•  ¿Nénaksï erakusïni Jeobaeri testiguecha sinksï úntaa kʼuínchikua ma?

•  Nájkirukaksï Jeobaeri testiguecha no uaantajka máru kʼuínchikuechani, ¿seguirisïnksï xénchaani imeeri familiarichani?

•  ¿Jeobaeri testiguecha afuersaksï úsïni eskaksï máteru kʼuiripuecha no uaantaaka máru kʼuínchikuechani?

 Ante deksï erakuni sinksï úntaa kʼuínchikua ma, Jeobaeri testiguechaksï exesïni Bibliarhu ambe uandasïni indeeri ambe. Máru kʼuínchikuechaksï no terukuntasïndi Biblieri prinsipiuecha jingoni. Indeni ambe jimbo, Jeobaeri testiguechaksï no uaantasïndi. Joperuksï jarhasti máteru kʼuínchikuecha enga mándani Jeobaeri testigu jatsika para erakuni ambe úni, asegurarikuariparini eska imeeri konsiensia sési pʼikuarheraaka ka “sési jámani Tata Diosïni japarini ka ístu kʼuiripuechani japarini” (Ukuecha 24:16).

 Ixú kétsekua xarharasïndiksï máru kurhamarhikuecha engaksï Jeobaeri testiguecha úkuarhiajka paraksï erakuni sinksï úntaa kʼuínchikua ma. a

•   ¿Jindeeski kʼuínchikua ma enga Biblia no jorhentpijka?

   Biblieri prinsipiu: “Uéakunta je ka kéndikukua je indeechani, ísï uandasïndi Tata Diosï Jeoba, ka ásteru jáma jeia pʼárhini ikichakueni jásï ambe” (2 Korintu 6:15-17).

   Paraksï méntku kéndikukuarhini imani jorhentperakuechani engaksï no terukuntajka ambe enga Biblia uandajka, Jeobaeri testiguechaksï no uaantasïndi kʼuínchikuechani engaksï arini járhati pʼindekuechani kaajka, eskachi na exeni jauaka iáiasï.

   Kʼuínchikuecha engaksï jindeeka para diosïicha engaksï no jurhimbitiika. Jesúsi uandaspti: “Kómarhi chiiti Tata Diosï Jeobani ka imantku marhuaku” (Mateu 4:10). Kurhajchaparini ini juramukuani, Jeobaeri testiguechaksï no úntasïndi Nabidadini o Domingu de Paskuani ni kʼuínchikuechani para primero de mayo, jimboka nani enga uératini jurhajka i kʼuínchikuecha jindeesti para máteru diosïichani kómarhiani. Ístuksï, no uaantasïndi ini kʼuínchikuechani engachi exeani jauaka:

  •  Kwanza. Eska na uandajka Enciclopedia Moderna, i kʼuínchikueri arhinhakua “jurhasïndi ima uandakuecha swahili matunda ya kwanzaa (‘orheta frutu’)” ka úntasïndiksï “májkueni eskaksï Áfrika anapuecha na uaantajki pʼikuntskueri kʼuínchikuechani”. Nájkirukaksï máru no ísï exejki eska relijioniiri anapu kʼuínchikua ma, ensiklopedia ma terukutantasïndi África anapu kʼuínchikua ma jingoni engaksï orheta frutuni “kéjtsïtakuka diosïichani ka ióntki anapu parientichani para xarhatakuani eskaksï agradesidu jarhaska”. Ka ístu uandasïndi eska ima kʼuínchikua ka kʼuínchikua afroamerikana enga Kwanzeka, májkueni “ambeksï úsïndi para diosmaiamukua ambe íntsaani imani kóntperatechani jimbo engaksï intsïnhapka imeecheeri ióntki anapu parientiicha jimbo” (Encyclopedia of African Religion [Enciclopedia de la religión africana]).

  •  Fiesta del Medio Otoño. Eska na uandajka libru Otras culturas, otras formas de vida, kʼuínchikua máesti nani engaksï “kʼuiripuecha únheenga imeeri kéjtsïtakuani nana lunani”. Ístuksï “kʼumanchikuarhu anapu uarhiitiicha kʼutitsekusïndi [...] nana lunani” (Religions of the World​—A Comprehensive Encyclopedia of Beliefs and Practices [Religiones del mundo: Enciclopedia exhaustiva de creencias y prácticas]).

