Éfesu 5:1-33
5 Ísï jimbo, májkueni jáma je eska Tata Diosï jimbokajtsï chá imeeri uájpeeska enga ima xáni xénchaajka
2 ka seguirii je xénchpeni ísï eskajtsïni* Kristu na xénchaka ka íntspisti imeeri tsípikuani juchantsïni jimbo* komueska kéjtsïtakua ma enga kánikua sési jájkundejka para Tata Diosï.
3 Chájtsï méntku no jatsiska para ísku jándikueri ambe* uandontskuarheni, no sési jásï ambeeri o tsititspeni jámani, jimboka ísï kʼuanisïnga eskaksï uaaka ima kʼuiripuecha engaksï pímbinharhatiika.
4 Ístu, asï jáma je imani ambe úni enga kʼuratsekua ambeeka, nijtujtsï ísku ambe ma uandani jarhani, nijtu ikichakueni jásï ambe jingoni chʼanachʼanamini, jimboka no kʼuanisïnga eskajtsï chá indeni ambe uaaka. Sánderu sési, diosmaiamukua arhijpi je.
5 Jimbokajtsï chá sési míteska ka ístujtsï kurhangusïnga eska no pʼiuaka Kristueri ka Tata Diosïiri Reinuni ima kʼuiripu enga ísku jándikua ambe niátajka,* enga ikichakueni jásï ambe újka ka enga tsititspeni jámajka jimboka ísïiska komueska ima kʼuiripu enga diosï úkatechani kómarhiajka.
6 Eskaksïni no nema támisï jánhastaaka chkuanderakua ambe jingoni, jimboka ísï jimbosï Tata Diosï kastigariuauaka imeechani engaksï xáni no kurhandirajka.
7 Ísï jimbo, asï jáma je kúrhiani indeechani;
8 jimbokajtsï ióntki chá pápkʼandu jarhaspka, joperu iásïjtsï tʼíntskuarhu jarhaskia jimbokajtsï Tateeri chúxapatiiska, ísï jimbo, seguirii je tʼíntskuarhisï jámani,
9 jimboka tʼíntskuarhu jámani, jarhuajpesïnga para kʼuiripu ma sési kámpini, sési jámani ka ísï jámani eska námindu jindeeka.
10 Jánguarhinta je exeni ambesï jaiapanhentajki Tata
11 ka ásteru jáma jeia imani ambe úni enga méntku no marhuajka, enga pápkʼandekuarhu anapueka. Sánderu sési, tʼíntskuarhu peera je indeni ambe enga no sési jaka.
12 Jimboka kʼuratsikueska indeni ambe uandani jarhani engaksï indeecha sïpatikuarku újka.
13 Jiájkani iásï tʼíntskua tʼíntskaxati ambe enga no sési jaka, jimbosï újti xarharani ambe enga no sési jaka.
14 Jimbosï uandanhajti: “Tʼu engari kʼuíni jaka, tsínharhia ka tsínta,* ka Kristukeni tʼíntskachiati”.
15 Ísï jimbo, xéparini jáma je parajtsï no ísï jámani komueska tontuecha, sánderu sési, ísï jáma je komueska ima kʼuiripuecha engaksï jánhaskatiika,
16 asï ísku jatini ambendurhi je* chaari tiempuni, jimboka kánikua no sési jánhaskuarhixaka ini jurhiatikuechani jimbo.
17 Ísï jimbo, ásteru tontueni jámia je ka kurhangu je ambesï uéjki Tata Diosï Jeoba.
18 Ístu, asï jáma je kénharhini xáni binu arhani, jimbokajtsï tátsekua nóteru uaakia pʼíngukuarhini;* sánderu sési, jánguarhinta je espiritu santu jatsini.
19 Pirea je salmuechani, kʼéri ambe arhi je Tata Diosïni, pireku je Tata Diosïni para kʼéri ambe arhini; ísï pireku je Tata Diosï Jeobani enajkijtsï chaari mintsitarhu kámani jaki kústakua ambe ka ísïjtsï uaaka uinhaperperantani iáminduecha.*
20 Ka ístu, méntkisï diosmaiamukua arhi je iámindu ambe jimbo juchaari Tata Diosïni, enga jindeeka juchaari Taati, ka ísï ú je juchaari Tata Jesukristueri nombri jimbo.
21 Méntkisï kurhajchaa je máteruechani, jimbokajtsï chá chénharhisïnga Kristuni.
22 Uarhiitiichaksï jatsisti para méntkisï kurhajchaani uámbeechani ísï eskaksï na méntkisï kurhajchajka Tatani,
23 jimboka acheetisï orhejtsïkujka témbani ísï eska Kristu na orhejtsïkujka* kúnguarhikuani, ima pʼímutantasti indeni kuerpuni.
24 Ísï eska kúnguarhikua na méntkisï kurhajchajka Kristuni, uarhiitiichajtuksï jatsisti para méntkisï kurhajchaani uámbeechani.
25 Acheetiicha, xénchaa je méntkisï chaari uarhiitiichani ísï eska Kristu na xénchaka kúnguarhikuani ka íntspini imeeri tsípikuani kúnguarhikuani jimbo,
26 ka ísï ústi para pímbinhajkuntani, úrasti Tata Diosïiri uandakuani para pímbinhajkuntani komu enajki itsï jingoni juparhinta.
27 Ima ísï ústi paraka kúnguarhikua sési jásï japiringa imani japarini. Ima uékasïndi eska kúnguarhikua pímbinhasï jauaka ka eska no ma ambe no sési exeminhaaka.
28 Májkueni, acheetiichaksï jatsisti para xénchaani témbeechani ísï eskaksï imeechajkumindu na xénchakuarhijka. Ima acheeti enga xénchajka témbani, jandiajkumindusï xénchakuarhijti,
29 jimboka no nema jarhaska enga no xénchajka* imeeri kuerpuni, sánderu sési, tʼirerasïndi ka sési kámani, ísï eska Kristu na kámajka kúnguarhikuani,
30 jimbokani jucha imeeri kuerpurhu anapueska.
31 “Ísï jimbo, tataka jurajkuati taati jémbani ka amambani ka kúrhiati imeeri témbani* ka tsimarhanksï májku kuerpueuati”.
32 Kánikua ambakiti ambeesti i ambe enga Tata Diosïiriika* ka engani ji uandantani jaka, jo, Kristueri ambesïni uandantani jaka ka kúnguarhikueri ambe.
33 Joperu chá mándani arhini, jatsiskajtsï para xénchani chaari uarhiitini ísï eskajtsï chájkumindu na xénchakuarhijka. Ka uarhiiti jatsisti para mintsita jingoni janhanharhini uámbani.
Notecha
^ O jamberi “eskaksïni”.
^ O jamberi “chánksïni jimbo”.
^ Griegu jimbo pornéia. Exe je Glosario, ísku jándikua ambe.
^ Exe je Glosario, ísku jándikua ambe.
^ Griegu jimbo: “jauara”.
^ O “sési úra je”.
^ O “jimbokajtsï tsïnchentaaka”.
^ O jamberi “uinhapikuarhintani”.
^ Ini kapitulu jimbo, uandakua pʼurhe jimbo “orhejtsïkuni” griegu jimbo jindeesti “éjpu”.
^ O “enga ikiakujka”.
^ O “ka imeeri témba jingoni jauati”. I uandakua griegu jimbo arhikuekaxati ambe ma enga sési mákuarhitini jaka.
^ Exe je Glosario, ambe ma enga Tata Diosïiriika.
