Éfesu 2:1-22
2 Ístu, Tata Diosïksïni chánksïni íntskusti tsípikua nájkirukajtsï uarhirini japka imani ambe jimbo engajtsï no sési niáteenga ka chaari pekaduecha jimbo.
2 Chájtsï ísï niátaspka jiáni engajtsï ini parhakpinini chúxapeenga,* jiáni engajtsï chúxapeenga imani enga tarhiatani juramukujka, ka inde eratsekua enga ísïika komueska tarhiata, indesï juramukuani jati imeechani engaksï xáni no kurhandirajka.
3 Ísïisti, juchajtuchi ióntki ísï jámasïreenga eskaksï inde kʼuiripuecha, jimbokachi imani ambe úsïreenga ambe enga juchaari kuerpu tsitijka ka eratseni, indeni ambe enga xáni no sési jaka. Ísï jimbo, desde engachi andajpenuka, juchachi jirinhakuarhixapka eskajtsïni Tata Diosï ikiachepiringa, ísï eska máteruechani.
4 Joperu Tata Diosï, ima enga xáni pʼamojpejka, imajtsïni xáni kánikua xénchasti
5 jimbojtsïnisï tsípikua íntskuti Kristuni jingoni nájkirukachi jucha uarhirini japka imani ambe jimbo engachi no sési niáteenga —chájtsï pʼímutantskata jarhaskia jimbokaksïni Tata Diosï kánikua kóndentaska—.
6 Ka no inde ambejku, ístujtsïni íntskusti tsípikua* imani jingoni, ka auandarhisï imani jingontsïni uaxastasti jimbokachi jucha Kristu Jesúsiiri chúxapatiiska.
7 Tata Diosï úxati ini ambe parajtsïni xáni kánikua kóndentani jiáni enga xáni ambakiti ambe uaaka juchantsïni jimbo jimbanhi parhakpinirhu* enga jurhani jaka, indeni jimbo engachi jucha Kristueri chúxapatiika.
8 Jimbokajtsïni Tata Diosï ísï xáni kánikua kóndentaska, chájtsï pʼímutantskata jarhaskia jimbokajtsï mintsikasïnga. Joperu no jindeesti jimbokajtsï chá andakuarheska indeni ambe, sánderu sési, ambe máesti engaksïni Tata Diosï intsïmbika.
9 Ísïisti, no jindeesti jimbokajtsï chá xáni sési jámasïnga,* paraka no nema jámani jauaka arhikuarhini.
10 Tata Diosïjtsïni imeeri jájkiicha jingoni ústi juchantsïni ka kueraastijtsïni jimbokachi Kristu Jesúsiiri chúxapatiiska parachi ambakiti ambe úni, imani ambe enga Tata Diosï tʼuini uandarini japkia eskachi úpiringa.
11 Ísï jimbo, miá je eskajtsï chá no judiueska ka ima kʼuiripuecha engaksï pasïri pʼikujtsïkuminhajka tsʼiuerakuarhu,* ísïksïni arhisïreendi chánksïni “kʼuiripuecha engaksï no pasïri pʼikujtsïkujka tsʼiuerakuani”.
12 Ióntki, chájtsï no ma ambe jatsispka Kristuni jingoni, nójtsï kuenta úkuarhisïreenga Israeli anapuechani jingoni ka nójtsï ambe ma mítespka ambe enga Tata Diosï pakatperapka ka ambe enga xáni aiatspipka. Ini parhakpinirhu, chájtsï ískusï irekani japka, nójtsï ambe ma mintsikaxapka ka nójtsï ambe ma jatsispka Tata Diosïni jingoni.
13 Joperu, jimbokajtsï Kristu Jesúsiiri chúxapatiiska, chá engajtsï ióntki iauani jarharitini japka Tata Diosïni, iásïjtsï imani jingoni jarhaskia Kristueri iurhirini jimbo.
14 Jimboka imajtsïnisï pínandikua íntskujti. Ima tánaantasti ini tsimani grupuechani paraksï májku úkuarhini ka xerentasti imani bardani enga teruakurhini japka ka enga jarhangutaani japka.
15 Enga ísï íntspika imeeri kuerpuni, úspti eskaksï nóteru marhuapiringia juramukuecha ka mandamientuecha engaksï Moisésiiri Leirhu japka, i ambesï ueendi eskaksï i tsimani grupuecha no úpiringa sési pájperani. Ima úspti eska ma grupu úkuarhintapiringa jimbokaksï iáminduecha imeeri chúxapatiiska, ka Kristu ústi eskaksï úpiringa sési pájperani.
16 Ístu, enga ima ísï uarhika jimbokaksï chkarirhu ma cháparhataspka,* ima ústi eskaksï i tsimani grupuecha úpiringa sési pájperantani Tata Diosïni jingoni, paraksï májku kuerpuenia ka nóteruksï tsimani grupuenia, ka ima imeeri kuerpu jingoni uándikusti ambe enga ueenga eskaksï no úpiringa sési pájperani.
17 Ima jurhasti ka aiangustiksïni indeni ambakiti aianhperakuani enga pínandikua íntspijka, chánksïni engajtsï iauani jarharitini japka Tata Diosïni ka ístu imeechani engaksï no iauani japka Tata Diosï jingoni,
18 jimbokachi imani jimbo, jucha engachi tsimani ireteeka, sésikuachi jatsiska parachi kómarhini Taatini jimbokachi májku espiritu santu intsïnhaska.
19 Ísï jimbo chájtsï nóteru uérakua anapueskia, sánderu sési, chájtujtsï jima anapueskia nani engaksï pímbinharhatiicha anapueka ka Tata Diosïiri familiarhu anapueskajtsïa,
20 ka chájtsï ísï únhaska komueska kʼumanchikua ma, ka apostoliicha ka Tata Diosïiri uandakua páriichaksï* jindeesti pítsekua, ka Kristu Jesúsi jindeesti sánderu ambakiti tsakapu* pítsekueri.
21 Inde kʼumanchikua enga únhaka, iámu ambe sési mátakurhitixati ka jimboka Kristuni jingoni jarhaska, sánhani arhixati sánderu kʼéni astaka templu máeuaka enga míndakata jauaka para Tata Diosï Jeoba.
22 Ka jimbokajtsï chájtu Kristu jingoni jarhaska, Tata Diosïksïni májku kʼéri tánantasti máteruecha jingoni kʼumanchikuarhu ma, nani enga ima irekani jaka, jimboka imeeri espiritu jima jarhaska.
Notecha
^ O “engajtsï májkueni ueenga eskaksï i parhakpini anapuecha”. Exe je Glosario, tiempu.
^ Griegu jimbo: “ístujtsïni jauatantasti”.
^ O “imani tiempu jimbo”. Exe je Glosario, tiempu.
^ O “xáni ambakiti ambe úsïnga”.
^ O “engaksï sirkunsidarinhajka”.
^ Exe je Glosario, chkari enga jindeeka para no sési nitamakuarhini.
^ O “profeteechaksï”.
^ O “eskinarhu anapu tsakapu”.