  •  Nowruz. “Máru ambe engaksï i kʼuínchikuarhu úkuarhijka ióni anapuestiksï ka zoroastrismo jarhastiksï, ka jindeesti jurhiatikua ma enga kánikua jukaparhakueka ióntki anapu kalendariueri zoroástrikueri. [...] Jakajkunhasïreendi eska inbiernu anapu espiritu afuersa úsïreendi eska teruxutini anapu espiritu, enga mítekateeka komu Rapithwin, jirikuarhipirindi echerirhu inchatsikuarhitini imani kutsïicha jimbo enga tsʼirakuarhienga, ka Nowruziri jurhiatikua jimbo kʼuínchikuechaksï uaasïreendi teruxutinisï ísï eska na uandajka pʼindekua zoroástrica” (Organización de las Naciones Unidas para la Educación, la Ciencia y la Cultura [Unesco]).

  •  Shab-e Yalda. I kʼuínchikuarhu enga jurhiata andajpenuenga para inbiernu uénani “terukutantasïndi para kómarhini Mitrani”, enga jindeeka lusiri diosï (Sufism in the Secret History of Persia [El sufismo en la historia secreta de Persia]). Ístu jakajkunhasïndi eska i kʼuínchikua úpirindi terukuntani para kómarhini diosï jurhiatani Roma ka Grecia anapuni. b

  •  Día de Acción de Gracias. Májkueni eska Kwanzeri kʼuínchikua, i kʼuínchikua uaxastakata jarhasti pʼikuntskueri kʼuínchikuecha jingoni engaksï úkuauenga diosïichani. Ka tátsekua “i ióntki anapu pʼindekuechanksï ueenaspti iglesiecha kristiana jiókuarhiani” (A Great and Godly Adventure​—The Pilgrims and the Myth of the First Thanksgiving [Una gran aventura piadosa: Los peregrinos y el mito del primer día de Acción de Gracias]).

   Kʼuínchikuecha engaksï pʼitakata jaka ima jakajkukuecheri enga jindeeka para buena suerte. Biblia uandasïndi eska “imeecha engaksï peerajka diosï Buena Suertiri” jarhasti imeecha jingoni “engaksï jurajkujka Tata Diosï Jeobani” (Isaías 65:11). Ísï jimboksïsï Jeobaeri testiguecha no uaantajki ini kʼuínchikuechani:

  •  Iván Kupala. “Ísï eska na jakajkunhajka, Iván Kupaleri jurhiatikua jimbo, naturalesa íntsaasïndi uinhapikua ka ini ambeksï úsïndi jatsini balori ka buena suertini jimbo” (The A to Z of Belarus [Bielorrusia de la A a la Z]). Ueenakuarhu, kʼuínchikua máespti enga únheenga enga jurhiata andajpenuenga para beranu ueenani. Joperu eska na uandajka ensiklopedia ma, “iglesia anapu kʼuínchikua jingoni kúndanhaspti [ima jurhiatikua enga san Juan Bautistepka] enga na kristianismo jiókuarhinhapkia” (Encyclopedia of Contemporary Russian Culture [Enciclopedia de la cultura rusa contemporánea]).

  •  Año Nuevo Lunar (Año Nuevo chino o Año Nuevo coreano). “Imani jurhiatikuecha jimbo, sánderu eska náki uéjki ma jurhiatikua uéxurhiniiri, ambe enga sánderu uandanhiatajka familiarichani, amiguechani ka parientichani jindeesti buena suerte jatsini, kʼéri ambe arhiani diosïichani ka espirituechani, ka para uánikua sentabu jatsini jimbanhi uéxurhini enga juuaka” (Mooncakes and Hungry Ghosts​—Festivals of China [Festivales chinos: Pasteles de la luna y fantasmas hambrientos]). Ka májkuenisti, Año Nuevo coreano jimbo “kómarhiasïndi ióni anapu parientichani, úsïndiksï máru ambe para no ambarhati espirituechani kénditani ka para buena suerte jatsini jimbanhi uéxurhini jimbo, ka máru senialicha enga xarhatajka ambe jua ima jimbanhi uéxurhini” (Encyclopedia of New Year’s Holidays Worldwide [Enciclopedia de las celebraciones de Año Nuevo de todo el mundo]).

