La Ceiba (Honduras) andajpenuska. Juchiti tátichaksï sinku uájpechani kánguarhiasti: tʼámu nanakechani ka jíndeni engani sánderu sapichueka. Jíjkusïni no újka kurhaani, ísï andajpenuska. Jimesïsï engachi irekaspka no sési ambe úkuarhisïrendi ka pobrispkachi. Ka uénaspkachi sánderu no sési nitamakuarhini jiáni enga juchiti táti aksidenti ma jimbo uarhipka imeri ánchikuarhitarhu. Jí solu tʼámu uéxurhini jatirispka.

 Mama kánikua jánguarhintasïrendi parajtsïni sési kuidarini, nájkiruka no méntkisï jatsienga sentabu parajtsïni xukuparhakua ambe piácheni. Kánikuachi tsʼirasïrenga jimbokachi no káni kánguarhisïrenga xukuparhakua ambe, sánderia jiáni enga janienga.

 Sánhani arhispka jorhenguarhini seniasi hondureño jimbo uandani (LESHO) ka ísï úsïrenguia imecha jingoni uandontskuarheni engaksï ístu no uénga kurhaani. Joperu mama ka juchiti jingonikuechaksï no jorhenaspti seniasi jimbo uandani, jimboksïsï újtsïkuarheapti máru seniasichani paraksï úni jíndeni jingoni uandontskuarheni. Joperurini mama kánikua xénchperakua jingoni kuidaristi, ka sánisï enga mítepka seniasi jimbo uandani, arhisïrendirini eskani jingontku jámapiringa parani no niárani droga ambe kámani ni kauini. ¡Kánikua agradeserikusïnga engarini jarhuataka parani no niárani indeni ambe úni!

 Engani sapichuepka mamarini pájtasïrendi misa. Peru no ma ambe kurhangusïrenga jimboka no nema jarhaspti engarini aiangupiringa ambe enga uandanhani jarhenga. Xáni kuatantasïrenga engani jamberi nóteru nípkia engani 10 jatiripkia. Joperuni uékasïrenga míteni Tata Diosïni.

 Uéxurhini 1999 jimbo engani 23 jatiripka, Estados Unidos anapu uátsïni ma mítespka enga iglesia ebanjeliku jimbo tánguarhienga. Imarini jorhendaspti Bibliaeri ambe ka ístu seniasi amerikanu jimbo uandani. Xáni tsitispka imani ambe engani jorhenguarhipka engani jamberi niárapka pastori úkuarhini. Ísï jimbo, Puerto Rico mótsispka parani jorhentperakua religiosu ma jimbo estudiarini, nani engaksï jorhendauenga imechani engaksï no újka kurhaani. Engani La Ceiba kʼuanhatsentapka 2002 jimbo, Iglesia ma úspka para ima kʼuiripuecha engaksï no újka kurhaani ka máru amiguechajtsïni jarhuataspti, ma jindespti Patricia engani jingoni niárapka tembuchani.

 Jimbokani jí pastorispka juchari iglesiarhu, LESHO jimbo nitamataraasïrenga arhijtsïkperatechani ka exeraasïrenga dibujuechani engaksï Bibliaeri istorieri ambe uandajka o úparini ambe ma parakaksï úpiringa kurhanguni ima kʼuiripuecha engaksï no újka kurhaani. Ka ístuni imani iretecharhu nirasïrenga engaksï no iauani japka parani pʼorhembiani imani kʼuiripuechani engaksï no újka kurhaani parani jarhuataani imecheri uandanhiatecha jingoni ka uinhaperantaani. Asta Estados Unidos ka Zambia niraspka komueska misioneru ma. Joperu, parani jurhimbitku uandantani no káni mítespka Bibliaeri ambe; imani ambejkusïni uandantenga ambe engajtsïni aiangupka o ambe engani kurhangupka dibujuecha jimbo. Ambe enga ísïpka, jindesti eskani sánderu uánikua kurhamarhikuechani jatsiaspka ka eska mókuntskuechani.

 Ma jurhiatikua, máru uarhiiticha engaksï juchiti Iglesiarhu nireenga, uénasptijtsïni chkuanderakua ambe jauatacheni. Uandasptiksï eskani kauicha máespka ka eskani enganiarixapka juchiti uarhiitini. ¡I amberini kánikua no sési pʼikuastaspti! Ísï tátsekua, Patricia ka jí jurajkuspkachi Iglesiani!

 Jeobaeri Testiguechajtsïni uánikua xanhari pʼorhembisptia Patriciani ka jíndeni, peruchi nómeni kasu úkuaxapka. Joperu ísï tátsekua engachi na jurajkupkia Iglesiani, Patricia uénaspti jorhenguarhini Bibliaeri ambe Thomas ka Liccy jingoni, temungurhiri ma engaksï Jeobaeri testigueka. Ískurini pakataspti engaksï uénga seniasi jimbo uandani nájkirukaksï uénga kurhaani. Ka ísï no ióni jimbo, jíjtuni uénaspka imecha jingoni jorhenguarhini Bibliaeri ambe.

 Máru kutsïcha jimbo, jorhenguarhispkachi Bibliaeri ambe bideuechani exepariani engaksï seniasi amerikanu jimbo japka. Meru jiánisïksï máru juchari amiguecha uandaspti eskaksï Jeobaeri testiguecha imani kʼuiripuecheri eratsekuechani chúngumaaxapka engaksï orhejtsïkuauenga ka indeni ambe jimbochi nóteru seguirispkia jorhenguarhini. Nájkirukarini Thomas exerapka eskaksï Testiguecha no ma kʼuiripuni chúngumaxapka, no jakajkukuspka.

