Éfesu 6:1-24
6 Sapiicha,* jatsiskajtsï para kurhajchaani chaari taatiichani jimbokajtsï chá Tateeri chúxapatiiska ka inde ambesï sési jati para úni.
2 “Janhanharhi chiiti taatini ka chiiti naandini”. Jimboka i jindeeska orheta mandamientu enga arini ambe aiatspejka:
3 “Parakeni sési nicheni ka parari ióni irekani echerirhu”.
4 Taatiicha,* asï ikiataa je chaari sapiichani, sánderu sési, arhistakua je ka jorhendaa je* ísï eska Tata Diosï Jeoba na uéjka ka seguirii je ísï tʼarhexeraani.
5 Chá engajtsï jántspini jámajka, jatsiskajtsï para méntkisï kurhajchaani chaari patroniichani ka janhanharhiani, ísï kurhajchaa je enajkijtsï Kristuni kurhajchani japirini.
6 Ka asï jáma je jiántku ísï úni engaksïni exeni jauaka* nomasi parajtsï sési pakarani kʼuiripuechani jingoni, sánderu sési, ísï ú je komueska Kristueri jántspiriicha engaksï iámu mintsita* jingoni újka ambe enga Tata Diosï uéjka.
7 Chájtsï jatsiska para tsípikua jingoni jántspini, ísïjtsï jántspini enajkijtsï Tata Diosï Jeobani jántspikuni japirini ka no kʼuiripuechani,
8 jimbokajtsï chá míteska eska Tata Diosï Jeoba, mándani kʼuiripuni kóndentaaka imani ambe jimbo enga sési úka, na uéjki jántspiriini o nómbe.
9 Ka chá engajtsï patroniika, jatsiskajtsï para méntkisï májkueni kaani imeechani, nójtsï jatsiska para chéraani jarhani, jimbokajtsï chá mítetixaka eskaksï indeecha ka chá májku Patronintkujtsïsï jatsika jini auandarhu ka ima iáminduechani májkueni kaasïndi.
10 Ka para kʼamarani, seguirii je uinhapikuarhintani Tatani jimbo ka imeeri xáni kʼéri uinhapikuani jimbo.
11 Chájtsï jatsiska para jukantani iámindu indeni ambe enga jindeeka para uarhipeni, indeni ambe enga Tata Diosï íntspijka parakajtsï chá uaaka uíuinhasï jarhani jiáni enga Noambakiti jirinhakuntani jauaka nénaksïni uaa támisï jánhastani;
12 jimbokachi jucha no kʼuiripuecha jingonisï uarhipeni jaka,* sánderu sési, juchachi gobiernuechani jingonisï uarhipeni jaka, juramutiichani jingoni, imeechani jingoni engaksï juramuni jaka ini parhakpinirhu enga xáni pápkʼandeka, imani espirituechani jingoni engaksï xáni uinhapika ka engaksï xáni no ambarhaka, engaksï auandarhisï jaka.
13 Ísï jimbojtsïsï jatsika para jukantani iámindu indeni ambe enga jindeeka para uarhipeni, indeni ambe enga Tata Diosï íntspijka, paraka ima jurhiatikua enga no sési jánhaskuarhini jauaka, chá uaaka tekaantani ka uíuinhasï jarhani engajtsï na uaakia ambe enga xáni uétarhiaka.
14 Ísï jimbo, uíuinhasï ja je, sési jónguarhi je jurhimbikua ambe, enga ísïika komueska jónguarhikua ma jukarini jarhani; ka ístu sési jáma je, enga ísïika komueska jukantani indeni inchanhikuani enga iámu kʼénhikuani kuájchakujka.
15 Ka sési jukaanta je kuarhachiichani parajtsï listu jarhani para uandantani ambakiti aianhperakuani enga pínandikua íntspijka.
16 Joperujtsï ístu jatsiska para sési jupikani indeni k’éri kuájchakutarakuani enga jindeeka mintsikani Tata Diosïni, indentsï jingoni uaaka pátaani Noambakitiiri flecheechani engaksï tixarhuni jaka.
17 Ístu, méntku miáni ja je eskajtsï pʼímutanhantaaka, inde ambe ísïisti enajkijtsï inchajtsïtini jaki ambe ma parajtsï kuájchakuni chaari éjpuni ka pá je espiritu santueri espadani enga jindeeka Tata Diosïiri uandakua.
18 Ka engajtsï jamberi ini ambe úni jauaka, seguirii je méntku úndani kómarhini espiritu santu jingoni; mámaru ambe kómarhi je ka kómatsïkuarhi je. Ka parajtsï úni ini ambe úni, jingontku ja je ka méntku únda je iámindu pímbinharhatiichani kómarhijpikuani.
19 Ístujtsïni kómarhijpiche je jíndeni, para jiáni enga kʼuaniaka, ji no sáni chéparini uandantani indeni ambe enga Tata Diosïiriika,* jo, ambakiti aianhperakueri ambe,
20 Tata Diosïrinisï axati parani uandantani ambakiti aianhperakuani, jimbosïni kadeneecha jingoni jótakuarhetini jaka; kómarhijpichejtsïni je parani ji úni no sáni chéparini uandantani ambakiti aianhperakuani ísï eska na kʼuanijka eskani uaaka.
21 Tíkiku, juchiiti erachi* engani ji xáni xénchajka ka enga sési marhuakuni jaka Tatani, imaksïni aianguati na jámaxaki ji ka na engareni nicheni jaka.
22 Ísï jimbosïni axani jaka: parakajtsï chá míteaka náchi jámaxaki jucha ka para ima sési pʼikuastantani chaari mintsitani.
23 Eskaksï erachiicha pínandikua jatsiaka, eskaksï iáminduecha xénchperaaka ka eskaksï mintsikaaka Tata Diosïni, i ambe Tata Diosïni jimboesti enga juchaari Taatiika ka Tata Jesukristuni jimbo.
24 Eska Tata Diosï kánikua kóndeantauaka iámindu imeechani engaksï mintsita jingoni xénchajka juchaari Tata Jesukristuni.
Notecha
^ O “Uátsïtiicha”.
^ Ixú acheetiichanisï arhikuekaani jati engaksï kaajka sapiichani.
^ O “jarhuataa je paraksï ísï eratseni”.
^ Griegu jimbo: “ísï úni parajtsï éskuani marhuakuni”.
^ O “alma”. Exe je Glosario, alma.
^ Griegu jimbo: “jupiperani jaka”.
^ Exe je Glosario, ambe ma enga Tata Diosïiriika.
^ O “ermanu”.
