Obregón andajpenuska, kʼéri ireta ma enga nortirhu ísï jaka México. Juchiti tátichaksï nuebe sapiichani kaaspti ka jí iúmuespka. Kʼéri iretarhu uéramanisïchi irekaspka, nani enga papa jefipka ranchueri ma. Kánikua sési jándespti jima para irekani ka juchiti familia márku jarhaspti ka tsípikua jingonchi irekaxapka. Peru no sési ambe úkuarhispti engani ji sinku jatiripka, urakani ma úkuarhispti ka iámu ambe xerentaspti, ísï jimbo, máteru ireta jimbochi niraspka irekani.

 Juchiti táti uénaspti sési andani, peru ístu kánikua kauisïrendi. Inde ambe úspti eskachi nóteru sési japiringuia familiarhu. Juchiti ermanuecha ka ji, uénaspkachi itsutani imani sigaruecha jingoni engachi papani sïpakuauenga. Ji apenasi seisi jatirispka engani uénapka kauini. Ísï tátsekua, juchiti tatichaksï jurajperasti ka ji uénaspka sánderuni kauini ka itsutani.

 Mama, máteru acheeti jingoni niraspti irekani ka imani jingontsïni páspti. Ima acheeti no íntskusïrendi tumina mamani ka nóchi andangutasïrenga imani tuminani enga mama andenga. Ísï jimbo, juchiti ermanuecha ka ji, uénaspkachi ánchikuarhini ambe uéjki engachi exentapiringa. Peru útasïchi no andangutasïrenga para imani ambejku piáni enga sánderu uétarhijka. Ji, sapatuechani jámasïrenga ataantani ka kurhinda atarantani, periodiku ambe, chikle o máteru ambe. Ístuni tʼirekua ambe jámasïrenga jirinhantani jimesïsï engaksï jatsikuarhiricha tsïtenga basurarhu.

 Engani 10 jatiripka, acheetirini ma pʼímarhispti parani imani jingoni ánchikuarhini jima enga iretarhu anapu basura kʼuanikunhenga. Arhispka eska jo, nóteruni niraspkia eskuelarhu ka ístuni uéntaspka kʼumanchikuarhu. No jamberirini 10 pesu maiamusïrendi ka imani tʼirekuarini íntskusïrendi enga basurarhu exentenga. Kʼumanchikueni jásï ma úkuarhispka imani ambe jingoni engani basurarhu exentapka. Imani kʼuiripuecha jingoni engani jarhenga, no sési jásï ambeksï uandasïrendi ka ísku jándikua ambeksï niátani. Uánikuechaksï droga ambe úrasïrendi ka kauini. Jiánisïspti engani sánderuni no sési ambe nitamakuarhipka. Chúrikuechani, pauani pauani uerasïrenga xáni chéni. Kánikua kʼuratsesïrenga engani xáni pobripka ka engani no estudiaripka eskuelarhu. Tanimu uéxurhini irekaspka jima enga basura tsïtanhenga. Tátsekua máteru estadu jimbo mótsespka mismu paisirhu, nani engani ánchikuarhipka jima enga tsïtsïki ambe ikaranhenga, algodoni, papasï ka sïmba enga jindeka para asukari úni.

 Tʼámu uéxurhini tátsekua, Obregón kʼuanhatsentaspka. Juchiti tía ma enga sïkuamipka, kuarturini ma íntskuspti imeri kʼumanchikuarhu. Uénaspka no sési ambe tsánharhini, ka kánikua kómu pʼikuarherani engani jamberi uékapka uándikukuarhini. Chúrikua ma jimbo, kómarhispka Tata Diosïni ka arhispka: “Tata, engari meru jaka, uékasïngakini míteni ka marhuachenguini para méntkisï. Enga jaka relijioni ma enga jurhimbitika, uékasïnga míteni”.

