Éfesu 3:1-21
3 Ísï jimbo, ji Pablu ónhakata jarhaska Kristu Jesúsini jimbo ka ístu paraksïni chánksïni jarhuatani, chánksïni engajtsï no judiueka...
2 Jamberijtsï chá mítekia eskani ji arhinhaska paraksïni jarhuatani* paraksïni Tata Diosï úni kánikua kóndentani parajtsï chá úni sési jarhani.
3 Ístujtsï mítekia eskani exeranhaska ambe ma, jo, ambe ma enga Tata Diosïiriika,* ísï eskaksïni na karachipkia sáni.
4 Ísï jimbo, engajtsï arhintaaka ini karakatani, chájtsï exeaka na engani xáni sési kurhangujka Kristueri ambe, jo, ambe máesti enga Tata Diosïiriika.*
5 Tata Diosï no mítetaraasti imeeri ambe* imani kʼuiripuechani engaksï ióntki irekaka. Joperu iásï, imeeri espiritu santuni jimbo, aianguasti imeeri pímbinharhati apostoliichani ka imeeri uandakua páriichani:*
6 eskaksï no judiuecha pʼipiringa erensiani ka eskaksï májku kuerpu jimbo japiringa ka eskaksï imajtu pʼipiringa ambe engajtsïni Tata Diosï aiachika, jimbokaksï imajtu Kristu Jesúsiiri chúxapatiiska ka jimbokaksï aiangunhaska ambakiti aianhperakuani.
7 Ji ueenaska ini ambe úni jimbokarini Tata Diosï xáni kánikua kóndentaska, imarini ini ambe intsïmbisti jiáni engareni íntskuka imeeri uinhapikua.
8 Ji sánderuni sapichu ambeeska eska ima enga sánderu sapichueka iámindu pímbinharhatiicha jingoni ka Tata Diosïreni jíndenisï xáni kánikua kóndentati ka íntskustirini sésikua parani nirani aianguani no judiuechani indeni ambakiti aianhperakuani enga jindeeka na engajtsïni Kristu xáni uánikua ambe jingoni kóndentaaka,
9 parani aianguani iáminduechani na enga úkuarhini jaka inde ambe enga Tata Diosïiriika;* inde ambe enga Tata Diosï iónisï jískakata jatsika, ima Tata Diosï enga iámindu ambe kueraaka.
10 I ambe ísï úkuarhisti paraka iásï, kúnguarhikuani jimbo, ima gobiernuecha ka juramutiicha engaksï auandarhisï jaka míteaka na enga Tata Diosï mámaru xarhatajka eska kánikua jánhaskatiiska.
11 I ambe terukuntasïndi Tata Diosïiri eratsekua jingoni, jimboka ima méntkisï ísï eratsekata jatsispkia úni Kristuni jingoni, Jesúsini jingoni enga jindeeka juchaari Tata.
12 Imani jimbo, jucha iásï úsïngia mintsikaparini uandontskuarhekuni Tata Diosïni ka kómarhini, jimbokachi mintsikasïnga Kristuni.*
13 Jimboksïnisï kurhacheni jaka eskajtsï no jámaaka chéni indeni jimbo engani ji xáni no sési nitamakuarhijka chánksïni jimbo, jimboka i ambe jindeeska parajtsï chá kʼéri ambe exenhani.
14 Jimbosïni tinguixurhikujka Taatini,
15 jimboka imani jimboksïsï jati iámindu familiecha auandarhu ka ístu echerirhu.
16 Tata Diosï kánikua kʼéri ambeesti, jimbosïni kómarhijka paraka ima uinhaperantaaka chaari mintsitani, indeni uinhapikua jingoni enga imeeri espiritu santu íntspijka,
17 ka ístuni kómarhisïnga Tata Diosïni paraka Kristu chaari mintsitarhu jauaka ka ístu parajtsï chá mintsita jingoni xénchperani jimbokajtsï chá mintsikasïnga. Ístuni kómarhisïnga parajtsï chá sési jupikuarhitini jarhani, ka parajtsï sési uaxastakata jarhani pítsekuarhu,
18 parakajtsï chá, iámindu pímbinharhatiicha jingoni, uaaka sésimindu kurhanguni na enga xáni kóskaka, na enga xáni ióskaka, na enga xáni iótaka ka na enga xáni jauanhika jurhimbikua ambe,
19 ka parajtsï míteni na enga xáni xénchpejka Kristu, inde ambe sánderu kʼéri ambeesti eska ambe uéjki enga kʼuiripu uaaka míteni, parakajtsï chá uaaka iámindu ambe jatsini, iámindu indeni ambe enga Tata Diosï íntspijka.
20 Ka indeni uinhapikua jingoni engajtsïni ima íntskujka, Tata Diosï iauani sánderu uánikua ambe úsïndi eska ambe uéjki engachi jucha kurhajkuarhiaka o ambe uéjki engachi jucha eranhaskaaka.
21 Eska kʼéri ambe arhinhaaka ima para méntkisï kúnguarhikuani jimbo ka Kristu Jesúsini jimbo. Eska ísï úkuarhiaka.
Notecha
^ O “parani iámu ambe ji exeni jarhani”.
^ Exe je Glosario, ambe ma enga Tata Diosïiriika.
^ Exe je Glosario, ambe ma enga Tata Diosïiriika.
^ Exe je Glosario, ambe ma enga Tata Diosïiriika.
^ O “profeteechani”.
^ Exe je Glosario, ambe ma enga Tata Diosïiriika.
^ Griegu jimbo: “imani”.
