Jeobaeri testiguechanksï méntkisï exeasïndi eianhpini jarhani kʼumanchikuecharhu. Peru ístuksï iásï, exeasïndi jimesïsï enga uánikua jánhani jarhajka exibidoricha jingoni para publikasionicha.

Iásï no ióni sánderu úrakuarhixati i ambe para eianhpinhani. Í jásï eianhpikua uénaspti úkuarhini siudadi de Nueva York nobiembrini 2011 jimbo. Ma grupu Jeobaeri testiguecheri úraasptiksï mesechani ka karrituechani paraksï exerpini publikasionichani, ka para jorhendaani kʼuiripuechani Bibliaeri ambe. I ambe kánikua marhuaspti ka jimboksïsï eratsipti májkueni úni máteru iretecha jimbojtu.

Para marsuni 2015 jimbo, Jeobaeri testiguecheri kúnguarhikuecharhu iámu parhakpinirhu intsïnhasptiksïa 165,390 exibidorichani, o karrituechani. Ístuksï úrakuarhisïndi mesecha, kioskuechani ka máteru járhati exibidorichani.

Útasïksï Jeobaeri testiguecha nirasïndi eianhpini kʼumanchikuecharhu para jorhendaani kʼuiripuechani Bibliaeri ambe. Peru ístu, exibidorichaksï kánikua marhuasïndi. Ju je exeni máru ejempluechani.

Perú, achati ma enga arhinhajka Rauli andarheraspti Jeobaeri testiguechani máru engaksï exibidorirhu japka ka arhiaspti: “¿Nanijtsï jarhaspi? Tanimu uéxurhinistia engaksïni jirinhantani jámani japka. Engani exepka chári karrituni, diosmeiamukua arhispka Tata Diosïni”.

Jeobaeri testiguechaksï aianhpisïrendia jimesïsï enga Rauli irekapka, peru no jarhasïrendi imeri kʼumanchikuarhu chúskutani ni sábadu ka dominguechani. Rauli eianguaspti eska estudiarispkia Jeobaeri testiguecha jingoni ka eska iásï ménderu uékasïrenga jorhenguarhini Bibliaeri ambe. Ka imaksï uáspti arregluechani para nirani pʼorhembini.

Bulgaria, temungurhiri ma engaksï nótki xáni kʼéripka anhaxurhisptiksï exibidorirhu ma ka pʼíkusptiksï libruni El secreto de la felicidad familiar. Ma semana tátsekua ménderuksï kʼuanhatsintaspti ka pʼíkuasptiksï libruechani Juchiti libru enga Bibliaeri ambe uandajka ka Aprendamos del Gran Maestro. Jeobaeri testigu enga karriturhu japka kurhamarhiaspti namuntsï sapiichani kásïni. Ka imaksï mókuntaspti: “Nótkichi ma kánguarhisïnga, peru engachi ma jurhiani kánguarhiska, uékasïngachi eska mítiaka Tata Diosïni. Ka íksï libruecha jindesti engachi meru uétarhinchani jaka”.

Ucrania, achati ma enga militariri xukuparhatini jámani japka andarhieraspti maru pirenchichani engaksï karriturhu japka ka arhiaspti: “Uátsïcha, arhijtsïni je na jatini juua Armajedoni”. Nótki iónispti enga achati nípka guerrarhu, jini Ucrania. Ambe enga úkuarhini japka parhakpinirhu úspti eska achati kurhangupiringa eska Armajedoni no ióni jimbo jupiringia ka kurhamarhikuarhisïrendi andisï Tata Diosï nótki ambe ma uéni. Jeobaeri testiguechaksï Biblia jingoni eianguspti andisï Tata Diosï nótki ambe ma úni jaki, peru eska no ióndani kʼamajkuajka no sési jásï ambeni. Achati jiókuarhispti rebistechani La Atalaya ka ¡Despertad!, ka libruni ¿Existe un Creador que se interese por nosotros?

Macedonia, engaksï Jeobaeri testiguecha eianhpini japka karriturhu ma, tumbi ma arhiaspti eska arhiantaspkia rebistechani ka eska iásï uékasïrengia libruni ¿Ambemindusï jorhentpejki Biblia? Engaksï íntskupkia, arhiaspti eska seguiripiringa nirani arhintani bibliotekarhu ma.

Tsimani ora tátsekua, enga na arhintapkia 79 pájinechani, tumbi kʼuanhatsentaspti ka uandani: “I librukini mójtakuchesïndi tsípikuani. Niáraskia uánikua ambe kurhanguni engani no uénga jánhaskani. Iámu ambe enga libru arhijka meru ísïsti eska na uandajka. Iásï ménderueni exesïngia tsípikuani”.