 Méntkisï tsitiska Tata Diosïri ambe. Engani sapi máepka, uánikua relijionicha jingoni niraspka tánguarhini. Peru no ma úspti eskani sési pʼikuarherantapiringa. Nójtsïni uánikua ambe jorhendaspti Bibliaeri ambe nijtsïni jarhuatapi míteni Tata Diosïni. Máru relijionichaksï kánikua jukaparharasïrendi tuminani ka máteruechaksï ísku jándikua ambe niátasïrendi.

 Engani 19 jatiripka, juchiti kuniadurini ma arhispti eska Jeobaeri testiguecha exeraspka ambe enga Biblia jorhentpijka diosï úkatecheri ambe. Arhichentasptirini Éxodo 20:4, 5, nani enga arhijka eskachi no jatsiska para diosï úkatechani uáni. Bersikulu 5 uandasïndi: “Nori jatsiska para kʼutitseni imecheri orhepani jimbo ni jurajkutakuarhini parakari marhuakuauaka, jimbokani ji Jeoba chíti Tata Diosï, jindeska ma Diosï enga kurhajkuarhijka eskarini solu jatsiska para jíndintku marhuachini”. Jiájkandini juchiti kuniadu kurhamarhispti: “Enga Tata Diosï úraapiringa diosï úkatechani para milagruechani uáni o uékani eskachi diosï úkatechani úraapiringa para imani kómarhini, ¿andisï indeni ambe juramupirini?”. Inde ambe úspti eskani eratsentani pakarapiringa. Jiáni uératini, uénaspkachi someni uandontskuarheni Bibliaeri ambe. Jimbokani kánikua tsitisïrenga inderi ambe uandontskuarheni, no jamberini kuenta íntskukuarhisïrenga na enga tiempu sóntku nitamenga.

 Ísï tátsekua, juchiti kuniadu jingoni niraspka Jeobaeri testiguecheri tánguarhikua ma jimbo. Ískurini pakataspti ambe engani jima kurhaapka ka exeni. ¡Asta sapirhatichaksï mókuntasïrendi tánguarhikuarhu ka sésiksï úsïrendi nájkiruka xáni uánikua kʼuiripu japka! Ískurini pakataspti na engaksï kʼuiripuecha xáni sési jorhendanhajka. Nájkirukani jauiri iórhati jukapka ka no xáni sési mórhekuarhitini nirani, iáminduechajtsïni sési kámaspti. Astarini familia ma pʼimarhispti parani tʼireni imecha jingoni enga na kʼamakurhipkia tánguarhikua.

 Engani Bibliaeri ambe jorhenguarhipka Testiguecha jingoni, jorhenguarhispka eska Jeoba jindeska Táti uékpiti ma enga uandanhiajka juchantsïni jimbo no arhiparini sinchi jatsikuarhiriski o nómbe, nani engachi anapueka o na xánchi ióni jámaski eskuelarhu. Ima, Tata Diosï máesti enga iáminduechani májkueni exeajka (Uku. 10:34, 35). Iásï kʼóruni mítespkia ambe engani xáni uékani japka míteni Tata Diosïri ambe.

 Ji uénaspka kánikua ménderueni irekani. Nóteruni itsutasïrenguia, kauini ni no sési jásï ambe uandani. Uénaspka nóteruni kurhurjaxenia imani ambe jimbo engani antesi nitamakuarhipka ni no sési jásï ambe tsánharhini. Ístuni nóteruni ísï pʼikuarherasïrenguia enajkini no ma ambe jukaparhapi imani ambe jimbo engani sapichuetini nitamakuarhipka ka engani ísï no ióni jámapka eskuelarhu.

 Iásï, ambakiti uarhiitini ma jatsiska enga xénchajka Jeobani ka engarini kánikua jarhuatajka. Sirkuitueri orhejtsïkutiska Jeobaeri testiguecheri ka pʼorhembiasïnga kúnguarhikuechani parani uinhaperantaani ka jorhendaani juchiti erachichani. Jimbokarini Biblia kánikua sési pʼikuastantaska ka jimbokarini Jeoba ambakiti ambe jorhendaska, nóteruni kʼuratsesïnguia.