   Kʼuínchikuecha enga jakajkunhajka eska alma no uarhisïnga. Biblia uandasïndi eska alma uarhisïnga (Ezequiel 18:4). Ísï jimbo, Jeobaeri testiguechaksï no uaantasïndi kʼuínchikuechani engaksï jorhentpijka jakajkukuani eska alma no uarhisïnga, komu arichani:

  •  Uarhiriicheeri jurhiatikua. Eska na uandajka ensiklopedia ma, imani jurhiatikua jimbo “miánhantasïndi iámindu imeecha engaksï uarhikia”. Ka ístu uandasïndi: “Eska Edad Media jimbo jarhaspti jakajkukua eskaksï ima jurhiatikua almecha engaksï purgatoriurhu japka úpirindiksï xarhakuani komu fantasmecha, brujecha, sapuecha ka ístu máteru ambe, imeechani engaksï no sési kaapka jiáni engaksï tsípiti japka” (New Catholic Encyclopedia [Nueva Enciclopedia Católica]).

  •  Festival Ching Ming ka Festival de los Fantasmas Hambrientos. Ini tsimani kʼuínchikuecha jimbo kʼéri ambeksï arhiasïndi ióntki anapu parientichani. Libru ma uandasïndi eska Festival Ching Ming jimbo, “kéjtsïtanhasïndi tʼirekua ka itsïmakua ambe, ka kurhiranhasïndi biietichani parakaksï asegurarikuarhiaka eskaksï uarhiriicha no kʼarimaaka ni kʼarhichani ka jatsinksï sentabu” (Celebrating Life Customs Around the World​—From Baby Showers to Funerals [Costumbres de todo el mundo para celebrar la vida: desde baby showers hasta funerales]). Ima mismu libru uandasïndi, imeecha engaksï kʼuínchikuechani úntajka Festival de los Fantasmas Hambrientos jakajkusïndiksï “eska imani [kʼuínchikua jimbo] sánderu jiáni enga luna sánderu kʼénhani jauaka, ima engaksï tsípiti jaka ka uarhiriicha májku kʼéri jarhasïndi sánderu eska náki uéjki máteru chúrikua jimbo. Ísï jimbo jatsistiksï para jingontku jámani para pʼínguani uarhiriichani ka kʼéri ambe arhiani ióntki anapu parientichani”.

  •  Chuseok. Eska na uandajka libru ma, imani kʼuínchikua Corea anapu jimbo “kéjtsïtanhasïndi tʼirekua ka binu para uarhiriicheeri almecha”. I kéjtsïtakuechaksï xarharasïndi “jakajkukuani eska alma seguirisïndi irekani nájkiruka kuerpu uarhijkia” (The Korean Tradition of Religion, Society, and Ethics [La tradición coreana de la religión, la sociedad y la ética]).

   Kʼuínchikuecha engaksï sïkuamikueri ambeeka. Biblia uandasïndi: “No jatsisti para jarhani nema tʼungini jingoni enga [...] exerkuarhini jámaaka, ni nema enga majia újka, ni nema enga uékaaka míteni ambe úkuarhia sánderu orhepatini, ni sïkuami, ni nema enga no sési úkuauaka máteruechani sïkuamikua jingoni, ni nema enga sïkuamini ma úraaka para uarhiriichani jingoni uandontskuarheni o nemani enga uandantajka ambe enga úkuarhiaka sánderu orhepatini, ni nema enga uarhiriichani jingoni uandontskuarheaka. Jimboka iámindu imeecha engaksï ini ambe újka ikichakueni jásï ambeeska para Jeoba” (Deuteronomio 18:10-12). Paraksï no úni ambe uéjki ambe enga sïkuamikuerika, komu oroskopueri ambe (enga jindeeka exerkuarhini), Jeobaeri testiguechaksï no úntasïndi Halloween ni kʼuínchikuechani engachi exeauaka:

  •  Año Nuevo cingalés ka Año Nuevo tamil. “Ambe enga únhajka ini kʼuínchikuechani jimbo [...] ístu jindeesti úni máru ambe enga oroskopuecha jingoniika” (Encyclopedia of Sri Lanka [Enciclopedia de Sri Lanka]).

