Uánikua kʼuiripu jakajkusïndi eskaksï Estados Unidos anapu indijenecha imani iretecharhu ísï irekaska engaksï iauani jaka. Peru jukari 70%, siudadicharhuksï irekasti. Indijena amerikanuechaksï úntaspti kʼuínchikua ma, 5 a 7 de juniuni de 2015 jimbo enga arhinhaenga “Gateway to Nations” (Puerta a las Naciones) jini Nueva York, iretarhu enga sánderu kʼéka Estados Unidos.  Engaksï Nueva York anapu Jeobaeri testiguecha mítipka eska úkuarhipiringa ima kʼuínchikua, seguirisptiksï prepararikuarhini para nirani. ¿Andi?

Jeobaeri testiguechaksï tradusirisïndi Bibliaeri publikasionichani uánikua idiomecha jimbo, ka uánikuaksï idiomecha indiu amerikanuesti, komueska cree de las llanuras, dakota, hopí, mohaqués, navajo, odawa ka piesnegros. Ísï jimboksïsï Jeobaeri testiguecha pérapti ini kʼuínchikuarhu sési járhati exibidorichani publikasionicha máru jingoni, komueska trataduni Usted puede confiar en el Creador.

Juchari pájina Internetirhu, ístuksï jarhasti grabasionicha sáno iámindu ima idiomecheri engachi uandakia. Jeobaeri testiguechaksï jatsikukuasïrendi ini grabasionichani máru kʼuiripuechani engaksï andarherauenga ka engaksï kuenta íntskukuarhienga eskaksï sáno iámindu máteru exibidoricha, letreruecha ka presentasionicha solu inglesi o utusï jimbo jarhaspka.

Uánikua kʼuiripuechaksï ísku pakaraspti ánchikuarhita jimbo engachi újka para tradusiriuani juchari publikasionichani xáni uáni idioma indijenechani jimbo ka ánchikuarhita jimbo engachi újka para jorhentpini Bibliaeri ambe kʼéri iretecharhu ka iretecharhu engaksï iauani ísï jaka. Enga mítipkia nákiski juchari ánchikuarhita, kʼuiripu ma enga jima ánchikuarhienga kurhajkuarhispti estudiu bíbliku ma ka uandaspti: “Meru uékaxaka eskajtsïni pʼorhembiaka ka jorhenguarhini Bibliaeri ambe”.

Temungurhiri indijena ma engaksï no kurhauenga, andarherasptiksï exibidorini ma, peru Testiguecha engaksï jima japka nóksï úspti uandontskuarhikuani. Jimajkani niáraspti Testigu ma enga jorhenapka seniasi. Treinta minutu ísï uandontskuarhispti imecha jingoni, ka jarhuataaspti jirinhantani nani úkuarhipirini Jeobaeri testiguecheri kʼéri tánguarhikua ma seniasi jimbo, enga no xáni iauani pakarakuapiringa.

Jukari 50 Jeobaeri testiguechaksï jarhuajpispti ini ánchikuarhitarhu para jorhentpini Bibliaeri ambe imani tanimu jurhiatikua enga duraripka ima kʼuínchikua. Íntsaasptiksï jukari siento sinkuenta publikasionichani imechani engaksï andarheraapka exibidorichani.