Éfesu 4:1-32
4 Ísï jimbo, ji ónhakuarhetixaka Tatani jimbo, jimboksïnisï kurhacheni jaka eskajtsï sési jámaaka ísï eska na kʼuanijka eskaksï jámaaka imeecha engaksï erakunhaka:
2 mintsita jingoni kaxumbitii je, iatsitakuarhu jáma je* ka tekaanta je; ka jimbokajtsï xénchperasïnga, tekaatsperanta je máteru ka máteruni jingoni;
3 jánguarhinta je iáminduecha májku kʼéri jarhani, jimbokajtsï chá espiritu santu jimbosï májku kʼéri jaka, ka uaakajtsï májku kʼéri jarhani engajtsï jánguarhintaaka sési pájperani iáminduechani jingoni.
4 Májku kuerpusï jati ka ma espiritu santujkusï jati, ka ístu, ma ambejkujtsïsï erokuarhini jaka, ka indeni ambe jimbojtsïsï erakunhaka.
5 Májkusï Tata jati ka ma ambejkuchisï mintsikajka, ka ístu, májku itsï atakuarhikuasï jati.*
6 Májkusï Tata Diosï jati enga iáminduecheeri Taati jémbeeka, sánderu kʼéri ambeesti eska né uéjki ka iáminduechani úraasïndi para uánikua ambe úni ka imeeri uinhapikua iámindu ambe úsïndi úni.
7 Tata Diosïjtsïni kánikua kóndentaxati iáminduechani ka Kristujtsïnisï íntskuti ini intsïmperatani.
8 Jimboka ísï karakata jarhaska Karakateecharhu: “Enga ima iótakuarhu karhanchentapka, ónhakata pájtakuarhiaspti máru kʼuiripuechani; ka tátsekua íntspiaspti komueska intsïmperata ma”.
9 Joperu, ¿ambe arhikuekasïni enga arhijka “ima karhanchentaspti”? ¿Andi no arhikuekaxaki eska ima orheta kétsespka ixú echerirhu?
10 Ima enga kétseka, ístu jindeesti ima enga karhanchentaka, iauani jiniani karhanchentasti auandarhu paraka iámindu ambe úkuarhipiringa.
11 Ka jurajkuasti máru paraksï apostoliini, máteruechani paraksï Tata Diosïiri uandakua páriini,* máteruechani paraksï ambakiti aianhperakuani jámani uandantani ka jurajkuasti máru paraksï kúnguarhikuarhu anapuechani exeani jarhani* ka máteruechani paraksï jorhentpini.
12 Íntspiasti paraksï pímbinharhatiichani arhistakuani,* paraksï kúnguarhikuarhu anapu ánchikuarhitani úni ka paraksï kúnguarhikuani jarhuatani, enga ísïika komueska Kristueri kuerpu
13 asta jiáni jamberi engachi na iáminduecha ma ambejku mintsikaakia ka engachi na iámindu ambe míteakia Tata Diosïiri Uájpeeri ambe, astakachi na eratsekua jukariuakia ísï eska kʼuiripu ma enga kʼériikia ka astakachi na ísïiuakia eska Kristu.
14 Juchachi nóteru jatsiskia para ísï jámani eska sapiicha ka ísku jatini jámani jakajkuni ambe engaksï ima kʼuiripuecha jorhentpijka engaksï sési mítekuka néna támisï jánhastpini, parakachi no ísïiuaka eska barku ma enga marirhisï jámani jarhajka ka enga tarhiata ka oleechaksï no sési kántani jarhajka.
15 Joperuchi jucha jatsiska para jurhimbikua ambe uandantani ka xénchpeni ka jiáni kʼóruchi iámindu ambe jimbo eratsekua jukariuakia, parachi ísïini eska Kristu enga orhejtsïkutiika.*
16 Ísïiskachi komueska kʼuiripueri kuerpu ma, ka imani jimbo, iámindu kuerpurhu anapu ambe májku kʼériksï jarhasti ka úsïndiksï eska kuerpu sési ánchikuarhiaka. Ka enga iámu kuerpurhu anapu ambe sési ánchikuarhijka, kuerpu sési kʼésïndi jimbokachi iáminduecha xénchperasïnga.
17 Jimboksïnisï arhini jaka ka ístuksïni kurhachexaka Tateeri nombri jimbo eskajtsï nóteru ísï jámaakia* eskaksï na jámajka no judiuecha engaksï újka ambe engaksï imeecha eratsejka, indeni ambe enga méntku no ma ambe marhuajka.