  •  Songkran. Ensiklopedia ma uandasïndi eska i kʼuínchikueri nombri enga Asia anapueka uandakueri ma “jurhasïndi [...] enga arhikuekajka ‘manakuarhini’ o ‘mójtakurhini’”. I kʼuínchikua “xarhatasïndi enga jurhiata inchajtsïkujka jóskuechani jimbo Ariesiri” (Food, Feasts, and Faith​—An Encyclopedia of Food Culture in World Religions [Comida, fiestas y fe: Enciclopedia de cultura gastronómica en las religiones del mundo]).

   Kʼuínchikuecha engaksï Moisésiiri Lei jimbo uéraka para kómarhini ka enga tátsekua Jesúsiiri uarhikua jimbo kénditanhaka. Biblia uandasïndi: “Jimboka Lei jima jamberku niáraska enga Kristu janoka” (Roma 10:4). Ísïisti eska kristianuecha útasï marhuakuasïnga prinsipiuecha engaksï Moisésiiri Lei jimbo jaka, enga ióntki anapu Israeli intsïnhapka. Joperuksï no uaantasïnga kʼuínchikuechani ka sánderu imeechani engaksï uandajka eska Mesíasi jupiringa, jimbokaksï kristianuecha jakajkusïnga eska jurhaskia. Biblia uandasïndi: “Iámindu inde ambe xarhataxapti ambe enga sánderu orhepani jupiringa, joperu iámindu inde ambe Kristunisï arhikuekajti” (Kolosasi 2:17). Ini ambe jimbo ka jimbokaksï máru kʼuínchikuecha inchaparatanhaspti pʼindekuecha engaksï no terukuntajka Biblia jingoni, Jeobaeri testiguechaksï no uaantasïndi kʼuínchikuechani komu ari engachi exeni jauaka:

  •  Janucá. I kʼuínchikua miátantasïndi engaksï ménderu judiuecha templuni dedikaripka jini Jerusaléni. Peru Biblia uandasïndi eska Jesúsi erakunhaspti komu Kʼéri Saserdoti “kʼumanchiku[eri ma o templu] enga sánderu kʼéri ambeeka ka enga sánderu sési jaka, indeni kʼumanchikuani nóksï kʼuiripuecha ústi ka no echerirhu únhasti” (Ebreu 9:11). Kristianuechaksï exesïndi eska ima templu enga Jerusaléni japka mójtakunhaspti templu espiritualini jingoni.

  •  Rosh Hashaná. Jindeesti primeru jurhiatikua uéxurhini judiueri. Ióntki, ini kʼuínchikua jimboksï únhasireendi kéjtsïtakuecha para Tata Diosï (Números 29:1-6). Joperu Jesukristu komueska Mesíasi, úspti eska nóteru únhapiringia “kéjtsïtakua ambe” (Daniel 9:26, 27). Ísï jimbo, i kéjtsïtakuecha nóteru jukaparhakuestia para Tata Diosï.

•   ¿I kʼuínchikua úsïndi eskaksï máteru relijionicha jingoni kúnguarhiaka?

   Biblieri prinsipiu: “¿O ambe jatsiski jakajkuti ma no jakajkutiini ma jingoni? Diosï úkateechaksï no uaati Tata Diosïiri templurhu jarhani” (2 Korintu 6:15-17).

   Nájkirukaksï Jeobaeri testiguecha jánguarhintajka paraksï sési pájperani iáminduecha jingoni ka janhanharhinksï eskaksï máteruecha jatsiska sésikua para erakuni ambe engaksï uéjka, no participan en celebraciones que promueven actividades interconfesionales komu arini engachi exeni jauaka.

   Kʼuínchikuecha engaksï kʼuiripuechani úkuajka engaksï relijionicha uaajka parakaksï kʼuiripuecha mámaru járhati relijionicheri májku kʼéri jauaka. Ióntki, enga Tata Diosï orhekupapka imeeri iretani para inchani echerirhu engaksï máteru relijioniiri anapu kʼuiripuecha irekani japka, arhiaspti imeeri marhuariichani: “Asï ambe ma pakatpera imeechani jingoni ka nijtu imeecheeri diosïichani jingoni. [...] Engari kómarhiaska imeecheeri diosïichani, inde ambe ísïiuati komueska trampa ma para tʼu” (Éxodo 23:32, 33). Ísï jimbo, Jeobaeri testiguechaksï no uaantasïndi kʼuínchikuechani komu arini engachi exeani jauaka:

  •  Loi Krathong. I Tailandia anapu kʼuínchikua, “kʼuiripu, sïranderi kanasta sapichani uaasïndi. Úrhutasïndi kandelechani o insiensu ka jima jatsirani ka tátsekua itsïirhu inchamasïndi. Jakajkunhasïndi eskaksï ‘barkitecha’ pásïnga mala suertini. Ini kʼuínchikuarhu miánhantasïndi rastru ma enga Buda jurajkuka imeeri jantsiriri riurhu japarakutini” (Encyclopedia of Buddhism [Enciclopedia del budismo]).

