Éfesu 1:1-23
1 Ji Pablu, Kristu Jesúsiiri apostoliiska jimboka Tata Diosï ísï uékaska. Ji karakuaxaka pímbinharhatiichani engaksï Éfesu jaka ka engaksï sési chúxapani jaka Kristu Jesúsini.
2 Ji kómarhisïnga eskaksïni Tata Diosï, enga jindeeka juchaari Taati, ka ístu Tata Jesukristu kánikua kóndentaaka* ka eskaksïni jarhuataaka parajtsï pínandikua jatsini.
3 Kʼéri ambe arhinhee juchaari Tata Jesukristueri Tata Diosï, enga jindeeka imeeri Taati jémba, jimboka auandarhisï, imajtsïni mámaru jásï ambe jingoni kóndentaati imeeri espiritu santu jingoni, jimbokachi jucha Kristueri chúxapatiiska.
4 Jimbokajtsïni ima erakuska desde jiáni enga ueenaka jarhani parhakpini parachi imani* jingoni jarhani. Para ima exeni eskachi xénchpesïnga, eskachi pímbinhasïiska ka eskachi no ma ambe no sési úxaka.
5 Imajtsïni tʼuini erakusptia parajtsïni ísï pʼíkuntani komueska imeeri uájpeecha tata Jesukristuni jimbo, ísï eska ima na jaiapanhentajka ka ísï eska ima na uéjka,
6 paraksï kʼuiripuecha kʼéri ambe arhini indeni jimbo engajtsïni ima xáni kánikua kóndentaka imeeri Uájpa jimbo enga kánikua xénchajka.
7 I achamasïjtsïni euajpintasti imeeri iurhiri jimbo parachi jucha nóteru jántspiriinia, jo, ústi eskachi puáminhantapiringa ambe engachi no sési úka ísï eskajtsïni na xáni kóndentajka Tata Diosï.
8 Imajtsïni xarhatachesti na engajtsïni xáni kánikua kóndentaka engajtsïni ísï jánhastaka ka kurhangutarani,
9 jimbokajtsïni mítetaraska ambe enga ima uéjka, jo, ambe ma enga Tata Diosïiriika.* Ka ísï eska ima na jaiapanhintajka, uandaspti eska
10 uaxastapiringa néna úni ambe ma* ka i ambe úkuarhipirindi ima jurhiatikua enga ima uaxastakata jatsikia para iámindu ambe tánantani Kristuni japarini, ambe enga auandarhu jaka ka ambe enga echerirhu jaka. Jo, imani japarini,
11 imani engachi jingoni jaka ka engachi jingoni erakunhaka parachi juchajtu pʼirani erensiani, jimbokajtsïni ima tʼuini erakuspkia ka ima ísï ústi jimboka ísï uékaska ka iámindu ambe ísï úsïndi eska ima na uandajka ka eska ima na uéjka,
12 paraka juchantsïni jimbo, Tata Diosï kʼéri ambe arhinhaaka, jimboka kʼéri ambeeska, jimbokachi jucha ueenaska mintsikani Kristuni.
13 Joperujtsï chájtu jiáni ueenaska mintsikani imani engajtsï na kurhaapkia jurhimbikua ambe, ambakiti aianhperakuani enga uandajka eskajtsïni ima pʼímutantaska. Engajtsï chá na ueenapka jakajkuni, chájtujtsï imani jimbo jatsikunhaska mínda* espiritu santu jimbo enga Tata Diosï aiatspeka.
14 Ka indeni espiritujtsïni íntskusti parajtsïni aiachini eskachi intsïnhaaka erensiani,* paraka Tata Diosïiri ireta nóteru jántspiriuakia indeni jimbo engajtsïni euajpintaka para ima kʼéri ambe arhinhani.
15 Ka engani mítepka eskajtsï chá kánikua mintsikasïnga Jesúsini* ka eskajtsï kánikua xénchaasïnga pímbinharhatiichani,
16 méntkuni diosmaiamukua arhixaka Tata Diosïni chánksïni jimbo. Ístu, méntkuksïni kómarhijpichexaka
17 parakaksïni juchaari Tata Jesukristueri Tata Diosï, ima Taati enga xáni kʼéri ambeeka, jarhuataaka parajtsï chá úni jánhaskani ka sési kurhanguni ambe engaksïni Tata Diosï xarhatachejka, engajtsï jamberi chá sési jorhenguarhini jauaka imeeri ambe.
18 Imaksïni jarhuatasti parajtsï chá úni mintsita jingoni exeni ambe engachi erokuarhini jaka, indeni ambe engajtsï jimbo chá erakunhaka, parakajtsï uaaka exeni ambeeski inde xáni ambakiti ambe enga ima patsakuani jaka pímbinharhatiichani para íntsaani komueska erensia ma
19 ka parakajtsï míteaka imani xáni kʼéri uinhapikuani engajtsïni ima xarhatacheka juchantsïni engachi jakajkutiika. Ka imani ambe jimbo enga úka, xarhatasti na enga xáni uinhapitiika,
20 indeni uinhapikua jingonisï tsítantati* Kristuni, ka auandarhisï, ima uaxastasti imeeri jurhijkandani jimbo.
21 Sánderu kʼéri ambe ústi eska náki uéjki gobiernuni, eska náki uéjki juramutini, eska náki uéjki kʼuiripuni enga uinhapikua jatsika ka eska náki uéjki reiini, ka sánderu kʼéri ambe ústi eska náki uéjki kʼuiripuni ma enga kʼéri ambeeka iásï* ka ístu sánderu orhepani.*
22 Ístu, ima imeeri jantsiriicharhu peerakusti iámindu ambe para ima juramukuni ka imani peerasti para exeni jarhani iámu kúnguarhikuarhu anapu ambe,
23 enga jindeeka imeeri kuerpu ka enga iámindu ambe jatsika imeeri ambe, imasï jindeeti enga újka eska iámindu ambe jauaka iámindu ambe jimbo.
Notecha
^ Exe je Glosario, Tata Diosï kánikua kóntpintasïndi.
^ Ixú Kristunisï arhikuekani jati.
^ Exe je Glosario, ambe ma enga Tata Diosïiriika.
^ O “exeni japiringa iámu ambe”.
^ O “seiu ma”.
^ O “indeni espiritu jingoni, úndastijtsïnia maiamuni indeni erensieri engachi intsïnhaaka”.
^ Griegu jimbo: “Tata Jesúsini”.
^ Griegu jimbo: “jauatantati”.
^ O “ini tiempu jimbo”. Exe je Glosario, tiempu.
^ O “ístu imani tiempu jimbo enga jurhani jaka”.
