Grupu enga Orhejtsïkuajka iámindu Kúnguarhikuechani jindesti grupu sapichu ma kristianuecheri engaksï kánikua jánhaskatika, ka engaksï orhepani petajka Jeobaeri testiguecheri kúnguarhikuani interu parhakpini anapu. Imecheri ánchikuarhita tsimani xanhari sánderu kánikuesïndi:

•   Imecheri ánchikuarhita jindesti prepararini informasioni Bibliarhu anapu enga rebistecharhu xarharajka ka enga tánguarhikuechani jimbo nitamataranhajka ka eskuelecha Jeobaeri testiguecheri (Lukasʌ 12:42).

•   Orhepani petani Jeobaeri testiguecheri ánchikuarhitani interu parhakpini. I ambe arhikuekasïndi exeni eianhperakuani ka exeni na enga úrakuarhini jaka ambe engaksï kʼuiripuecha íntspijka.

 Grupu enga Orhejtsïkuajka iámindu Kúnguarhikuechani ísïksï úsïndi eska primeru siglurhu anapu ‘apostulicha ka arhistatspiticha’. Imaksï erakuspti ambakiti ambe úni iámindu kúnguarhikua jimbo (Ukuecha 15:2). Grupu enga Orhejtsïkuajka iámindu Kúnguarhikuechani nóksï jindesti jefecha juchari organisasioniri, ísï eskaksï na no jindepka ióntki anapuecha. Imaksï méntkisï sési inbestigarisïndi Bibliarhu ambe engaksï jatsika para úni ka jakajkusïndiksï eska Jeobasï úka eska tata Jesukristu jindeuaka kúnguarhikueri Orhejtsïkuti (1 Korintu 11:3; Efesu 5:23).

 Eneru 2018 jimbo, Grupu enga Orhejtsïkuajka iámindu Kúnguarhikuechani jindesptiksï Kenneth Cook, uájpa, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane ka Jeffrey Winder. Iáminduksï marhuaxati Kʼumanchikuarhu nani engaksï Interu Parhakpini anapu Jeobaeri Testiguecheri Ánchikuarhita Exejka jini Warwick (Nueva York).

 Grupu enga Orhejtsïkuajka iámindu Kúnguarhikuechani peerasti seisi komitechani engaksï mámaru ambe exejka juchari ánchikuarhiteri ambe. Mándani komiteri ánchikuarhisïndiksï ma jingoni o sánderu.

•   Comité de Coordinadores: Exesïndi asuntos legalesiri ambe ka exesïndi ambe úni enga no sési ambe úkuarhiaka, o engaksï no sési kánhani jauaka erachicha imecheri jakajkua ambe jimbo ka máteru ambe enga uandanhiatani jauaka Jeobaeri testiguechani.

•   Comité de Personal: Exesïndi iámindu ánchikuarhita enga Beteli úkuarhijka, jo imechani engaksï Jeobaeri testiguecheri sukursalirhu ánchikuarhijka.

•   Comité de Publicación: Exesïndi imani ambe enga imprimirikuarhijka ka Bibliarhu anapu publikasionichani engaksï axakuarhijka, ka ístu na engaksï úkuarhijka kʼumanchikua Reinuericha, sukursalichani ka ofisinechani para imechani engaksï tradusirijka.

•   Comité de Servicio: Exesïndi ánchikuarhitani “ambakiti eianhperakua Diosïri juramukueri” (Mateu 24:14).

•   Comité de Enseñanza: Íntspesïndi jorhengua enga tánguarhikuechani exenhajka, eskuelecharhu ka programecha audiu ka bideueri.

•   Comité de Redacción: Prepararisïndi ambe engaksï Bibliarhu anapu publikasionicha jataka ka ambe enga juchari pájinarhu jaka Internetiri ka exesïndi na enga ánchikuarhini jaka traduksioni.

 Ka no ini ánchikuarhitankuksïsï újti, sino ístu Grupu enga Orhejtsïkuajka iámindu Kúnguarhikuechani tánguarhintasïndiksï mándani semana paraksï exeni ambe uétarhixaki úni kúnguarhikuecharhu. Ini tánguarhikuecharhu exesïndiksï ambe enga uandajka Biblia ka jurajkusïndiksï eska Tata Diosïri espiritu santu arhiauaka ambeksï jatsiski para úni. Méntkisïksï jánguarhintasïndi eskaksï iáminduecha májkueni ambe eratsiaka (Ukuecha 15:25).

 Mándani Grupu enga Orhejtsïkuajka iámindu Kúnguarhikuechani jatsisti jarhuajperata ma erachiri enga ióni marhuakukia Jeobani ka enga kánikua jánhaskatika para úni exeni ánchikuarhitani enga komite újka (1 Korintu 4:2). Íksï jarhuajpiricha jarhasïndi mándani semana tánguarhikuecharhu engaksï komitecha jatsijka. Nájkirukaksï i no uandajka ambesï úkuarhia, íntspeasïndiksï máru sujerensiauechani ka íntspesïndiksï informasioni enga marhuajka para indeni ambe exeni, usïndiksï ambe enga komite eratsikia úni ka exesïndiksï néna niraxaki inde ánchikuarhita. Ístu Grupu enga Orhejtsïkuajka iámindu Kúnguarhikuechani arhiasïndi eskaksï niuaka pʼorhembiani Jeobaeri testiguechani engaksï máteru nani ísï anapueka o eskaksï jauaka programarhu tánguarhikuecheri engaksï mándani uéxurhini úkuarhijka o graduasionicharhu Eskuela Galaadiri.