  •  Día Nacional de Arrepentimiento. Imeecha engaksï ini ambe újka “jiókuarhisïndiksï ambe engaksï kristianuecha jorhentpijka”, ísï uandaspti gobiernurhu anapu juramuti ma periodikurhu The National, enga Papúa Nueva Guinea anapueka. Ístu uandaspti eska inde kʼuínchikua “jarhuatasïnga parakaksï uaaka ambe engaksï kristianuecha jorhentpijka indeni paisi jimbo”.

  •  Vesak. Kʼuínchikua máesti enga sánderu jukaparhakueka para imeecha engaksï Budani kómarhijka. “Imani jurhiatikuecha jimbo miánhantasïndi enga Buda andajpenuka, imeeri jánhaskakua ka uarhikua enga [nirbana] pánhaka” (Diccionario de religiones comparadas).

   Kʼuínchikuecha engaksï uaxastaka jaka relijionirhu anapu pʼindekuecha enga Biblia no jorhentpijka. Jesúsi arhiaspti relijioniiri orhejtsïkutiichani: “Chaari pʼindekua ambe jimbo, chájtsï nóteru úxakaia ambe enga Tata Diosïiri uandakua arhijka”. Ístu arhiaspti eska imeecheri kómarhikua no marhuasïreenga jimbokaksï jorhentpisïreenga “imani ambe engaksï kʼuiripuecha juramujka” (Mateu 15:6, 9). Jimbokaksï Jeobaeri testiguecha jingontku jarhasïnga ini ambe jingoni, nóksï uaasïndi kʼuínchikuechani engaksï exeani jauaka:

  •  Epifanía (Timkat o Los Reyes Magos). Ini kʼuínchikuarhu miánhantasïndi engaksï astrologuecha nípka exeni Jesúsini o enga Jesúsi itsï atakuarhipka. Ensiklopedia ma uandasïndi, eska i kʼuínchikua “kristianu uaantaspti máru kʼuínchikuechani engaksï no Bibliarhu jupindaskuarhika ka engaksï primabera jimbo únhantajka, paraksï kómarhiani iurhekueri diosïichani” (The Christmas Encyclopedia [Enciclopedia de la Navidad]). Timkat, kʼuínchikua ma enga sáno májkueniika, Etiopía anapu kʼuínchikua máesti, “sési jupindaskuarhitixati pʼindekuecharhu” (Encyclopedia of Society and Culture in the Ancient World [Enciclopedia de sociedades y culturas del mundo antiguo]).

  •  Fiesta de la Asunción de la Virgen María. I kʼuínchikua úkuarhisïndi jimboka jakajkunhasïnga eska María Jesúsiiri amamba, auandarhu karhanchentaspti imeeri kuerpu jingoni. Diccionario de religiones comparadas uandasïndi eska i jakajkukua “ueenaspti xarharani [...] enga siglu IV kʼamarani japkia” ka eska “NT [Nuevo Testamentrhu] no ma ambe jarhaska enga i jorhentperakueri ambe uandajka”.

  •  Fiesta de la Inmaculada Concepción. Enciclopedia Católica Online uandasïndi ini ambe inmaculada concepción de María: “Bibliarhuchi no uaaka exentani ambe ma enga íri ambe uandaaka”. Jindeesti ambe ma enga Iglesia jorhentpijka.

  •  Kuaresma. Eska na uandajka Enciclopedia universal ilustrada europeo-americana, i jurhiatikuecha jimbo enga moántanhani jarhajka no tʼirenhani uaxastanhaspti “uéxurhini 325 jimbo ísï”, sánderu eska dosientu uéxurhini tátsekua enga últimu libru Bibliarhu anapu karanhapiringa. Primeru jurhiatikua Kuaresmeri, Mierkulisï tʼupuri jápueri, ima mismu ensiklopedia uandasïndi: “Parakaksï jakajkutiicha tʼupuri jápu úruntapiringa ueenakuarhispti enga Urbano II juramupka konsiliu de Beneventurhu uéxurhini 1091 jimbo”.

