Jeobaeri testiguechachi jánguarhintasïnga úni eskaksï juchari familiecha ka juchari besinuecha sánderu májku kʼéri jauaka. Jukaparharasïngachi familiani, jimbokachi mítiska eska Jeoba kueraaska (Génesis 2:21-24; Efesios 3:14, 15, Traducción del Nuevo Mundo). Ima íntspeasïndi prinsipiuechani engaksï Bibliarhu jaka ka engaksï jarhuatakia iápurisï anapu kʼuiripuni paraksï jatsini temungurhiri uinhapiti ma ka enga sési irekaka.

 Jánguarhintasïngachi úni ambe enga Biblia uandajka, engajtsïni jarhuatajka sánderu ambakiti uámbaeni o témba ka sánderu ambakiti táticheni (Proverbios 31:10-31; Efesu 5:22–6:4; 1 Timoteo 5:8). Biblia úsïndi jamberi uinhaperani familiechani nájkirukaksï no iáminduecha májku relijioni jatsika (1 Pedru 3:1, 2). Ju je exeni ambe engaksï uandaka máru engaksï uámbecha o témbecha Jeobaeri testigu úkuarhika:

•   “Orheta seisi uéxurhini temungurhirikuarhu méntkuchi uarhiperani jarhasïrenga ka ísïchi pʼikuarherasïni eskachi nóteru úpiringia orhepani uérani. Peru enga Ibeti Jeobaeri testigu úkuarhipka, sánderu uékperakua xarhatasïrendia ka tekantskua. Enga ísï mójtakurhika ústi eska juchari temungurhirikua no kʼamakurhiaka.” (Clauir, Brazil anapu)

•   “Enga juchiti achati, Chansa, uénapka jorhenguarhini Jeobaeri testiguecha jingoni, ji no uékasïrenga, jimbokani eratsisïrenga eskaksï ima xereantasïrenga familiechani. Peruni sánhani arhiska kuenta intskukuarhini eska Biblia sési jimbo marhuakuska juchari temungurhikuani.” (Agness, Zambia anapu)

 Ka eianhpikua jimbo, jorhendasïngachi juchari besinuechani néna Biblia uá jarhuataani arini ambe jimbo imecheri irekuarhu:

•   Sési jirinhani né jingoni tembuchani

•   Uérakuani problemechani engaksï temungurhiricha jatsiajka primeru uéxurhini

•   Sési pájperani suegruecha jingoni

•   Sési úrani tuminani

•   Nóteru no sési arhijperani

•   Jorhenguarhini néna puátspintani

•   Jurhimberantaani sapiichani

 Ménisï jo. Informi ma enga 1998 empresa inbestigasioniri Sofres petaka, uandaspti eska ma kada beinte temungurhiricheri enga uámba o témba Jeobaeri testigu úkuarhipka, kʼérati problemechani jatsiaspka enga i mójtakupka relijionini.

 Jesusi uandaspti eskaksï imeri chúxapaticha ménichanisï jatsiapiringa problemechani familiaricha jingoni (Mateu 10:32-36). Will Durant enga istoriaeri ambe exejka, uandaspti eska Imperio romanueri tiempu jimbo, “kristianuechaksï kulparinhasïrenga de xereantaani familiechani”. a Ka iásï Jeobaeri testiguechantujtsïni ménisï májkueni arhisïndi. ¿Peru Testiguecheskiksï engaksï újka eskaksï jauaka arhijperakuecha?

 Enga uandanhapka eskaksï Jeobaeri testiguecha xereantasïnga familiechani, Tribunal Europeo de Derechos Humanos uandaspti, eska méntku úndani jindeskaksï familiari no testiguecha engaksï újka eskaksï jauaka arhijperakuecha, engaksï “no jiókuarhijka ka ni respetarini sésikua enga jatsika imeri familiari enga jakajkutika de jatsini relijioni ma ka úni ambe enga i jorhentpijka”. Tribunal uandasptiteru: “Ini ambeksï nitamakuarhisïndi iámindu familiecha engaksï no iáminduecha májku relijioni jatsika; ka májkuenisti Jeobaeri testiguecha jingoni”. b Nájkiruka kʼuiripu no jiókuarhijka juchari relijionini, Jeobaeri testiguechachi jánguarhintasïnga úni i ambe enga Biblia uandajka: “Asï jáma je no sési úkuntani imani engaksïni no sési úchiaka, [...] ka chári parti jimbo jánguarhi je eskajtsï xáni uáka sési pájperani iámindu kʼuiripuechani jingoni enga újka ísï úkuarhini” (Roma 12:17, 18).

 Testiguechachi seguirisïnga ini Bibliaeri juramukuani de solu imani jingoni tembuchani enga “jakajkutiuaka”, i ambe arhikuekasïndi tembuchani solu imani kʼuiripu jingoni enga májkueni ambe jakajkujka eska jucha (1 Korintu 7:39). I juramukua Tata Diosïri kánikuajtsïni marhuachisïndi. Ejemplu ma, artikulu ma rebisteri Journal of Marriage and Family, uéxurhini 2010 jimbo uandasïrendi eskaksï “temungurhiricha engaksï mísmu relijionini jatsika ka mísmu úkuechani ka jakajkukuechani” sáno méntkisïksï sánderu sési pájperasïnga. c

 Jiájkani, Jeobaeri testiguechaksï no arhiasïndi imecheri relijionirhu anapuechani eskaksï jurajkuaka témbani o uámbani enga no Testigueka. Biblia arhisïndi: “Enga ma ermanueri témba no jakajkutiika, peru enga uékajka irekani imani jingoni, eska no chútantaaka. Ka enga ma uarhiiti jakajkutiri uámba no jakajkutiika, peru uékani irekani imani jingoni, asï jáme jarharintani” (1 Korintu 7:12, 13). Jeobaeri testiguechaksï úsïndi ambe enga i juramukua uandajka.