Jeobaeri testiguechaksï jatsispti serie ma kʼéri tánguarhikua espesialicheri jini Brasil, Costa Rica, Hong Kong, Irlanda, Israel, Nueva Zelanda ka Suecia. Primeru kʼéri tánguarhikua i serieri úkuarhispti Suecia, juliuni de 2012 jimbo, ka tanimu últimuechaksï úkuarhispti Costa Rica ka Nueva Zelanda, eneruni de 2013.

Ísï eska na úkuarhijka máteru kʼéri tánguarhikuecharhu tanimu jurhiatikueri engaksï Jeobaeri testiguecha uájka mándani uéxurhini, programarhu para kʼéri tánguarhikuecha espesialiri, ístuksï jarhasïndi diskursuecha, xarhatakuecha ka dramecha.

Ini kʼéri tánguarhikuecharhu jarhasptiksï máteru paisirhu anapu Jeobaeri testiguecha. Antesi ka tátsekua de mándani tánguarhikua, bisitantichaksï úspti miiuani máru lugarichani engaksï antesi erakunhapkia parakaksï imecha miiupiringa.

Erachi ma enga pʼímarhinhapka kʼéri tánguarhikuarhu enga Brasil úkuarhipka, uandaspti: “Kánikuani sési pʼikuarheraspka exeni erachicheri kʼéri uékperakuani ka na engaksï xáni sési kámpijka. Ísï pʼikuarheraspka enajki juchiti familia ma repentku sánderu kʼépi”.

Ka máteru enga nípka kʼéri tánguarhikuarhu jini Hong Kong, uandaspti: “Kánikuani sési pʼikuarheraspka exeni na engaksï erachicha xáni tsípipka, na engaksï xáni uinhamu jupikauenga jimbanhi publikasionichani engaksï intsïnhapka idioma mandarín jimbo ka na engaksï asta jamberi uerapka”.

Mándani uéxurhini, Jeobaeri testiguechaksï uásïndi kʼérati tánguarhikuechani interu parhakpinirhu, ka miioni kʼuiripuechaksï nirasïndi.

I tánguarhikuecharhu jarhasïndi uékperakua, tsípikuarhita ka pínandikua engaksï Jeobaeri testiguecha jatsijka. Ka ini ambe sánderuchi úsïnga exeni kʼéri tánguarhikua espesialicharhu ka internasionalicharhu. Enga orejkia para tʼireni, erachichaksï tsípikuarhita jingoni uandontskuarhisïndi, márkuksï tʼiresïndi, regalu ambe intsïmperasïndiksï, datuechani, pʼitakuarhiasïndiksï fotuechani ka sésiksï kámberasïndi.

Ka eska na únhajka iámindu kʼérati tánguarhikuecharhu, ístuksï sési erokaasïndi imecha engaksï no Jeobaeri testigueka.