  •  Meskel. I kʼuínchikua enga Etiopía anapueka úkuarhisïndi “jimboka exenhantaska Vera Cruz, enga jindeeka krusi enga Kristu cháparhatanhaka, kʼérati chpirichanksï uaasïndi ka uarhanksï imani uirhipandani” (Encyclopedia of Society and Culture in the Medieval World [Enciclopedia de las sociedades y culturas en el mundo medieval]). Joperuksï Jeobaeri testiguecha no úrasïndi krusini paraksï Tata Diosïni kómarhini.

•   ¿Kʼuínchikua kʼéri ambe arhisïni kʼuiripu ma, organisasioni ma o símbolu patriu ma enga paisi úrajka?

   Biblieri prinsipiu: “Í ambesï uandajti Tata Diosï Jeoba: ‘No sési nikuati imani enga kʼuiripuni mintsikajka [...] ka enga imeeri mintsita jarharijka Tata Diosï Jeobani’” (Jeremías 17:5).

   Nájkirukaksï Jeobaeri testiguecha uandanhiajka kʼuiripuechani jimbo ka astaksï kómarhiasïndi imeechani jimbo, nóksï uaasïndi kʼuínchikuechani engachi exeani jauaka.

   Kʼuínchikuecha para kʼéri ambe arhini juramuti ma o máteru kʼuiripuni enga jukaparhakueka. Biblia uandasïndi eska, parajtsïni sési nicheni nóchi jatsiska para kʼuiripuechani mintsikani, jimbokaksï solu jindeeska jirejtakua enga imeeri úrirhu jaka (Isaías 2:22). Ísï jimboksïsï, Jeobaeri testiguecha no uaantajti, pori ejemplu, reiri o reinaeri kumpleaniu ma.

   Paisirhu anapu banderaeri kʼuínchikuechani. Jeobaeri testiguechaksï no úntasïndi Banderaeri jurhiatikua kʼuínchikuani. ¿Andi nómbe? Jimboka Biblia arhisïnga: “Xéparini jáma je diosï úkatechani jingoni” (1 Juanu 5:21). Para máru kʼuiripuecha, bandera no ídolu máesti, o ambe ma para kómarhini. Istoriadori Carlton Hayes uandaspti “ambe enga sánderu úranhajka para kʼéri ambe arhini paisini jindeesti bandera”.

   Kʼuínchikuechani para kʼéri ambe arhiani santuechani. ¿Ambe úspi apostoli Pedru enga achamasï ma imeeri orhepani jimbo tinguixurhipka? Biblia uandasïndi: “Pedru jauataspti ka arhispti: ‘Jauara, jimbokani jíjtuni kʼuiripu máeska’” (Ukuecha 10:25, 26). Ni Pedru ni máteru apostoliicha jiókuarhiasptiksï eskaksï kʼéri ambe arhiapiringa. Ísï jimboksïsï, Jeobaeri testiguecha no uaantajki kʼuínchikuechani para kʼuiripuecha engaksï ísï exenhajka eska santuecha, pori ejemplu:

  •  Día de Todos los Santos. Eska na uandajka libru Año cristiano, enga jimbo únhantajka i kʼuínchikua jindeesti “para kʼéri ambe arhiani iámu santuechani”. Ístu uandasïndi: “Eska no nema míteska néna ueenakuarhiski kʼuínchikua”.

  •  Kʼuínchikua Nana Uarhi Guadaluperi. I kʼuínchikuaksï úkuntasïndi “México anapu Patronani”, kʼuiripu jakajkusïndi eska i Maríeska, Jesúsiiri amamba. Uandanhasïndi eska milagru ma jimbo xarhakuspti tarheri ma, uéxurhini 1531 jimbo (Enciclopedia Guadalupana).

  •  Jurhiatikua santueri o jurhiatikua onomastiku. Eska na uandajka libru ma, jindeesti “engaksï santuni kʼuínchikua úkuntajka ka ima nombrini enga sapi ma intsïnhaka jiáni enga itsï atakuarhika o enga konfirmarikuarhika”. Ka ístu uandasïndi eska “ima jurhiatikua kʼéri jurhiatikua máeska relijioniiri” (Celebrating Life Customs Around the World​—From Baby Showers to Funerals [Costumbres de todo el mundo para celebrar la vida: desde baby showers hasta funerales]).