18 Imeechaksï* pápkʼandu jarhasti ka nóksï jatsisti imani tsípikua enga Tata Diosï íntspijka, indeni jimbo engaksï no ma ambe míteka ka ístu jimboka imeecheeri mintsita no ma ambe pʼikuarherasïnga.*
19 Ka jimbokaksï nóteru kʼuratsesïngia, méntkuksï no sáni kʼuratsekua jingoni niátasïndi no sési jásï ambe* ka ístuksï ikichakueni jásï ambe niátasïndi ka nóksï sáni pʼíngukuarhisïndi.
20 Joperujtsï chá no méni jorhenguarhiska eska Kristu ísïispka.
21 Jesúsi jurhimbikua ambe jorhentpisti, engajtsï kurhaaka ambe enga xáni uandaka ima ka engaksïni ima jorhendaka, jiájkantsï sési míteska iámindu ini ambe.
22 Ísï jimbo, chájtsï jorhenguarhiskia eskajtsï nóteru jatsiska para ísï jámani eskajtsï ióntki na jámeenga.* Jimboka ísï eskajtsï ióntki na jámeenga, sánhani arhixapkajtsï no sési ambe niátani jimbokajtsï imani ambe niátasïreenga ambe engajtsï tsitienga ka engaksïni támisï peenga.
23 Chájtsï jatsiska para seguiriini jarhani jánguarhintani ménderueni* eratseni*
24 ka iásïjtsï jatsiskia para mójtakurhini, enga ísïika komueska xukuparhakua ambe jukantani, indeni jimbanhi jángua jingoni enga Tata Diosï kueraaka ka enga ísï terukuntajka eska Tata Diosï na uéjka. Ka i jimbanhi jángua jindeesti sési jámani ka mintsita jingoni kurhajchani Tata Diosïni.
25 Iásï engajtsï jurajkukia iámindu ambe engaksïni támisï jánhasteenga, iáminduechajtsï jatsiska para jurhimbikua ambe aianguni máteru kʼuiripuni,* jimbokachi iáminduecha májku kuerpurhu anapueska.
26 Engajtsï ikiani jauaka, asï no sési ambe niáta je;* asï chúskuta je ikiani.
27 Asï jurajku je eskaksïni Noambakiti inchaakucheaka.
28 Ima enga sïpajka nóteru jatsistia para sïpani jámani, sánderu sési, jatsisti para uinhamu ánchikuarhini imeeri jájkiicha jingoni ka ísï uaati jarhuatani imani enga uétarhinchani jauaka.
29 Asï jáma je no sési jásï ambe* uandani. Sánderu sési, imani ambe uanda je enga uinhaperantauaka máteruechani, ísï eskaksï na uétarhinchani jauaka, ka ístu imani ambe uanda je ambe enga jarhuatauaka imeechani engaksïni kurhajchani jauaka.
30 Ístu, asï jáma je no sési pʼikuastani jarhani Tata Diosïiri espiritu santuni, indeni espiritu santuni engajtsï jingoni mínda* jatsikunhaka para ima jurhiatikua engajtsï pʼímutantskateuaka jimbokaksïni euajpintaska.
31 Asï jáma je jatanhekuani máteruechani, asï jáma je no sési jásï ikiani, asï jáma je ikiani, asï jáma je uinhachatspini ka asï jáma je no sési pʼikuastpeni ka ístu asï jáma je no sési útspini.
32 Sánderu sési, sési kámbera je, xénchpera je ka pʼamojpera je, ka mintsita jingoni* puátsperanta je ísï eskaksïni Tata Diosï na xáni puáchentaka chánksïni Kristuni jimbo.
Notecha
^ O “iatsitakuarhu eratsi je”, “iatsitakuarhu uanda je”.
^ Exe je Glosario, itsï atakuarhini; itsï atani.
^ O “profeteeni”.
^ Griegu jimbo: “eranguani jarhani”. Ixú indeechanisï arhikuekaani jati engaksï kúnguarhikuarhu anapuechani exeani jarhajka ísï eska karichi eranguti ma na eranguani jarhajka karichiichani.
^ O “jurhimberantaani”.
^ Griegu jimbo: “enga éjpueka”.
^ O “eskajtsï nóteru ísï irekaakia”.
^ Griegu jimbo: “imeecheeri mintsita chopeska”.
^ Griegu jimbo: “Imeecheeri eratsekua”.
^ Uandakua griegu jimbo jindeesti asélgueia. Exe je Glosario, no sáni kʼuratsekua jingoni niátani no sési jásï ambe.
^ O “nóteru jatsiska para xásïini eska ióntki”.
^ O “jimbanhi ambe”.
^ O “jimbanherantani chaari eratsekueri uinhapikuani”.
^ O “prójimuni”.
^ O “asï pekarii je”.
^ Griegu jimbo: “tereri ambe”.
^ O “seiu”.
^ O “méntkisï”, “kánikua”.