 Engaksï máru kutsïcha nitamapkia, Patricia uinhamu pʼiraspti depresioni ka kurhakuspti Tata Diosïni eskaksï Jeobaeri testiguecha ménderu pʼorhembipiringa. No ióni jimbo, besinajtsïni ma pʼorhembispti enga Testiguepka, ka uandaspti eska arhipiringa Liccyni para ménderu pʼorhembini Patriciani. Ka Liccy ísï úspti eska na újka ambakiti amiga ma, mándani semana nirasïrendi exeni Patriciani para uinhaperantani ka seguirini Bibliaeri ambe jorhendani. Joperuni jí útasï no úsïrenga iámindu ambe jakajkukuani Testiguechani.

 Uéxurhini 2012 jimbo, Jeobaeri testiguechaksï kampania ma úspti paraksï bideu ma exerpini seniasi hondureño jimbo enga arhinhenga ¿Cha uékapirini mítini jurhimbikuani? Ka engajtsïni Liccy exerapka ini bideuni, no úsïrenga jakajkuni: uánikua ambe engani jí jorhentpienga no jarhaspti Bibliarhu, komu infiernueri ambe o eska alma no uarhisïnga.

 Máteru semana jimbo niraspka Kʼumanchikua Reinuerirhu, parani Thomas jingoni uandontskuarheni. Arhispka eskani uékasïrenga jorhendaani jurhimbikua ambe Bibliaeri imani kʼuiripuechani engaksï no újka kurhaani, joperu eskani no uékasïrenga Jeobaeri testigu úkuarhini. Eratsexapka iglesia ma úni solu para imecha engaksï no újka kurhaani. Orhetarini Thomas felisitarispti engani ísï arhipka ka tátsekuarini exeraspti Efesu 4:5, jimini arhisïndi eskaksï jurhimbiti kristianuecha jatsiska para májku kʼéri jarhani.

 Ísturini Thomas íntskuspti bideuni enga seniasi amerikanu jimbo jaka Los testigos de Jehová: una historia de fe viva. Parte 1: Salen de la oscuridad. Ini bideu jimbo, uandasïndi na engaksï máru kʼuiripuecha jánguarhintapka sési kurhanguni ambe enga Biblia jorhentpijka. Engani exeni japka bideuni, exespka eskani jíjtuni májkueni ambe uékaxapka eskaksï ima kʼuiripuecha, jimbokani uékaxapka míteni jurhimbikua ambe. Bideu jimbo úspka exeni eskaksï Jeobaeri testiguecha imani ambe jorhentpisïnga enga meru ísïika, jimboka iámindu ambe engaksï jakajkujka Tata Diosïri karakatarhuksï jupindaskuarhisïnga. Ísï jimbo, ménderu uéntaspka jorhenguarhini Bibliaeri ambe ka Patricia ka jí itsï atakuarhiskachi 2014 jimbo ka ísïchi niáraska Jeobaeri testigu úkuarhini.

 Tsitisïnga Jeobaeri testiguecheri kúnguarhikuani jimbokaksï ísï úsïnga ambe engaksï Tata Diosïri juramukuecha uandajka. Sési pʼikuarherakuarhisïndi exeani na engaksï xáni sési kámberajka ka na engaksï respetu jingoni uandajpaajka iáminduechani. Testiguechaksï sési kámpisïndi ka iáminduechaksï jarhuajperasïndi. Májku kʼériksï jarhasti ka iáminduechaksï májkueni ambe aianhpisïndi ambe enga Biblia jorhentpijka no arhiparini nani engaksï irekaka o náki idiomaksï uandani.

 Kánikua tsitisïnga jorhenguarhini ambe enga Biblia jorhentpijka. Por ejemplu, jorhenguarhiskia eska Jeoba jindeeska Tata Diosï enga iámindu ambe újka úni ka eska ima jindeeska Juramuti iámu parhakpinirhu. Ima xénchaasïndi imani kʼuiripuechani engaksï no újka kurhaani ka ístu imechani engaksï újka kurhaani. Míteni eskarini Tata Diosï xénchasïnga kánikuari sési pʼikuastasïndi. Ístuni jorhenguarhiskia eska no ióni jimbo, iámu Echeri sési jásï paraisu máeuakia ka eskachi nóteru pʼamenchakia ka ístu eskachi irekaaka para méntkisï. ¡Uékaxakaia eska niáraka inde jurhiatikua!

 Patricia ka jí, sésichi pʼikuarherasïnga aianguani Tata Diosïri ambe imani kʼuiripuechani engaksï no újka kurhaani. Ka astachi jorhendaaxaka Bibliaeri ambe máru imani kʼuiripuechani engachi antesi májku tánguarhienga Iglesiarhu. Ka iásï kʼóruni seguru jarhaskia ambe engani jorhentpijka, no komueska jiáni engani pastoripka. Iásï kʼóruni exeantaskia mókuntskuechani imani kurhamarhikuecheri engani jatsiapka ka úska ísï úni jimbokani Jeobaeri testiguecha jingoni jorhenguarhiska Bibliaeri ambe.