   Kʼuínchikuecha engaksï politikeri ambeeka o para grupuni ma apoiarini. Biblia uandasïndi: “Sánderu sésiisti Tata Diosï Jeobani jingoni nirani kuájchakukuarhini ka eska kʼuiripuechani mintsikaani” (Salmo 118:8, 9). Paraka no ísï exenhaaka eskaksï kʼuiripuecha uaaka sési peentani parhakpinirhu anapu problemechani, Jeobaeri testiguechaksï no inchamukusïndi politikarhisï o apoiarini grupuni ma, komu Día Internacional de la Juventud o Día Internacional de la Mujer. Ísï jimboksïsï, no úntati kʼuínchikua Día de la Indepencencia ni máteru járhati kʼuínchikuechani. Sánderu sési, mintsikasïndiksï eska Tata Diosïiri Reinujkusï uaaka sési peentani indeni ambe engaksï kʼuiripuecha no májkueni jatsikuarheka oksï no sési kámberani jimbokaksï no májkueni koloriska (Roma 2:11; 8:21).

•   ¿Úntasïni kʼuínchikua eska xarhataka eskaksï máru kʼuiripuecha o ma paisi sánderu kʼériiska eska máteruecha?

   Biblieri prinsipiu: “Tata Diosï iáminduechani májkueni kaasïn[di], ka eska jaiapanheantasïnga imeechani engaksï chénharhijka ka engaksï újka ambe enga sési jaka, nani uéjkiksï anapueni” (Ukuecha 10:34, 35).

   Nájkirukaksï Jeobaeri testiguecha jukaparharajka paisi nani engaksï irekaka, nóksï inchaparakusïndi kʼuínchikuecharhu enga xarhatajka eska ma paisi o ma grupu sánderu jukaparhakueska eska máteruecha.

   Kʼuínchikuecha engaksï ejersituni kʼéri ambe arhijka. Jesúsi úsïreendi sési pájperani iáminduecha jingoni, jimbosï úpti arhiani imeeri chúxapatiichani: ‘Seguiri je xénchaani imeechani engaksïni ikiachejka ka kómarhijpikuani jarhani imeechani engaksïni no sési kámajka’ (Mateu 5:44). Jimboksïsï Jeobaeri testiguecha no inchaparakuti kʼuínchikuecharhu engaksï ejersituni kʼéri ambe arhijka, pori ejemplu:

  •  Día de Anzac. Diksionariu ma uandasïndi eska “Anzac arhikuekasïnga iámu Grupu Ejersituerini enga Australia ka Nueva Zelanda anapueka” ka eska “Día de Anzac sánhani arhisïnga niárani jurhiatikua máeni enga guerrarhu anapu uarhiriichani miáuantajka” (Historical Dictionary of Australia [Diccionario histórico de Australia]).

  •  Día de los Veteranos (Día para Recordar, Domingo del Recuerdo y Día de la Conmemoración de los Caídos). Eska na uandajka Enciclopedia Moderna jindeestiksï jurhiatikuecha enga kʼuínchikua únhajka “para kʼéri ambe arhiani imeechani engaksï ióni páni jakaia ejersiturhu [...] ka ístu imeechani engaksï uarhiperakuecharhu uarhika”.

   Istorieri kʼuínchikuecha o na enga úkuarhijka ma paisiiri independensia. Jesúsi arini ambe uandaspti imeeri chúxapatiicheri: “Indeechaksï no ísï jámasïndi eska parhakpini anapuecha, ísï eskani ji na no májkueni jámajka eska parhakpini anapuecha” (Juanu 17:16). Nájkirukaksï Jeobaeri testiguecha jukaparharajka imeeri paisirhu anapu istoriani, nóksï inchaparakusïndi kʼuínchikuecharhu komu ari engachi exeani jauaka:

  •  Día de Australia. Ensiklopedia ma uandasïndi eska “i jurhiatikua ueenasïnga miánhantani uéxurhini 1788 jimbo enga ejersitu inglesi tarhatapka banderani para uandani eska Autralia jimbanhi kolonia máespkia” (Worldmark Encyclopedia of Cultures and Daily Life [Enciclopedia Worldmark de las culturas y la vida diaria]).

