Zarina Rusia irekaspti jiáni enga itsï atakuarhipka ka enga Jeobaeri testigu úkuarhipka. Tátsekua kʼuanhatsentaspti imeri paisi jimbo jini Asia Central. Ka eratsetixapti jorhendaani imeri tsimani nanakechani ambe enga jorhenguarhipka Bibliaeri ambe. No kánikua tumina jatsikuarhispti, jimbosï tátijembecha jingoni nípti irekani, ermanujemba jingoni ka imeri kuniada jingoni kʼumanchikua sapichu ma jimbo nani enga solu ma kuartu japka. Tátijembechaksï arhispti Zarinani eska méntku no jámapiringa Bibliaeri ambe aianguani nanakechani ka nanakechanksï arhiaspti eskaksï no jámapiringa relijioniri ambe uandontskuarheni amambani jingoni.

 Zarina kurhamarhikuarhesïrendi néna úpirini jarhuataani nanakechani paraksï míteni Jeobani (Proverbios 1:8). Ísï jimbo mintsita jingoni kómarhikuspti Tata Diosïni para jarhuatani ka para mímixekua íntskuni. Jiájkani, úndaspti nanakecha jingoni nirani xanharani ka uandontskuarhekuasïrendi na enga sési jáxeka kueraakata ambe. Engaksï ísï nirenga xanharani, jarhuataaspti paraksï ima uékani sánderu ambe jorhenguarhini Kueraajpiriri ambe.

 Tátsekua, Zarina eratsispti úni ambe ma para sánderu uánikua ambe jorhendaani imeri nanakechani úraparini libruni ¿Ambemindusï jorhentpejki Biblia? Kopiariuasïrendi párrafuechani ka kurhamarhikuechani sïranda sapirhaticha jimbo ka karasïrendi máteru ambe para jarhuataani kurhanguni ambesï arhikuekeni. Tátsekua, jískaasïrendi sïranda sapirhatichani ka lapisi ma labadorarhu kétsekua enga baniurhu japka. Engaksï nanakecha jimini inchenga, arhiantasïrendiksï sïrandechani ka karanharhikuasïrendiksï mókuntskuechani.

 Ini ambe úparini, Zarina úspti exeni nanakecha jingoni tsimani kapituluechani librueri ¿Ambemindusï jorhentpejki Biblia? ante de máteru kʼumanchikuarhu mótseni nani engaksï jándiajku japiringuia. Engaksï mótsepkia, Zarina úspti jorhendaani no ma ójkutakua jingoni. Oktubri 2016 jimbo, ima tsimani nanakechaksï niárasti itsï atakuarhini ka kánikuaksï agradesida jarhaspti enga amamba ísï jirinhakuntapka para úni jorhendaani jurhimbikua ambe Bibliaeri.