juchari irekueri istoria”. Peru ima uandaspti eskachi jatsiska para “jurajkuni lápisini” ka jurajkuni eska Jeoba karani jauaka juchari istoriani.

Rei Sauli sési uénaspti, peru tátsekua uékaspti “karani imeri irekuani”. Enga uénapka juramuni, no kʼéramakuarhisïrendi, kaxumbitispti ka no kʼéri ambe exekuarhisïrendi (1 Samuel 10:22, 27; 11:13). Peru no ióni jimbo, uénaspti jandiajku mintsikakuarhini ka jirinhani eska kʼéri ambe exenhapiringa. Tátsekua Tata Diosï nóteru jaiapanhintasptia jimboka no kurhajchaspka (1 Samuel 14:24; 15:10, 11).

Erachi Noumair uandaspti eska nájkirukaksï iásï estudianticha sési marhuakuni jaka Tata Diosïni, jatsistiksï para seguirini marhuani ísï eska Tata Diosï na jaiapanhintajka. Arhiaspti: “Jingontku je, nájkirukajtsïni Jeoba úrani jaka, inde ambe no arhikuekasïndi eskajtsïni jaiapanhintasïnga”. Por ejemplu, Moisesi no ísï úspti eska Tata Diosï na arhipka para úni eska itsï uérapiringa tsakapurhu. Ísï úkuarhispti eska ima na uékenga peru no jatsispti Jeobaeri kóntperata (Números 20:7-12).

“Ju je kúndantaani juchari bosichani ánjili jingoni enga auandarhisï karani jaka”. Sam Roberson, máteru jorhentpiri eskueleri, nitamataraspti diskursu ma enga pʼitakata japka Jaŋaskuecha (Apocalipsis) 14:6, 7. Tátsekua presentarispti máru estudiantichani engaksï xarhatapka ambe engaksï nitamakuarhipka eianhpikuarhu máru kutsï antesi. Estudianti ma enga apenasi sési pʼikuarherantani japka engaksï operaripka, eianguspti Jeobaeri ambe enfermerani ma ospitalirhu. Ima enfermera Perú anapuesti, jimbosï estudianti exerapti fotu ma enga pájinarhu jw.org jaka nani engaksï xarharajka máru erachicha engaksï eianhpini jaka jini Chachapoyas (Perú). I ambe úspti eska ima ka imeri uámba jiókuarhipiringaksï estudiu bíbliku ma.

“Enganiariskarini [...] ísï jimbo enganiarinhaska”. (Jeremías 20:7). Allen Shuster, enga jindeka Komite de Sukursaliri jini Estados Unidos, entrebistariuaspti tsimani temungurhirichani engaksï imani klaserhu japka. Íksï tʼámu estudianticha ísïksï pʼikuarherasïrendi enajki Jeoba enganiariuapi. ¿Néna jimbo? Uandantasptiksï eska uénakuarhu, eratsisïrengaksï eska eskuela kánikua úkua jukapiringa, peru enga na uénapkia, intsïnhasptiksï kánikua jarhuajperata. Marianne Aronsson, estudianti ma, kánikua agradesida jarhaspti eskuela jimbo. Ima uandaspti: “Nóteruni méni jámani jauakia jirinhani ambe estudiarini, jimbokani kuenta íntskukuarhiskia eska mándani bersikulu Bibliaeri, tesoru máeska.

“Jánguarhi je ísï mintsikani Diosïni eska imecha”. David Splane, Grupueri enga Orhejtsïkuajka iámindu kúnguarhikuechani, nitamataraspti programaeri diskursu prinsipalini. Ka pʼitakata jarhaspti Ebreu 13:7, enga arhijka: “Miánta je chári arhistatspitichani engaksïni jorhendaka Diosïri uandakuani, ka eratsinta je na engaksï xáni ambakiti ambe úka imecheri sési jángua jimbo, ka jánguarhi je ísï mintsikani Diosïni eska imecha”. Uandaspti eska imecha engaksï ase setenta uéxurhini orhejtsïkuenga Jeobaeri testiguecheri ánchikuarhitani, jindespkaksï ambakiti ejempluecha de na engaksï mintsikapka Jeobani. Ju je exeni na engaksï úpka.

