Na engaksï jorhentpijka Jeobaeri testiguecha kánikua jarhuataasïndi kʼuiripuechani paraksï míteni ambe enga jorhentpijka Biblia. Engajtsï jorhenguarhiaka Biblieri ambe juchantsïni jingoni, chájtsï uaaka:

•   Tsípikua jingoni irekani.

•   Sési pájperani Tata Diosïni jingoni.

•   Jorhenguarhini ambe enga Biblia uandajka eska úkuarhiaka sánderu orhepatini.

Ixújtsï ini ambe míteaka:

•  ¿Nénachi jorhentpisïni Biblieri ambe?

•  ¿Jatsia parani maiampini?

•  ¿Na xáni ióni jorhenguarhia?

•  ¿Ambe ka ambe uétarhisïni úni?

•  ¿Uaa exeni néneesïni Biblieri ambe jorhenguarhini?

•  Engani ueenaska jorhenguarhini Biblieri ambe, ¿jatsia parani Jeobaeri testigueni?

•  ¿Uaa juchiiti Biblia jingoni jorhenguarhini?

•  ¿Uaarini nema pámbeni?

•  Engani ióntki jorhenguarhipkia Jeobaeri testiguechani jingoni, ¿uaa ménderuni jorhenguarhini?

•  Engani ji no uéjka eskarini máteru nema jorhendaaka Biblieri ambe, ¿uaa máteru ambe úni?

 Nemaksïni uaati jarhuatani para chá jorhenguarhini Bibliani temeechani jimbo. Engajtsï jorhenguarhiska Bibliani arini libru jingoni Tsípikua jingoni ireka je, sánhani arhiakajtsï jorhenguarhini ambemindusï jorhentpijki Biblia ka ístu nénaksïni uaa jarhuatani engajtsï chá jorhenguarhiska. Engajtsï uéjka sánderu ambe míteni, exe je arini bideuni.

 Nómbe. Jeobaeri testiguechachi úsïnga ambe enga Jesúsi arhiapka imeeri chúxapatiichani: “Chájtsï no maiampiska indeni ambe jimbo engajtsï intsïnhaka, jimajkani chájtu íntspinta je ka no kobrarpini” (Mateu 10:8). Parajtsï ueenani jorhenguarhini íntskuatiksïni Biblia ma ka ístu libruni Tsípikua jingoni ireka je, ka nójtsï ma maiampiaka.

 Para iámu libruni kʼamarani, exeauakajtsï 60 jorhenguarhikuechani. Chájtsï uandaakia na xántsï uékasïni jorhenguarhini. Máru kʼuiripuechaksï ma jorhenguarhikua uékasïndi exeni mándani semana ka máteruechaksï sánderu.

1.  1. Uininharhita je jima enga arhijka “Kurhajkuarhi je paraksïni nema pʼorhembini”. Chaari informasioni solu jindeuati paraksïni Jeobaeri testigu ma úni exentani.

2.  2. Ima kʼuiripu engaksïni jorhendaaka Biblieri ambe, niuatiksïni exeni oksïni uandajpaati. Aianguatiksïni ambe engajtsï uaaka jorhenguarhini Biblieri ambe ka ístuksïni aianguni jauati ambe engajtsï chá kurhamarhiaka.

3.  3. Uaakajtsï uandontskuarheni imani kʼuiripuni jingoni parajtsï pakatperani nénajtsï jorhenguarhia ka na jatini. Ima kʼuiripuksïni uaati nirani exeni parajtsï jorhenguarhini, oksïni uaati telefonu jimbo uandajpani, bideuiamada jimbo, korreu o korreu elektroniku jimbo. Uaakajtsï ma ora jorhenguarhini o menusi, ménisï sánderuesïndi o ménisï no xáni; chájtsï uandaakia na engajtsï xáni uékaaka jorhenguarhini.

 Jo uaakajtsï. Uétarhisïndi eskajtsï orheta uininharhitaaka jima enga arhijka “Kurhajkuarhi je paraksïni nema pʼorhembini”. Jiáni enga ima kʼuiripu engaksïni jorhendaaka Biblieri ambe niuaka exeni o engaksïni uandajpaaka, uaakajtsï arhini eskajtsï iáiasï ma xanharijkusï uéjka jorhenguarhini jimbokajtsï solu uékasïnga exeni néneeski. Jimajkani, úraakajtsï foietuni Tsípikua jingoni ireka je, i foietu tanimu jorhenguarhikua jukaasti.

 Nómbe. Nájkirukaksï Jeobaeri testiguecha kánikua tsitijka Biblieri ambe jorhentpini, nóksï méni fuersa úsïndi paraksï kʼuiripuecha imeechani jingoni jámani. Sánderu sési, respetu jingonksï aianguasïndi kʼuiripuechani ambe enga jorhentpijka Biblia ka kurhangusïndiksï eska mándani kʼuiripu uaaka erakukuarhini ambe jakajkuni (1 Pedru 3:15).

 Jo. Uaakajtsï náki uéjki Biblia jingoni jorhenguarhini. Jeobaeri testiguechachi kámasïnga Bibliani Traducción del Nuevo Mundo jimboka sési tradusidu jarhaska ka no úkua jukasti para kurhanguni, joperuchi míteska eskaksï uánikua kʼuiripuecha imeecheri Biblia jingoni uékasïnga jorhenguarhini.

 Jo. Uaakajtsï pʼímarhini chaari familiani o chaari amiguechani.

 Jo. Jamberijtsï iásï sánderu tsitiakia. Iásïchi ménderueni jorhentpisïngia jimbokaksï kʼuiripuecha máteru ambe uétarhinchasïngia. Iásï ísïistia komueska uandontskuarheni jarhani, ka ístu uaakajtsï exeani imajeniichani ka bideuechani engaksïni kánikua jarhuataaka.

 Jo. Máru kʼuiripuechaksï uandasïndi eska sánderu fásiliiska eska máteru nema jorhendauaka, joperuksï jarhasti máteruecha engaksï jandiajku uéjka jorhenguarhini. Ini parti jimbo “Jarhuajperatecha para Bibliani estudiarini”, mámaru ambe jarhasti engaksïni kánikua jarhuataaka, uaakajtsï exeani ka nójtsï ma maiampiaka. Ari ambe jarhasti:

•   Bideuecha engaksï Biblieri ambe uandajka. Bideuestiksï engaksï sánisï ambe uandantajka Biblieri ambe.

•   Kurhamarhikuecha enga Biblia mókuantaajka. Ixújtsï uaaka exentani ambe enga uandajka Biblia imeeri ambe engaksï kʼuiripuecha kurhamarhikuarhijka.

•   Ambe engaksï arhikuekajka Biblieri karakateecha. Ixújtsï uaaka míteni ambe engaksï arhikuekajka máru Biblieri uandakuecha ka ístu karakateecha engaksï sánderu mítekateeka.