  •  Día de Guy Fawkes. I jindeesti “jurhiatikua ma enga paisi miántajka enga Guy Fawkes ka máteru katolikuecha nóksï úpka atani rei Jakobuni 1605 jimbo jini Parlamento [britanikurhu]” (A Dictionary of English Folklore [Diccionario de folclore inglés]).

  •  Independensieri jurhiatikua. Máru paisiicharhu, kʼuínchikua máesti enga paisi miántajka jurhiatikuani enga máteru paisiiri independisarikuarhika.

•   ¿Kʼuínchikua máeski enga mítekateeka jukari kauinhani o ísku jándikua ambe únhani?

   Biblieri prinsipiu: “Jimboka ióniiskia engajtsï ísï jámaka eskaksï parhakpini anapu kʼuiripuecha na jámajka, no sáni kʼuratsekua jingontsï niátani no sési jásï ambe, tsitintsï no sési ambe niátani, jukarijtsï kauini, tsïnchentantsï kʼuínchikuecharhisï, kʼuínchikua ambejtsï úntani parajtsï kauini ka diosï úkatechantsï kómarhiani enga xáni no sési jaka” (1 Pedru 4:3).

   Eska na arhijka i prinsipiu, Jeobaeri testiguechaksï no nirasïndi kʼuínchikuecharhu engaksï kʼuiripuecha tsïnchentajka jukari kauini. Jeobaeri testiguechaksï tsitisïndi jarhani imeeri amiguecha jingoni. Enga nema uékaaka alkoli arhani, jánguarhintasïndi sántku arhani. Jánguarhintasïndiksï ini konsejuni kurhajchani enga Biblia uandajka: “Engajtsï tʼireni jámaaka, engajtsï itsïmani jámaaka o ambe uéjkijtsï úni jarhani, ú je iámindu ambe paraka Tata Diosï kʼéri ambe arhinhaaka” (1 Korintu 10:31).

   Ísï jimboksïsï Jeobaeri testiguecha no nirajti karnabalicharhu ni indeni járhati kʼuínchikuecharhu engaksï no kʼuratsekua jingoni niátajka ambe ma enga Biblia uandajka eska no sési jarhaska. Ístu ini kʼuínchikuecha jimbo jarhasti judiuecheri kʼuínchikua enga arhinhajka Purim. Nájkiruka i kʼuínchikua miátantauenga judiuechani engaksï pʼímutantanhapka siglu sinko ante de Jesúsi, iásï i kʼuínchikua ísï exenhasïndi komu judiuecheri karnabali. Libru El Judaísmo uandasïndi eska i kʼuínchikua mítekata jarhaska “kánikua kauikua arhani asta jamberi no míteni neeski ka kánikua uinhachanhasïndi ini karnabalirhu, kánharhikua jukantatinksï ka mámaru jásï xukuparhakua jukarinksï”, engaksï jurajkuaka “eskaksï nanakecha, tatakeri xukuparhaaka ka eskaksï tatakeecha, nanakeri xukuparhaaka”.

 Jo. Biblia jorhentpisïndi eskachi jatsiska para xénchaani ka janhanharhiani juchaari familiarichani, nájkirukaksï máteru járhati jakajkukuecha jatsiauaka (1 Pedru 3:1, 2, 7). Kurhangusïngachi eska enga Jeobaeri testigu ma nóteru uaantajkia máru kʼuínchikuechani, máru imeeri parientichaksï ikiasïndi, no sésiksï pʼikuarherani, ísïksï pʼikuarherani enajkiksï nóteru xénchajkia. Ísï jimbo, Jeobaeri testiguechaksï jánguarhintasïndi para xarhatakuani imeeri familiarichani eskaksï xénchasïnga ka iátsitakuarhu uandontskuarhekuani andisï iásï ísï eratsejkia ka sánderu jarhani imeechani jingoni máteru jurhiatikuecha jimbo.

 Nómbe. Jeobaeri testiguechaksï jakajkusïndi eska mándani kʼuiripu jatsiska para erakuni ambe úni (Josué 24:15). Janhanharhisïndiksï iámindu kʼuiripuechani, no arhiparini ambe engaksï jakajkujka (1 Pedru 2:17).