Erachi Nathan Knorr, 24 de septiembrini de 1942, organisarispti tánguarhikua ma direktoricha jingoni tsimani organisasionicheri engaksï Jeobaeri testiguecha úrani japka jiánisï ka arhiaspti náksï exepirini para jatsini jimbanhi eskuela ma: Galaadi. ¿Para ambe marhuapirini i eskuela? Preparariuani misioneruechani engaksï orhejtsïkupiringa eianhpikuani jimbanhi territoriuecharhu. Peru imani tiempuechani jimbo kánikua úkua jukaxapti, jimboka jiáni sánderu no sési jánhaskuarhexapka II Guerra Mundiali jimbo, inde ambe úspti eska uánikua paisicharhu nóksï úpiringa inchani misioneruecha. Ka ístu, iámu parhakpinirhu nóteru káni jarhasptia tumina imani ambe jimbo enga úkuarhipka uéxurhinicharhu 1930. Ka tumina enga organisasioni jatsipka para úrani eskuelarhu, para sinku uéxurhinijkusï andagupirindi. Peru nájkiruka ísï úkuarhini japka, iámindu erachichaksï kánikua mintsikakua jingoni jiókuarhispti eska uénapiringa ima eskuela.

Graduaduecha engaksï primeru klasecharhu Galaadiri japka, ístuksï xarhataspti kánikua mintsikakua, engachi juchajtu uáka xarhatani. Jorhenguarhistiksï konformi jarhani imani ambe jingoni engaksï jatsikuarhipka ka nóksï jirinhaspti jatsikuarhikua ambe (Ebreu 13:5, 6). Uánikuaksï eratsispti eskaksï nóteru méni exeapiringia imecheri familiechani, jimbokaksï no jatsikuarheriska ka nóksï úpirindi jarhuataani tumina jingoni paraksï meiampikuani biajini. Ísï jimbo, uánikuaksï diesi o kinse uéxurhini jimboksï exejperantaspti imecheri familiauecha jingoni. Peru iáminduechaksï seguru jarhaspti eska Jesusi seguiripiringa kuidariuani imechani ka ístu imecheri familiauechani, ísï eska méntkisï (Ebreu 13:8).

Erachi Splane uandaspti ambe engaksï máru estudianticha nitamanchapka engaksï marhuani japka territoriuecharhu engaksï kánikua úkua jukapka máteru paisirhu, ante deksï Galaadi nirani. Tátsekua i ambe arhiaspti estudiantichani: “Chájtsï jindeska jimbanhi generasioni ma engajtsï juka Eskuela Galaadiri, erachicha ka pirenchicha engajtsï no méni jurajkujka Jeobani, iásïjtsï chájtu kuenta úkuarhisïngia ini istoria jingoni enga setenta uéxurhini úkuarhikia, [...] Marhuaku je Jeobani tsípikua jingoni nani uéjkijtsï jarhani”.

Erachi Splane kʼamarhukuspti presentariparini 77 graduaduecheri fotuechani engaksï iásï marhuani jakaia Jeobaeri testiguecheri sukursalirhu, jini Estados Unidos. Tsimanksï jindespti engaksï primeru klaserhu japka, uéxurhini 1943 jimbo. Ístu, ima presentasioni, nitamataranhaspti pirekuecha jingoni engaksï setenta uéxurhinisï antesi Testiguecha úraauenga.

Engaksï na intsïnhaapkia diplomechani, graduadu ma arhintaspti karta ma iámu klaseri enga uandenga eskaksï kánikua agradesidu jarhaspka. Erachi Sanderson kʼamarhukuspti programani uandaparini eska nájkiruka nitamapkia 70 uéxurhini, útasïksï marhuasïndi ima uandakuecha enga erachi Knorr arhiapka primeru klaseni: “Nani uéjkisï engajtsï axanhaaka, miá je eskajtsï jindeska [...] Reinueri aianhpiricha ka eskajtsï jatsiska sánderu kʼéri kóntperata enga no nema jatsini jaka ixú Echerirhu: aianhpini iásï eska Tata Diosï kʼéri ambeska, ante de uénani Armajedoni. [...] Mientrasi engajtsï jatsiaka kóntperata para eianhpini, eianhpi je”.