Uéxurhini 2013 jimbo, jurhiatikua 6 de juniu uératini a 16, miioni kʼuiripu interu parhakpini anapu, niraspti puertu de Ruán, enga nortirhu ísï jaka Francia, para exeani sánderu kʼérati barkuechani engaksï jima tánguarhipka: Armada.

Engaksï na karhamapkia 120 kilometru (75 millas) riu Sena jimbo, enga Normandía ísï nitamajka, barku sánderu kʼératicha ka sési járhaticha interu parhakpiniri, 7 kilometruksï úraspti (4 millas) imani malekonirhu enga prepararinhapka paraksï niárani. Diesi jurhiatikua ísï, bisitantichaksï úspti karharani máru barkuecharhu ima 45 barkuecheri engaksï sánderu mítikateka ka engaksï jima japka imani jurhiatikuechani.

¿Andisï xáni uáni kʼuiripu nípi? Seguni ima enga organisaripka ka enga uaxastaka Armadani, no iauani uératini exeani xáni kʼérati barkuechani, úsïndi eska kʼuiripu mámaru ambe eranhaskaaka. Jimbokaksï i kʼérati barkuecha úsïnga eskaksï sáno iámindu kʼuiripuecha —tumbicha ka ístu kʼératicha— eranhaskaaka nirani lugaricharhu engaksï iauani jaka ka librenksï.

Uánikua turistechaksï ístu kurhaspti nénaksï uá sési jimbo libreni, jorhenguarhiparini Bibliaeri ambe (Juanu 8:​31, 32). Engaksï miiuni japka Ruán ka inchaakuni xanharuecharhu engaksï no kórurhaka ka enga uánikua jánhani japka, exeasïrendiksï exibidorichani engaksï Jeobaeri testiguecha preparariapka para jiáni úraani. Enga turista o marineru ma andarhieraenga exibidorini ma, pʼímarhisïrendiksï para pʼíkuni publikasioni ma no ma tumina jimbo. Uánikuechaksï tsitispti La Atalaya juniuerini de 2013, enga arini temani jukapka: “¿Cuándo desaparecerán los prejuicios?”. Ístuksï pʼímarhiasïrendi paraksï nirani arhijtsïkperata ma kurhaani francés, inglés o utusï jimbo.

Máru jima anapuechaksï kánikua jukaparharaspti Jeobaeri testiguecheri ánchikuarhitani. Achati ma, ísku pakaraspti enga exeapka máru Testiguechani engaksï xanharu japka exibidori ma jingoni ka uandaspti: “¡Kánikuaksïni tsípisïnga ixú exeni! No májkueni ambe jakajkusïnga eska cha, peruni sési exeasïnga iáminduechani engaksï —komueska cha— meru újka ambe engaksï jakajkujka”. Tsimani achaticha engaksï jatirikia i ambeksï arhiaspti tsimani tumbi Testiguechani: “Uákajtsï sési pʼikuarherani indeni ambe jimbo engaksï jindeka”.